Jesús yéetel u disipuloʼobeʼ tsʼoʼok u máanskoʼob óoxpʼéel áakʼab tu kaajil Betania desde ka lukʼoʼob Jericó. Beoraaʼ temprano lunes 10 tiʼ nisán, letiʼobeʼ táan u binoʼob Jerusalén. Baʼaleʼ Jesuseʼ wiʼijchaji. Ka tu yilaj junkúul higoeʼ bin tu yiknal. ¿Baʼaleʼ yaan wa u yich?

Beoraaʼ tu jóokʼbal u mesil marzo, baʼaleʼ le higoʼoboʼ ku kʼantaloʼob tu mesil junio. Kex maʼ u chuk u kʼiinileʼ, le higooʼ piim u leʼ. Le oʼolal Jesuseʼ tu tuklaj yaan táanilbeʼen higoʼob. Baʼaleʼ ka kʼucheʼ tu yileʼ minaʼan u yich. Tumen piim u leʼeʼ tu tuklaj yaan kaʼach u yich. Letiʼ túuneʼ tu yaʼalaj: «Mix bikʼin ka jaantaʼak tu kaʼatéen a wich tumen mix máak» (Marcos 11:14). Tu séebaʼanileʼ le cheʼoʼ káaj u tijil, baʼaleʼ lelaʼ maas chíikpaj tuláakʼ kʼiin.

Maʼ sáam tiʼ leloʼ Jesús yéetel u disipuloʼobeʼ kʼuchoʼob Jerusalén. Letiʼeʼ bin teʼ templo tu yilaj bix yanil le ka lukʼ joʼoljeakeʼ. Baʼaleʼ bejlaʼeʼ maʼ chéen tu kaʼa paktaj utiaʼal u yilik baʼax ku yúuchliʼ, letiʼeʼ tu beetaj jeʼex tsʼoʼok u yáax beetik tu kʼiinil le Pascua tiʼ u jaʼabil 30 (Juan 2:14-16). Tu jóoʼsaj «le máaxoʼob ku koonoloʼob yéetel ku maanoʼob» teʼ templooʼ. Tu walkʼesaj «u mesaʼob le máaxoʼob ku kʼexkoʼob taakʼinoʼ bey xan u kʼáancheʼob le máaxoʼob ku konkoʼob palomaʼoboʼ» (Marcos 11:15). Letiʼeʼ maʼ tu chaʼaj u bisaʼal tumen le máakoʼob tuláakʼ juntséelil le templo utiaʼal ka seguernak u pʼáatloʼoboʼ.

¿Baʼaxten tu jóoʼsaj Jesús le máaxoʼob kʼexik taakʼin yéetel le máaxoʼob konik baʼalcheʼob ichil le templooʼ? Letiʼeʼ ku yaʼalik: «¿Maʼ wa tu yaʼalik le Kiliʼich Tsʼíiboʼ: ‹In wotocheʼ yaan u yaʼalaʼaltiʼ u najil oración utiaʼal tuláakal kaajoʼob›? Baʼaleʼ teʼexeʼ tsʼoʼok a sutkeʼex u kúuchilil u taʼakikuba le j-ookoloʼoboʼ» (Marcos 11:17). Letiʼeʼ tu yaʼalaj «j-ookol» tiʼ le máakoʼob konik le baʼalcheʼoboʼ, tumen jach koʼoj u konkoʼob tiʼ le máaxoʼob kʼaʼabéet u kʼubkoʼob siibaloʼoboʼ. Le oʼolal Jesuseʼ ku yilik bey táan u yookoloʼob yoʼolal le baʼax ku beetkoʼoboʼ.

U nuuktakil le sacerdoteʼob, le escribaʼob yéetel u nuuktakil le judíoʼoboʼ tu yuʼuboʼob le baʼax tu beetoʼ, ka joʼopʼ u maas tuklik u kíimskoʼob. Baʼaleʼ maʼ chéen chʼaʼabil jeʼel u páajtal u beetkoʼobeʼ. Tumen yaʼab máakoʼob yanoʼob yiknal utiaʼal u yuʼubikoʼob baʼax ku kaʼansik.

