Yesũ nĩwaumie Yelusaleme asyoka Vethania Wakwambĩlĩlya mũthenya. Vethania yaĩ ngalĩko ya wumĩlonĩ wa syũa kĩvaũũkonĩ kya Kĩĩma kya Mĩthata. Nĩvatonyeka ũkethĩa akomie kwa anyanyae Lasalo, Meli, na Matha.

Yesũ na amanyĩw’a make maĩ nzĩanĩ masyokete Yelusaleme ĩngĩ kwakya matukũ 11, mwei wa Nisani. Ũsu nĩw’o waĩ mũthenya wake wa mũthya kũthi ĩkalũnĩ. O na nĩw’o waĩ mũthenya wake wa mũthya wa kũtavany’a. Mũthenya ũsu nĩwatanĩie mboka ya Vasaka, ambĩĩsya mũvango wa kũlilikana kĩkw’ũ kyake, na ĩndĩ aisilĩlwa na ooawa.

Me nzĩanĩ ĩla yĩ Kĩĩmanĩ kya Mĩthata maumĩte Vethania maendete Yelusaleme, Vetelo nĩwoonie ũla mũkũyũ waumanĩĩtwe nĩ Yesũ ĩyoo yake kwakya. Yĩla woonie mũkũyũ ũsu, Vetelo aisye: “Lavai, sisya! ũla mũkũyũ ũnaumanĩie nĩwũmie.”—Maliko 11:21.

Nĩkĩ Yesũ watumie mũkũyũ ũsu wũma? Nĩwawetie kĩtumi kya kwĩka ũu yĩla waisye: “Nĩ w’o nĩngũmwĩa, ethĩwa mwĩ na mũĩkĩĩo na mũi na nzika, o na eka kwĩka ũndũ neekana na mũkũyũ ũũ, mũkeea kĩĩma kĩĩ, ‘Ũkĩla ũkalike ũkanganĩ,’ na vakeethĩwa ũu. Na syĩndũ syonthe ila mũkavoya mwĩ na mũĩkĩĩo, mũkakwata.” (Mathayo 21:21, 22) Kwoou, Yesũ atũngĩlĩlaa ũndũ ũla wamatavĩtye vau mbeenĩ kana mũĩkĩĩo no ũthamye kĩĩma.—Mathayo 17:20.

Kwondũ wa ũu Yesũ atumie mũkũyũ ũsu wũma nĩ kana amamanyĩsye aitũmĩa ngelekany’o mamyene nĩ kana mamanye nĩmaĩle kũmũĩkĩĩa Ngai. Aeleetye ũũ: “Syĩndũ syonthe ila mwĩvoya na kwĩtya, ĩthĩwai na mũĩkĩĩo kana nĩmũikwatĩte, na mũkeethĩwa nasyo.” (Maliko 11:24) Ngelekany’o ĩsu yamanyĩisye aatĩĩi onthe ma Yesũ ũndũ wa vata mũno! O na waĩ ũndũ mũseo, na mũno mũno, kwa atũmwa asu nũndũ maĩ vakuvĩ kũkwatwa nĩ matatwa momũ. O na eka ũu, kũma kwa mũkũyũ ũsu ve ũndũ ũngĩ kwakonanĩtye na kwĩthĩwa na mũĩkĩĩo.

O ta ũndũ mũkũyũ ũsu woonekaa ta ũsyaĩte, now’o mbaĩ ya Isilaeli yailye. Nĩkĩ? Nũndũ andũ ma mbaĩ ĩsu maĩ na ũtianĩo na Ngai, na kwoou maĩ matonya kwoneka ta maatĩĩaa Mĩao yake. Ĩndĩ andũ asu mayaĩ na mũĩkĩĩo o na mayaĩ na ũsyao mũseo. O na nĩmamũleile Mwana wa Ngai! Na kwoou yĩla Yesũ watumie mũkũyũ ũsu wũma, endaa kwonany’a kĩla kĩkakwata mbaĩ ĩsu ĩte na ũsyao na ĩte na mũĩkĩĩo.

Ĩtina wa ĩvinda ĩkuvĩ, Yesũ na amanyĩw’a make nĩmavikie Yelusaleme. Yesũ nĩwaendie ĩkalũnĩ na ambĩĩa kũmanyĩsya o tondũ weekaa. Nĩvatonyeka ũkethĩa anene ma athembi na atumĩa masũanĩaa ũndũ ĩyoo yake Yesũ weekanĩte na andũ ala mavunzasya mbesa, na kwoou matw’a kũmũkũlya ũũ maimũvĩnga: “Wĩkaa maũndũ aa na ũkũmũ mwaũ? Kana nũũ ũkũnengete ũkũmũ wa kwĩka maũndũ aa?”—Maliko 11:28.

Nake Yesũ amasũngĩa: “Nĩmũkũlya ĩkũlyo yĩmwe. Nzũngĩei, na nĩngũmũtavya nĩkaa maũndũ aa na ũkũmũ mwaũ. Ũvatiso wa Yoana waumĩte ĩtunĩ kana waumĩte kwa andũ? Nzũngĩei.” Avĩnganĩsya make mayaĩ matonya kũsũngĩa. Athembi na atumĩa nĩmambĩĩie kũneenany’a ene kwa ene maikũlany’a memũsũngĩa ata. Maasya: “Twasya, ‘Waumĩte  ĩtunĩ,’ etũkũlya, ‘Nĩkĩ mũtaamũĩkĩĩa?’ Ĩndĩ twasya, ‘Waumĩte kwa andũ,’ vethi ata?” Masũanĩaa ũu nũndũ nĩmakĩaa ĩkomano nĩkwĩthĩwa ĩkomano “yonthe yaĩkĩĩaa kana Yoana kwa w’o aĩ mwathani.”—Maliko 11:29-32.

Ala mamũvĩngaa Yesũ mayaĩ matonya kũsũngĩa ũsũngĩo waĩle. Kwoou masya: “Tũyĩsĩ.” Nake Yesũ amea: “O nakwa ndimũtavya nĩkaa maũndũ aa na ũkũmũ mwaũ.”—Maliko 11:33.