Omu Yesu natumbaji twenyi vafumine kuYeliko vatwamine makumbi atatu muMbetane. Kuheta halikumbi lyaMande nachimene, Nyisane 10, vakatukile nakuya kuYelusalema. Oloze Yesu evwile zala. Kaha omu amwene mutondo wamukuyu, ayileko. Uno akawanyineko jikuyu tahi?

Kwapwile kusongo yakakweji waMarch, oloze jikuyu japwilengako mukakweji waJune. Chipwe ngocho, uze mutondo walivangile kupwa namafwo. Echi chikiko chalingishile Yesu ashinganyeke ngwenyi atela kuze kumutondo kwapwile jikuyu jakulivanga. Oloze omu aheteleko, kawanyineko jikuyuko. Kufukula chauze mutondo chongele vatu. Yesu ambile ngwenyi: “Kanda nakukapwa mutu mwakalya cheka mihako kuli oveko.” (Mako 11:14) Hahaze vene, mafwo auze mutondo aputukile kuzuza, kaha kuheta nachimene vatachikijile mwalumbunukilile chuma kana.

Yesu natumbaji twenyi vatambukileko chachindende, kaha vahetele kuYelusalema. Ayile kutembele kuze apwile nakukekesa vyuma likumbi lyafumineho nachingoloshi. Halikumbi lize, akekesele chikuma vyuma. Alingile cheka vyuma vize alingile myaka yitatu yahichilemo haPaseka yamu 30 C.E. (Yowano 2:14-16) Halikumbi kana, Yesu ahangile “vosena vaze vapwile nakulanjisa navaze vapwile nakulanda” vyuma mutembele. Kaha nawa akatumwine “jimesa javaka-kutambasana jimbongo, navitwamo vyavaka-kulanjisa mayembe.” (Mako 11:15) Ketavishile kala mutu kumbata vyuma vimwe nakupulasana muchipango chatembele nakuvitwala kuchihela cheka munganda kanako.

Mwomwo ika Yesu alingilile vyuma kanevi kuli vaze vapwilenga nakutambasana jimbongo nakulanjisa vimuna natujila mutembele? Ambile ngwenyi: “Uno kavasoneka ngwavo: ‘Zuvo yami navakayivulukanga ngwavo zuvo yakulombela vaka-mafuchi osenako’ nyi? Oloze enu munayitenge kupwa nge wina wakuswama vihwanga.” (Mako 11:17) Yesu avulukile ava vatu ngwenyi vihwanga mwomwo vapwile nakulyapula vatu vaze valanjilenga vimuna vakuhana wana. Yesu amwene ava vatu kupwa vaka-kulyapula, chipwe vihwanga.

Omu vapilishitu vavakulwane, navaka-kusoneka, navilolo veka vevwile vyuma alingile Yesu, vetavilile kulinga vyuma vimwe mangana vamujihe. Oloze chapwile chachikalu kuwana jila yakumujihilamo, mwomwo vatu vavavulu vejilenga kuli ikiye nakumwivwilila.

VaYuleya navatu vakumafuchi eka vaze vapwile mukwitava chavaYuleya vejile kuchiwanyino chaPaseka. Kaha kwapwile navaHelase vaze vejile kuchiwanyino nakulemesa Kalunga. Ava vaHelase vejile kuli Fwilipu, mwomwo pamo yalijina lyenyi lyachiHelase, nakumwihula vamone Yesu. Fwilipu katachikijile mwakulingilako, kaha ayile nakuhulisa Andelei. Hakuwana nge Yesu apwile vene haze hatembele, ngocho Fwilipu naAndelei vayile kuli Yesu nakumulweza chihande kana.

Yesu atachikijile ngwenyi kwasalile makumbi amandende nakufwa, ngocho kasakile kulinga vyuma vize navisuulwisa vatu chipwe kufwila kuya fumako. Akumbulwile vaze vaposetolo jenyi vavali nachifwanyisa, ambile ngwenyi: “Ola yinahete mangana Mwanamutu vamutohwese. Chamuchano vene nangwamba kuli enu ngwami, linona lyatiliku kuvanga liholokele mumavu nakufwa, mokomoko nalipwanga lika linona limwe. Oloze kachi nge nalifwa, nalisemunwina manona amavulu.”—Yowano 12:23, 24.

Linona limwe lyatiliku lyasoloka nge lyamokomoko. Oloze nge vanalitumbu mumavu “nakufwa,” lyeji kusokanga nakukola nakwima manona amavulu. Chochimwe nawa, Yesu apwile mutu umwe wakukupuka, uze alamine kushishika chenyi kuli Kalunga palanga nakukufwa. Kaha kuhichila muli ikiye, vatu vavavulu vaze vakwechi muchima wakulisuula navakatambula kuyoya chahaya myaka yosena. Ngocho, Yesu ambile ngwenyi: “Weshowo azanga mwono wenyi mwaunongesa, oloze weshowo mwahunga mwono wenyi muno mukaye, mwaukinga mangana akapwe nakuyoya chahaya myaka yosena.”—Yowano 12:25.

 Yesu kapwile nakushinganyeka kaha hali iveneko, mwomwo ambile ngwenyi: “Kachi nge mutu mwasaka kunguzachila ami, angukavangizenga, kaha kuze nguli ami, kukiko vene mwapwanga namuka-kunguzachila nawa. Kachi nge mutu mwasaka kunguzachila ami, kaha navamuvumbika kuli Tata.” (Yowano 12:26) Eyi hifweto yayinene chikupu! Vaze vavumbika kuli Ise navakapwanga hamwe naKulishitu muWangana.

Yesu hakutachikiza kuyanjiwa nakulyonyinga chize chapwile nakumuvandamina hakufwa chenyi, ambile ngwenyi: “Jino nguli nakulyonyinga, kaha ngwambenga muka? Ove Tata, ngulwile kuola kaneyi.” Oloze Yesu kapwile nakuchina kutesamo mwayile muchima waKalungako. Ambile cheka ngwenyi: “Chipwe ngocho, ola kaneyi yikiko vene ngwejililile.” (Yowano 12:27) Yesu etavilile vyuma vyosena vize ajinyine Kalunga, kuhakilako vene nakufwa chenyi.