A tra dei, sonde 9 Nisan, Yesus e gowe libi Betania nanga den disipel fu en èn den e go na Yerusalem. Te den e doro Betfage na tapu Olèif-bergi, Yesus e taigi tu fu den disipel:

„Go na a dorpu di unu e si drape, dan unu o feni wan buriki di tai nanga en pikin na en sei. Lusu den èn tyari den kon na mi. Efu wan sma taigi unu wan sani, dan un musu taki: ’Masra abi den fanowdu.’ Dan a sma o seni den kon wantewante.”​—Mateyus 21:2, 3.

Den disipel no e frustan taki a sani di Yesus taigi den abi fu du nanga wan Bijbel profeititori. Ma bakaten den e frustan taki a sani di den ben musu du ben de fu meki a profeititori fu Sakaria kon tru. Sakaria ben taki dati a Kownu di Gado ben pramisi ben o kon na ini Yerusalem nanga ’sakafasi èn a ben o sidon na tapu wan buriki, a pikin fu wan umaburiki’.​—Sakaria 9:9.

Te den disipel e doro na Betfage, den e teki a manburiki nanga en mama. Ma den sma di e tanapu drape e aksi den: „Fu san ede unu e lusu a pikin buriki?” (Markus 11:5) Te den e yere taki den meti na gi Masra, den e meki den disipel tyari den go na Yesus. Den disipel e poti den dyakti fu den na tapu den tu buriki, ma Yesus e go sidon na tapu a pikin fu a buriki.

Moro nanga moro sma e waka baka Yesus te a e rèi go na Yerusalem. Furu sma e bradi den krosi fu den na tapu a pasi. Tra sma e koti „taki fu den bon di ben de na den gron” èn den e bradi den na tapu a pasi. Den e bari: „Grantangi, wi e begi, tyari frulusu kon! Blesi fu a sma di e kon na ini Yehovah nen! Blesi fu a Kownukondre di e kon, a di fu wi tata David!” (Markus 11:8-10) Den Fariseiman di de na mindri a pipel e mandi te den e yere san den sma e bari. Den e taigi Yesus: „Leriman, bari den disipel fu yu meki den hori den mofo.” Yesus e piki den: „Mi e taigi unu: Efu den ben o tan tiri, dan den ston ben o bari den srefi sani dati.”​—Lukas 19:39, 40.

Te Yesus e si Yerusalem, a e bigin krei èn a e taki: „Mi winsi taki yu srefi ben o frustan san e tyari trutru koloku kon. Ma now yu no man frustan dati.” Den sma fu Yerusalem o kisi strafu fu di den no wani gi yesi na Gado kwetikweti. Yesus e taki san o pasa: „Yu feanti o bow wan skotu fu srapu postu na yu lontu. Den o lontu yu èn na ala sei sma o pina yu. Den o naki yu nanga den pikin fu yu trowe na gron èn den no o libi nowan ston fu yu na tapu a trawan, bika yu no ben sabi a ten di Gado kon ondrosuku yu” (Lukas 19:42-44). Yerusalem kisi pori na ini a yari 70, soleki fa Yesus ben taki.

Te Yesus e go na ini Yerusalem, ’wan heri dyugudyugu e kon na ini a foto. Sma e taki: „Suma na a sma disi?”’ Trawan e taki: „Disi na a profeiti Yesus fu Nasaret na Galilea!” (Mateyus 21:10, 11) Den sma di ben si fa Yesus gi Lasarus wan opobaka, e fruteri trawan fu a wondru dati. Den Fariseiman e sari taki den no man du noti. Den e taigi makandra: „Heri grontapu e waka na en baka.”​—Yohanes 12:18, 19.

Yesus e go na a tempel na ini Yerusalem fu gi leri, soleki fa a gwenti du. Drape a e dresi den breniwan nanga den malengriwan. Den edeman fu den priester nanga den leriman fu Wet ati e bron te den e si san Yesus e du, èn te den e yere den boi na ini a tempel e bari: „Grantangi, wi e begi yu, frulusu a Manpikin fu David!” Den kerki fesiman e aksi Yesus: „Yu e yere san den e taki?” Yesus piki den: „Noiti unu no leisi a sani disi: ’Yu meki pikin-nengre nanga nyofi pikin opo den mofo fu prèise yu’?”​—Mateyus 21:15, 16.

Yesus e luku lontu na ini a tempel. Ma fu di a lati kaba, a e gowe nanga den apostel fu en. Fosi 10 Nisan bigin, a e drai go baka na Betania pe a e tan sondeneti.