Maʼ chéen le judíoʼob taaljaʼanoʼob utiaʼal u kʼiinbesajil le Pascuaoʼ, baʼaxeʼ tak le j-táanxel luʼumiloʼob u kʼammoʼob u religión le judíoʼoboʼ. Tiaʼan tak le griegoʼoboʼ. Letiʼobeʼ tu natsʼubaʼob yiknal Felipe, maʼ xaaneʼ tumen u kʼaabaʼeʼ griego, ka tu yaʼaloʼobtiʼ taak u yilkoʼob Jesús. Maʼ xaaneʼ Felipeeʼ maʼ jach u yojel wa maʼalob ka u natsʼubaʼob yiknal Jesusiʼ, le oʼolal tu yaʼalaj tiʼ Andrés. Ka binoʼob tu kaʼatúulaloʼob u yaʼaloʼob tiʼ Jesús, maʼ xaaneʼ letiʼeʼ láayliʼ tiʼ yaan ichil le templooʼ.

Jesuseʼ u yojel chéen wa jaypʼéel kʼiinoʼob ku bineltik u kíimil, le oʼolal minaʼan tiempo tiʼ chéen utiaʼal ka xiʼik ka ilaʼak tumen uláakʼ máakoʼob. Letiʼeʼ tu yaʼalaj junpʼéel kettʼaan tiʼ le kaʼatúul apostoloʼoboʼ: «Tsʼoʼok u kʼuchul u yorail utiaʼal u nojbeʼenkúuntaʼal u Paal máak. Jach tu jaajil kin waʼalikteʼex: Wa maʼ tu lúubul luʼum u neekʼ le trigooʼ yéetel wa maʼ tu kíimileʼ, chéen junpʼéeliliʼ neekʼ kun pʼáatal; baʼaleʼ wa ku kíimileʼ yaan u yaʼabtal u yich» (Juan 12:23, 24).

Chéen junpʼéel u neekʼ trigoeʼ bey mix baʼaleʼ, chéen baʼaleʼ wa ku paʼakʼaleʼ ku «kíimil» utiaʼal u jóokʼol yéetel u nojochtal junkúul trigo, ken kʼuchuk u kʼiinileʼ ku tsʼáaik u maasil neekʼoʼob. Jesús xaneʼ chéen letiʼ tu juunal minaʼan u kʼeban way Luʼumeʼ. Baʼaleʼ wa ku kíimil chúukaʼan u yóol u meyajt Dioseʼ, yaan u tsʼáaik u páajtalil u yantal kuxtal minaʼan u xuul tiʼ yaʼab máakoʼob. Le oʼolal tu yaʼalaj: «Le máax u yaabiltmaj u kuxtaleʼ ku xuʼulsiktiʼ, baʼaleʼ le máax u pʼekmaj u kuxtal teʼ yóokʼol kaabaʼ, yaan u kanáantik utiaʼal le kuxtal minaʼan u xuuloʼ» (Juan 12:25).

Jesuseʼ maʼ chéen tu yoʼolal ku tuukuliʼ, le oʼolal tu yaʼalaj: «Wa yaan máax u kʼáat u meyajteneʼ, taalak  tin paach, le tuʼux kin antaleʼ tiʼ xan kun antal le máax meyajtikenoʼ. Wa yaan máax u kʼáat u meyajteneʼ yaan u kʼamik utsiloʼob tiʼ le Taataoʼ» (Juan 12:26). ¿Máasaʼ jach jatsʼuts lelaʼ? Tuláakal le máaxoʼob kun múuchʼ meyajoʼob yéetel Cristooʼ yaan u múul gobernaroʼob tu yéetel teʼ Reinooʼ.

Yoʼolal le baʼax ken u muʼyajt Jesusoʼ tu yaʼalaj: «Beoraaʼ péeknajaʼan u yóol in puksiʼikʼal. ¿Baʼax túun ken in waʼale? In Yuum, salvarten tiʼ le muʼyajil kun taal tin wóokʼolaʼ». Baʼaleʼ Jesuseʼ maʼ táan u tsʼíiboltik maʼ u béeytal le baʼax u yaʼalmaj Diosoʼ. Letiʼeʼ tu yaʼalaj: «Baʼaleʼ yoʼolal le jeʼel taaljaʼanenaʼ» (Juan 12:27). Jesuseʼ u kʼáat u beet tuláakal le baʼax ku yaʼalik Diosoʼ, kex ka yanak u kíimil tu yoʼolal.