Taloran labi nen Jesus tan saray disipulo to ed Betania manlapu nen sinmabi ra a nanlapud Jerico. Natan, kabkabuasan na Lunes, Nisan 10 et paonla la rad Jerusalem. Narasan lay Jesus. Kanian nen akanengneng na kiew ya igos, inasinggeran to. Wala kasi bunga to?

Mansampot lay Marso, balet say panaoy igos et no Hunyo ni. Asakbay balet iyan nambulong. Kanian inisip nen Jesus ya ompan wala met lay bunga to. Pero anggapo ni manaya. Makapeke so itsura na kiew. Insan inkuan nen Jesus: “Manlapud natan et anggapo lay bungan naala ed sika.” (Marcos 11:14) Nalnes ya tampol so kiew, balet say labay ya ibaga na saya et diad onsublay ya agew ni naamtaan.

Agnambayag, akasabi Jesus tan saray disipulo to diad Jerusalem. Sikatoy linmoob ed templo ya ninengneng to nen imbeneg ya agew. Balet natan et agto labat ninengneng; walay ginawa to, ya mipara ed samay ginawa to taloy taon lay apalabas nen Paskua na 30 C.E. (Juan 2:14-16) Pinapaway to ray “managlako tan managsaliw diad templo.” Imbabalintuag to met iray “lamisaan na saray managsalat na kuarta tan saray yurongan na saray manlalako na malapati.” (Marcos 11:15) Agto anggan inabuloyan so anggan siopa ya man-shortcut ed sular na templo no mangawit na kagawaan to ed arum a pasen.

Akin et mapekder ya ginawa nen Jesus man ed saray managsalat na kuarta tan manlalakoy ayep ed templo? Inkuan to: “Agta nisulat, ‘Say abung ko et natawag ya abung a panagpikasian na amin a nasyon’? Balet ginawa yon ungib na matatakew.” (Marcos 11:17) Tinawag to ran matatakew lapud agaylay bili na panaglako dad saray ayayep ya ibagat. Parad si Jesus, panagtakew iman.

Siempre abalitaan na saray manunan saserdote, eskriba, tan saray lider na totoo imay ginawa nen Jesus, kanian implano da lamet ya pateyen. Balet walay problema da. Agda amta no panon dan pateyen si Jesus ta dakdakel so totoon manmumungkog pian ondengel ed sikato.

Aliwan saray natural ya Judio labat so linmad Paskua, noagta pati saray proselita ya akomberte ed relihyon na saray Judio. Say arum ed sikara et Griego ya linmad piesta pian mandayew. Inmasingger irayad si Felipe, nayarin lapud nainteresan irad Griegon ngaran to, tan tinepet da no nayari dan nanengneng si Jesus. Agsegurado si Felipe no duga kasin minengnengan ira, kanian imbaga tod si Andres. Imbaga dan dua itan ed si Jesus, a nayarin wala nid templo.

Amta nen Jesus ya pigay agew labat et pateyen la, kanian aliwan satan so panaon pian pagustoan so inkamausisa na totoo odino pian magmaliw ya sikat. Angusar na ilustrasyon pian ebatan so duaran apostol, inkuan to: “Sinmabi lay oras pian nigloria so Anak na too. Ibagak ed sikayoy tua, no say sakey a bukel na trigo et agnapelag ed dalin tan agnabulok, mansiansia itan a sakey a bukel, balet no nabulok, manbunga itan na dakdakel.”​—Juan 12:23, 24.

Say sakey ya bukel na trigo et singa anggapoy kana to. Balet no itanem mod dalin tan “nabulok,” ontubo itan, ombaleg, tan manbunga na dakel. Mipadpara, si Jesus et perpekton too. Balet diad panmatoor to anggad patey, nawalaan na bilay ya andi-anggaan so dakel ya mangipanengneng met na singa ontan a panagsakripisyo. Kanian imbaga nen Jesus: “Siopaman a mamapabli ed bilay to et naderal to itan, balet siopaman a mamubusol ed bilay to diad sayan mundo et nasalimbengan to itan parad bilay ya andi-anggaan.”​—Juan 12:25.

 Aliwan sarili labat nen Jesus so nononoten to, ta inkuan to: “Siopaman a manlingkor ed siak et ontumbok ed siak, tan no iner so kawalaan ko et wadman met so lingkor ko. Siopaman a manlingkor ed siak et pagalangan na Ama.” (Juan 12:26) Balbaleg itan a bendisyon! Saramay pagalangan na Ama et nakaiba nen Kristo diad Panarian.

Lapud sankanonot to lay panirap tan ipatey to, imbaga nen Jesus: “Nagogonigon ak natan, tan antoy nepeg kon ibaga? Ama, ilaban mo ak ed sayan oras.” Pero labay nen Jesus ya nagawa so linawa na Dios. Inkuan to ni: “Balet, saya so makasengeg no akin a sinmabi ak ed sayan oras.” (Juan 12:27) Inmabuloy si Jesus ed amin ya gagala na Dios, pati say mismon ipatey to.