Ni menan Iesu n te tembora n te Moanibong n Nitian 10 ao e taekina matena are e a uakaan. E tabeaianga bwa tera aron rotakin taekan te Atua iai ao e taku: “Tamau, neboa aram.” E kaeka te bwanaa ae korakora mai karawa ni kangai: “I a tia n neboia ao N na manga neboia riki.”​—Ioane 12:​27, 28.

A mino aia iango aomata ake a mena ikekei. A iangoia tabeman bwa a ongo rebwen te baa ao a taku ake tabeman: “E taetae te anera nakoina.” (Ioane 12:29) Ma bon Iehova are a ongo bwanaana! Ao tiaki aio te moantai ae e ongo te aba iai bwanaan te Atua ibukin Iesu.

N taini bwabetitoan Iesu tenua ao te iterana te ririki n nako, ao e ongo bwanaan te Atua Ioane te tia Bwabetito ae kangai ibukin Iesu: “Bon Natiu ae I tangiria teuaei, ae I kakatonga irouna.” Rimwi riki imwin te Toa ae te Riao n 32 C.E., e a onikaki Iesu i mataia Iakobo, Ioane ao Betero. A ongo bwanaan te Atua naaka teniman aikai ae kangai: “Natiu ae I tangiria teuaei, ae I kakatonga irouna, kam na ongo irouna.” (Mataio 3:​17; 17:5) Ma ai te katentai aei are e a taetae iai Iehova n te aro ae a kona n ongo aomata aika bati!

E taku Iesu: “E roko te bwanaa aei tiaki ibukiu, ma ibukimi.” (Ioane 12:30) Bon te bwai ni kakoaua bwa bon Natin te Atua ngaia, ae te Mesia are beritanaki.

Ma e kaotaki ni kakaonimakin Iesu ni maiuna te aro ae a riai ni maiuakinna aomata, ao kakoauaan naba ae e bon tau ni kamateaki Tatan te Riaboro ae te tia tautaekania kaain te aonnaba. E taku Iesu: “Iai motikan taekaia kaain te aonnaba aei. E na kabwakaaki te tia tautaeka i aoia kaain te aonnaba aei.” Te mate are e nang rinanona Iesu tiaki nanona bwa e taenikai iai ma bon te tokanikai. N te aro raa? E kabwarabwaraa ni kangai: “Ngkana I a tauraki, ao N na katikiia aomata n aekaia nako nakoiu.” (Ioane 12:31, 32) E na katikiia Iesu aomata nakoina ni matena i aon te kai, ni kauka iai te kawai nakon te maiu are aki toki.

Ma a taku te koraki ni kaineti ma ana taeka Iesu ibukin ‘taurakina’: “Ti ongo man te Tua bwa e na teimatoa n aki toki te Kristo. Ma ko kangaa n taku bwa e na tauraki Natin te aomata? Antai teuane Natin te aomata?” (Ioane 12:34) A aki kakoauaa angia aomata ae Iesu bon Natin te aomata ae te Mesia are beritanaki, e ngae ngke a bati bwaai ni kakoaua, n ikotaki naba ma bwanaan te Atua are a ongo.

N aron are e karaoia Iesu mai mwaina, e a manga taekinna naba bwa “te oota” ngaia. (Ioane 8:​12; 9:5) E kaungaia te koraki ni kangai: “Ai tii teutana riki ana tai te oota ni mena i buakomi. Nakonako ngkai iai te oota iroumi, bwa e aonga n aki taoningkami nako te rotongitong. . . . Ngkai iai iroumi te oota, ao onimakina te oota bwa kam aonga n riki bwa natin te oota.” (Ioane 12:35, 36) E a otinako ngkanne Iesu ibukina bwa tiaki Nitian 10 are e riai ni mate iai. Bon Nitian 14 are e riai n “tauraki” iai ni bobitiaki i aon te kai.​—I-Karatia 3:13.

N ururingan ana mwakuri ni minita Iesu, e oti raoi bwa e kakoroaki bukin te taetae ni burabeti ngke a aki onimakinna I-Iutaia. E taetae ni burabetinna Itaia bwa a na kamatakiaki aomata ao e na matoatoa nanoia, n te aro are a aikoa kona n rairaki bwa a na kamarurungaki. (Itaia 6:10; Ioane 12:40) Eng, a nanomatoa angia I-Iutaia n rawa ni kakoauaa ae Iesu bon aia tia Kamaiu are beritanaki, ae te kawai nakon te maiu.

A ‘onimakina’ Iesu Nikotemo, Ioteba ae te I-Arimataia ao taani kairiri riki tabeman. Ma a na mwakuria aia onimaki ke a na aki tao ibukini maakakin ae a na kabaneaki man te tinakoka ke ibukina bwa a ‘tangira kamoamoaaia irouia aomata’?​—Ioane 12:​42, 43.

E kabwarabwaraa Iesu bwa tera ae e irekereke ma onimakinana ngke e kangai: “Ane e onimakinai ao e aki onimakinai n tii ngai, ma e onimakina naba teuare kanakomaiai, ao ane e norai ao e nora naba Teuare kanakomaiai.” A rangi ni kakawaki koaua ake e tua te Atua nakon Iesu bwa e na angareirei iai ake e teimatoa n tataekin, n te aro are e a kona ni kangai: “Ane e rawa irou ao e aki kawakin au taeka, ao bon iai ae e na motika taekana. E na motika taekana n te kabanea ni bong, te taeka, are I a tia n taekinna.”​—Ioane 12:​44, 45, 48.

E motikia ngkanne Iesu ni kangai: “I aki taetae i bon irou, ma e tuangai au taeka ae N na taekin ao N na atong, te Tama are e kanakomaiai. Ao I ataa naba ana tua bwa e nanonaki iai te maiu are aki toki.” (Ioane 12:​49, 50) E ataia Iesu bwa e a kaan te tai ae e na kawawaea iai raraana n anga maiuna ibukia aomata ake a onimakinna.​—IRom 5:​8, 9.