Ntɛnɛlon na, Nisankalo tile 10nan na, Yezu y’a fɔ Alabatoso kɔnɔ ko ale satuma surunyana. O koo bena nɔɔ min to Ala tɔgɔ kan, a be jɔrɔla o le la. O kama a y’a fɔ ko: “N Faa, i k’i yɛrɛ tɔgɔ boɲa!” Kumakanba dɔ bɔra sankolo la k’a fɔ ko: “Ne y’a boɲa, ne bena tila k’a boɲa tugu.”—Zan 12:27, 28.

Mɔgɔ minw be yen, olu kabakoyara. Dɔw y’a miiri k’u ye sanpɛrɛnkan lo mɛn. Dɔ wɛrɛw ko “mɛlɛkɛ dɔ le kumana a fɛ.” (Zan 12:29). Nka, u ye Jehova kumakan lo mɛn ten! Kabini Yezu y’a ka cidenya baara daminɛ, a siɲɛ fɔlɔ tɛ adamadenw be Ala kaan mɛnna.

Saan saba ni tilan ka kɔn o ɲɛ, Yezu ka batɛmu tuma na, Zan Batizelikɛla y’a mɛn Ala y’a fɔ Yezu koo la ko: “Nin ye ne Denkɛ kanulen ye. A ko ka di ne ye haali.” Kɔfɛ, saan 32 ka Tɛmɛnkan seli kɔ, Yezu cogo yɛlɛmana Zaki, Zan ani Piyɛri ɲɛɛ na. O cɛɛ saba nunu ye Ala kumakan mɛn ko: “Nin ye ne Denkɛ kanulen ye, a ko ka di ne ye haali. A’ ye a lamɛn.” (Matiyo 3:17; 17:5, ABM). Nka a siɲɛ sabanan nin na, Jehova kumana fɔɔ mɔgɔ caaman y’a mɛn!

Yezu ko: “Kumakan min mɛnna, o ma kɛ ne kosɔn, a kɛra aw le kosɔn.” (Zan 12:30). O kumakan b’a yira ko Yezu ye Ala Dencɛ ye tiɲɛn na, ale lo ye Masiya ye, min koo tun fɔra.

Ka fara o kan, Yezu ye kantigiya kɛ a ka ɲɛnamaya bɛɛ la. O b’a yira ko adamadenw ka ɲi ka ɲɛnamaya kɛ o cogo la le. O b’a yira fana ko duniɲa nin ka kuntigi, o min ye Sutana ye, a ka ɲi ka halaki. Yezu ko: “Diɲɛ kitiwaati sera sisan yɛrɛ, diɲɛ nin kuntigi bena gwɛn ka bila kɛnɛma.” Yezu ka saya tɛna kɛ fagobagatɔya ye dɛ, nka o bena kɛ see sɔrɔli lo ye. Cogo di do? A yɛrɛ y’a ɲɛfɔ ko: “Ne kɔni, ni ne kɔrɔtara sanfɛ tuma min na, ne bena mɔgɔ [sifa] bɛɛ sama ka na n fɛ.” (Zan 12:31, 32). A ka saya barika la gwengwenyiri kan, Yezu bena mɔgɔw sama ka na a yɛrɛ fɛ. O kɔrɔ ko a bena sababu di u ma u ka ɲɛnama kɛ fɔɔ abada.

Jama y’a jaabi ko: “An y’a mɛn sariya la ko Ala ka Mɔgɔ wolomanin nin bena to yen kudayi, e do b’a fɔ cogo di ko Mɔgɔ Dencɛ ka kan ka kɔrɔta sanfɛ? Jɔn le y’o Mɔgɔ Dencɛ ye?” (Zan 12:34). Koo caaman y’a yira ko Yezu lo ye Mɔgɔ Dencɛ ye tiɲɛn tiɲɛn na ani ko ale lo ye Masiya ye. Ala yɛrɛ kumakan fana y’o lo yira. O bɛɛ n’a ta, mɔgɔw fanba ma sɔn a ma.

I ko a tun delila k’a fɔ cogo min na, Yezu y’a fɔ ko ale yɛrɛ lo ye “yeelen” ye (Zan 8:12; 9:5). A ye jama ladi ko: “Yeelen b’aw cɛma yanni dɔɔni halibi. Tuma min na o yeelen b’aw cɛma, aw ka banba ka taama o yeelen nin na, janko suu kana ko ka bali aw la, bari mɔgɔ min be taama dibi la, o tigi t’a taayɔrɔ lɔn. Tuma min na yeelen b’aw cɛma, aw k’aw jigi la a kan, janko aw ka se ka kɛ mɔgɔ kɔnɔgwɛninw ye.” (Zan 12:35, 36). O kɔ, Yezu y’a mabɔ u la sabu Nisankalo tile 10nan tɛ a salon ye. A ka ɲi ka “kɔrɔta sanfɛ” Nisankalo tile 14nan na, Tɛmɛnkan seli tuma na: o kɔrɔ, a ka ɲi ka sa gwengwenyiri kan.—Galatikaw 3:13.

Kabi Yezu y’a ka cidenya baara daminɛ, Yahutuw ma limaniya a la. O koo be kiraya kuma dɔ lo dafara, siga t’o la. Kira Ezayi tun kɔnna k’a fɔ ko mɔgɔw ɲɛɛw bena nɔrɔ ani ko u dusukunw bena gwɛlɛya fɔɔ u tɛna u sɔɔn yɛlɛma walisa ka kɛnɛya (Ezayi 6:10; Zan 12:40). Tiɲɛn na, dalilu minw b’a yira ka gwɛ ko Yezu lo ye Kisibaga ni ɲɛnamaya sira ye, Yahutuw fanba y’u tulo gwɛlɛya ka ban u la.

Nikodɛmu, Yusufu min bɔra Arimate ani kuntigi caaman wɛrɛw “lara” Yezu la. Nka, yala u bena u ka limaniya yira u ka kɛwalew fɛ wa? Wala u bena sigasiga k’o kɛ sabu u be siran k’u bena u gwɛn ka bɔ batoso la, wala “adamaden ka boɲa” lo ka di u ye wa?—Zan 12:42, 43.

 Ka limaniya Yezu la, Yezu yɛrɛ y’o kuma kɔrɔ ɲɛfɔ ko: “Ni mɔgɔ min lara ne la, o tigi ma la ne dama na, nga Ala min ye n ci, a lara ale la, ani mɔgɔ min ye ne ye, o tigi ye n cibaga fana ye.” Ala ye cii di Yezu ma ko a ka mɔgɔw kalan tiɲɛnko minw na, Yezu tora k’u weleweleda. U nafa ka bon haali! O kama, Yezu y’a fɔ ko: “Mɔgɔ min banna ne la ani a ma sɔn n ka kuma ma, o tigi kitibaga be yen, n ye kuma min fɔ, o le ben’a tigi kiti diɲɛ labanlon na.”—Zan 12:44, 45, 48.

O kɔ, Yezu y’a ka kumaw kuncɛ ko: “Ne ma kuma n yɛrɛ ma, nga n Faa min ye n ci ka na, ne ka kan ka kuma minw fɔ, ale lo y’o fɔ n ye. Ani ne b’a lɔn ko nii [ɲɛnamaya] banbali be sɔrɔ o kuma nin barika la.” (Zan 12:49, 50). Yezu b’a lɔn ko yanni dɔɔni, a joli bena bɔn ka kɛ saraka ye mɔgɔ limaniyaninw kosɔn.—Ɔrɔmukaw 5:8, 9.