E kabanea tenua te tairiki Iesu ma taan rimwina i Betania imwin rokoia mai Ieriko. Boni moaningabongin te Moanibong ae Nitian 10 ngkai, ao a a mwananga nako Ierutarem. E a baki Iesu ngaia are ngke e nora te aroka ae te biiku, ao e a nako ni kaania. Ma iai uaana?

Ngkai ai bon raabaneni Maati ma tain rikin uaan te biiku bon Tun. Ma a moantaai n riki baana. Ngaia are e kantaningaia Iesu bwa tao e na moantaai naba n uaa. Ma e noria bwa bon akea uaana. E mwamwanaa te aba baan te aroka aei. E taku ngkanne Iesu: “Akea ae e na manga kana uaam.” (Mareko 11:14) E ataaki nanon aei n te ingabong are imwina ngke e a rai baan te aroka aei n te tai ae waekoa.

E aki maan ao a a roko i Ierutarem Iesu ma taan rimwina. E nakon te tembora, are e a tia ngkoa n tuoa ni bwakantaain ngkoananoa. Ma n te tai aei e a aki tii tuoa, ma e karaoa naba te mwakuri are e karaoia tenua te ririki n nako n te Toa ae te Riao n 30 C.E. (Ioane 2:14-​16) N te tai aei e kakionakoia Iesu “taani kaboonakoi bwaai ao taani kaboobwai i nanon te tembora, ao e karangai aia taibora taan raimwane ao aia kaintekateka taani kaboonakoi taobe.” (Mareko 11:15) E aki kariaia naba temanna bwa e na uabwai rinanoni katawanangin te tembora ni kauarerekea kawaina.

E aera Iesu ngkai e waekoa ni kabuakakaia taan raimwane ao taani kaboonakoia maan n te tembora? E taku: “Tiaki e koreaki ae kangai, ‘E na aranaki umwau bwa te umwa n tataro ibukia natannaomata ni kabane’? Ma kam karaoia bwa bwangaia taani kamwarua.” (Mareko 11:17) E arania bwa taani kamwarua ibukina bwa a kabuburai aia boo nakoia aomata ake a na kabooia maan ibukin te karea. E iangoa aroia anne Iesu bwa te aonikai ni kuribwai ke te iraa.

A bon ongo taekan te bwai ae e karaoia Iesu mataniwi n ibonga, taani koroboki ao mataniwia aomata, ao a a manga ukoukora naba angaia n tiringnga. Ma iai te kangaanga ae a kaitaraa. Akea aia anga ni kamatea Iesu kioina ngkai a bati aomata aika ongongora irouna.

Tiaki tii I-Iutaia n roko ni kaea te Toa ae te Riao ma te koraki naba ake a rairaki nakon te Aro n Iutaia. Iai naba kaaini Kuriiti ake a roko bwa a na taromauri n te toa anne. A kawara Biribo naakai bwa tao a anaaki nanoia n arana ni Kuriiti, ao n tuangnga bwa a kan nora Iesu. Tao e aki koaua raoi Biribo bwa e riai kaitibooia naakai ma Iesu ke e aki, ngaia are e a nako ni maroro ma Anterea. A kaai n nako n tuanga Iesu are e mena n te tembora.

E ataia Iesu bwa ai tii tabebong ao e nangi mate, ngaia are ai tiaki aei ana tai ni kaotia nakoia naake a kani kinaa ao tiaki naba ana tai ni karekea tangirana. E kaekaia abotoro ake uoman akekei n te kaikonaki ni kangai: “E a roko te aoa are e nang kamimitongaki iai Natin te aomata. I tuangingkami raoi te koaua, bwa ngkana e aki bwaka koraan te uita i aontano ma ni mate ao e teimatoa n tiku n tii ngaia, ma ngkana e mate, ao ngkanne e na karikii uaa aika bati.”​—Ioane 12:23, 24.

E bae n aki rangi ni kakawaki koraan te uita ae tii teuana. Ma ngkana e katukaki n te tano ao e “mate,” e kona ni manga bwebwerake bwa te kai ae e na karikii koraani uita aika bati. N aron naba anne, Iesu bon tii ngaia te aomata ae kororaoi. Ma ngkana e mate ma kakaonimakina nakon te Atua, e na riki bwa te tia anga te maiu ae aki toki nakoia aika bati ake iai naba irouia te nano ni kan anga ngaiia. Mangaia are e taku Iesu: “Ane e tangira maiuna ao e na kabuaa, ma ane e ribaa maiuna n te aonnaba aei, ao e na kawakinna ibukin te maiu are aki toki.”​—Ioane 12:25.

E aki tii iangoia i bon irouna Iesu bwa e kangai: “Ane e kan toro irou, ao ke e irirai, bwa ike I mena iai ao e na mena naba iai au toro. Ane e kan toro irou, ao e na karineaki iroun te Tama.” (Ioane 12:26) Ai tamaroara te kaniwanga aei! A na raona Kristo n te Tautaeka n Uea te koraki ake a karineaki iroun te Tama.

E iangoa te rawawata ae korakora Iesu ao te korakai ni maraki ni matena ae imwaina, ao e taku: “I a rawawata ngkai, ma tera ae N na taekinna? Tamau, kamaiuai man te aoa aei.” Ma e aki tangiria Iesu bwa e na aki karaoa nanon te Atua. E reitia n taku: “Ma e ngae n anne, bon aei bukin rokou n te aoa aei.” (Ioane 12:27) E boraoi nanon Iesu ma ana kantaninga ni kabane te Atua, n ikotaki naba ma ana angakarea ni matena.