බෙතානියේ ඉන්න යේසුස් ඊළඟ දවසේදී ඒ කියන්නේ නීසාන් 9වෙනි ඉරිදා එහෙන් පිටත් වෙනවා. ගෝලයන් එක්ක ඔහු දැන් ගමන් කරන්නේ යෙරුසලමට. ඔලීව කන්දේ පිහිටලා තියෙන බෙත්පාගයට ආවාම යේසුස් ගෝලයන් දෙන්නෙක්ට මෙහෙම කියනවා.

“ඔබට පෙනෙන අර ගමට යන්න. ඔබ ඒ ගමට ඇතුල් වූ විට එහි බැඳ සිටින බූරුදෙනක හා ඌ සමඟ සිටින බූරු නාම්බෙකු ඔබට හමු වෙයි. උන්ව ලිහා මා වෙතට ගෙනෙන්න. යමෙකු ඔබට කුමක් හෝ පැවසුවොත් ‘ස්වාමීන්ට උන්ව අවශ්‍ය වී තිබෙනවා’ කියා කියන්න. එවිට ඔහු වහාම උන්ව ගෙන යෑමට ඉඩහරියි.”—මතෙව් 21:2, 3.

යේසුස් කියපු දෙයින් සෙකරියා කියපු අනාවැකියක් ඉටු වෙන්න මඟ පෑදෙනවා කියලා ගෝලයන් ඒ වෙලාවේ තේරුම්ගන්නේ නැහැ. හැබැයි පස්සේ ඔවුන් ඒක තේරුම්ගන්නවා. මොකද දෙවියන් රජු හැටියට පත් කරන කෙනා ගැන සෙකරියා මෙහෙම කියලා තිබුණා. “ඔබේ රජ බූරුවෙකු පිට නැඟී ඔබ වෙතට එන්නේය. ඔබේ රජු ධර්මිෂ්ඨ, නිහතමානී රජෙකි.”—සෙකරියා 9:9.

ගෝලයන් බෙත්පාගයට ඇවිත් බූරු නාම්බෙක්ව සහ උගේ අම්මාව ලිහනකොට ඒ ළඟ ඉන්න මිනිසුන් මෙහෙම අහනවා. “ඔබ මොනවාද කරන්නේ? ඔය බූරු නාම්බාව ලිහන්නේ ඇයි?” (මාක් 11:5) හැබැයි උන්ව ගෙනියන්නේ ස්වාමීන්ට කියලා කිව්වාම මිනිසුන් ඒකට ඉඩ දෙනවා. ගෝලයන් උන්ව යේසුස් ළඟට ගෙනත් තමන්ගේ පිට වස්ත්‍ර සතුන් දෙන්නා පිට දානවා. යේසුස් තෝරාගන්නේ බූරු නාම්බාව.

යේසුස් බූරු නාම්බා පිටේ යෙරුසලමට එද්දී හුඟක් අය ඔවුන්ගේ පිට වස්ත්‍ර ගලවලා මඟ දිගේ එළනවා. තවත් අය “රටඉඳි ගස්වලින් අතු කපාගෙන” ඒවා මඟ දිගේ අතුරනවා. “ඔහුට ආරක්ෂාව ලැබේවා! යෙහෝවා දෙවිගේ නාමයෙන් එන තැනැත්තාට ආශීර්වාද ලැබේවා!” කියලා ඔවුන් හඬ නඟා කියනවා. (මාක් 11:8-10) ඒක පරිසිවරුන්ට නම් රුස්සන්නේ නැහැ. ඒ නිසා තමයි “ගුරුතුමනි, ඔබේ ගෝලයන්ට තදින් අවවාද කරන්න” කියලා ඔවුන් යේසුස්ට කියන්නේ. හැබැයි යේසුස් කියන්නේ “ඔවුන් නිහඬ වී සිටියොත් ඔවුන් වෙනුවට ගල් මහත් හඬින් කෑගසයි” කියලයි.—ලූක් 19:39, 40.

