Yésus a kobô ajô awu da yange nye a too temple, e môse mondé ya Ngone Nisan 10. Mbôle nlem ô tyele nye yôp amu jam ete da ye nambe éyôlé Zambe, nde Yésus a jô na: “A Tat, wumu’u jôé dôé.” Ane beta tyiñ a so yôp a jô’ô na: “Me maneya wumu de, me aye beta wumu de.”​—Jean 12:27, 28.

Bôt be ne valé be ne fe’e ne vema. Abui da simesane na, a ne zo’oyañ nje ja bam. Bevo’o ba jô na: “Ange a te kobô nye.” (Jean 12:29) Ve Yéhôva émien nnye be ndôme wô’ô a kobô’ô valé! A fe na, sa ke éyoñ ôsu le bone be bôte ba wô’ô tyiñe Zambe é kobô’ô a Yésus.

Mimbu milal a étun mvus, éyoñe Yésus a nga duban, Jean Baptiste a nga wô’ô Zambe a jô’ô a lat a Yésus na: “Nyina a ne Mone wom me anye’e, me lô nye mvaé.” Akôlô ya valé, mvuse Pâque ya mbu 32 É.J., Yésus a nga veñesan a tele Jacques, Jean a Pierre ôsu. Bôte bete belal be nga wô’ô Zambe a jô’ô na: “Nyina a ne Mone wom me anye’e, me ayene nye mvaé; vô’ôla’ane nye.” (Matthieu 3:17; 17:5) Ve éyoñe ji, éyoñe lale ji, Yéhôva a kobô aval é ne na abui bôt é wô’ô nye!

Yésus a jô na: “Tyiñe nyô é nji so amu ajô dam, ve amu ajô denan.” (Jean 12:30) A ne ndeme ja liti na a ne fo’o Mone Zambe, Messie be nga ka’ale.

Jam da dañ e ne na, ényiñe Yésus ja te liti bone be bôte mbamba éve’ela ya tôñ, a yemete fe na Satan Diable, njôô ya émo ji, a yiane vas. Yésus a jô na: “Éyoñe ji ntyi’an ajô si nyô ô soya: éyoñe ji njô bôte ya si nyô a ye vas.” Awu Yésus a zu wu da ye ke yené ane a ne nkuan, ve ndañan. A zene fé? A jô na: “A ma, nge be abete me si nyô, me aye dutu bôte bese be zu be ma.” (Jean 12:31, 32) A zene ya awu dé élé yôp, Yésus a ye dutu bone be bôt be nye, a ve be fane ya bi ényiñe ya nnôm éto.

Nsamba bôt wo yalane Yésus a lat a ajô ya ‘mbetane’ na: “Bi bi nga wôk e kalate metiñe na Krist a ye langan a too e nnôm éto, ve wô wo jô aya na Mone Môt a yiane beteban e yôp? Mone Môt ate a ne za?” (Jean 12:34, Mfefé Nkôñelan) Akusa bo abui mendem, ja’a tyiñe Zambe bebiene be nga wôk, abui da tu’a ke buni na Yésus nnye a ne fo’o Mone môt, Messie be nga ka’ale.

Aval a mbe a tatéya bo, Yésus a liti na a ne ‘éfufup.’ (Jean 8:12; 9:5) Nde a ve jama bôte melebe ma: “Éfufup é ngenane be mia ôbe nté. Wula’an éyoñ éfufup é ngenane be mia, dibi e za koane mia . . . Éyoñ éfufup é ngenane be mia, buna’an éfufup éte, ajô te nde mi aye bo bone ya éfufup.” (Jean 12:35, 36) Mvuse ya valé, Yésus a kôlô a ke amu môse Nisan 10 ô nji bo wu a yiane wu. A ne e Pâque ya Ngone Nisan é too melu 14 nje ba ye ‘tyele nye élé yôp.’​—Begalate 3:13.

Nté ôse Yésus a te bo ésaé nkañete jé, Bejuif be nji kui na be buni nye, a jam ete da liti fo’o ne ngeññ na nkulan ajô wo te tôéban. Nkulu mejô Ésaïe a nga jô na mis me bôte ma ye ke kui na me yen a na, minleme miap mia ye bo ayet aval e ne na ba ye ke kôñelan minlem a saéban. (Ésaïe 6:10; Jean 12:40) Ôwé, abui Bejuif da vañe fo’o bene mendem ma liti na Yésus a ne Nkôté be nga ka’ale, a zene ya bi ényiñ.

Nicodème, Joseph môte ya Arimathée, a abui bejô bôt befe, ‘be nga buni Yésus.’ Ve ye ba ye fo’o liti mbunane wop a mimboon, nge na ba ye kate bo de amu woñe ya na be titane be synagogue, nge amu na ba “nye’e duma de aso be bôt”?​—Jean 12:42, 43.

 Yésus émien a kate jam da tinane na môt a liti mbunan be nye a jô’ô na: “E môt a buni ma, a nji buni [ve] ma, a buni [fe] môt a nga lôme ma. A nyô a yene ma a yene [fe] Nyô a nga lôme ma.” Benya mejôô Zambe a nga ve Yésus na a ye’ele, a ma Yésus a k’ôsu a ye’ele me n’angôndô ya mfi aval ane émien a jô na: “E nyô a bene ma, teke nyoñe minjôane miam, a bili môt a tyi’i ajô dé: Mejô me maneya kobô, e me ma ye tyi’ajô môt ate e môs y’asu’ulan.”​—Jean 12:44, 45, 48, Mfefé Nkôñelan.

Yésus a ke suu nkobô a jô’ô na: “Amu me nji kobô mejô mam mamien; ve Tate a nga lôme ma, émien a nga tiñeti ma ane me aye kobô, a mejô me aye jô. Me ayeme fe na atiñe dé e ne ényiñ ya melu mese.” (Jean 12:49, 50) Yésus a yeme na, ana’ana a mbeme sôé metyi mé ane metuna’a asu abui bôte da buni nye.​—Beromain 5:8, 9.