යෙරුසලම දකිද්දී යේසුස්ට මොන තරම් දුකක් දැනෙනවාද කියනවා නම් ඔහු අඬමින් මෙහෙම කියනවා. “මේ කාලයේදී ඔබට සමාදානය ලබාගත හැකි ආකාරය තේරුම්ගන්නයි තිබුණේ. නමුත් දැන් ප්‍රමාද වැඩියි. ඒ ප්‍රස්තාව ඔබේ ඇස් ඉදිරිපිටම ඔබට අහිමි වෙලා.” යෙරුසලමට අත් වෙන දේ ගැන යේසුස් මෙහෙම කියනවා. “සතුරන් ඇවිත් ඔබව වට කරයි. උල් කළ කණුවලින් ඔවුන් ඔබ වටා විශාල වැටක් සාදා සෑම පැත්තෙන්ම ඔබට ප්‍රහාර එල්ල කරයි. ඔවුන් ඔබවත් ඔබේ දරුවන්වත් පොළොවේ ගසා මරා දමයි. ඔවුන් ඔබේ නුවර සහමුලින්ම විනාශ කරයි. එහි සෑම ගලක්ම බිමට හෙළනු ලබනවා. ඒ සියල්ල ඔබට සිදු වන්නේ ඔබව සෝදිසියට ලක් කළ කාලයේදී ඔබ මුරණ්ඩු ලෙස ක්‍රියා කළ නිසයි.” (ලූක් 19:42-44) ක්‍රි.ව. 70 යෙරුසලම විනාශ වෙද්දී ඔහු කියපු ඒ දේ ඉටු වෙනවා.

යේසුස් යෙරුසලමට ආවාම “මුළු නුවරම කැලඹී, ‘මේ කවුද’” කියලා අහනවා. “මේ ගලීලයේ නාසරෙත් නුවරෙහි අනාගතවක්තෘ වන යේසුස්” කියලා සමහරු කියනවා. (මතෙව් 21:10, 11) ලාසරුස්ව නැවත නැඟිටුවනවා දැකපු අයත් දැන් ඒ ගැන අනිත් අයට කියනවා. තමන්ගේ සැලසුම් අසාර්ථක වෙලා කියලා තේරුම්ගන්නා පරිසිවරුන් කතා වෙන්නේ “මුළු ලෝකයම ඔහු පසුපස යනවා” කියලයි.—යොහන් 12:18, 19.

වෙනදා වගේම යේසුස් මේ වතාවේදීත් යෙරුසලමට ආපු ගමන්ම මිනිසුන්ට උගන්වන්න දේවමාලිගාවට යනවා. ඔහු ළඟට අරන් එන අන්ධ අයවත් කොර අයවත් ඔහු සුව කරනවා. පිරිමි දරුවන් හඬ නඟමින් කියන්නේ “දාවිත්ගේ පුත්‍රයාව ආරක්ෂා කරන්න” කියලයි. ඒ දේවල් ගැන නායක පූජකයන්ට සහ නීතිය පිටපත් කරන අයට අහන්න දකින්න ලැබෙද්දී ඔවුන්ට මොන තරම් කේන්ති යනවාද කියනවා නම් “මොවුන් කියන දේ ඔබට ඇසෙනවාද” කියලා ඔවුන් යේසුස්ගෙන් අහනවා. ඔහු ඊට උත්තර දෙන්නේ මෙහෙමයි. “‘බිලිඳුන්ගේද කිරි බොන දරුවන්ගේද මුවින් ඔබ ප්‍රශංසාව ගෙන දී තිබේ’ යන කොටස ඔබ කවදාවත් කියවා නැද්ද?”—මතෙව් 21:15, 16.

දේවමාලිගාවට ඇතුල් වෙලා අවට සිද්ධ වෙන හැම දෙයක් දිහාම බලන යේසුස් දැන් අඳුර වැටී තියෙන නිසා නියෝජිතයන් එක්ක පිට වෙනවා. නීසාන් 10වෙනිදාට කලින් ඔහු ආයෙත් බෙතානියට යනවා. බෙතානියේ තමයි ඒ රාත්‍රියේ ඔවුන් නවාතැන් ගන්නේ.