Kina Kiamosi kuna masika, Yesu okatukidi muna Yerusaleme, ovutukidi kuna Betania, kuna este ya Mongo a Olive. Oluakidi muna nzo ya akundi andi Lazaro, Maria yo Mareta, i mûna kalele.

O kuma kukiele, o unu i lumbu kia 11 kia ngonde ya Nisani. Yesu ye alongoki andi bavutukidi diaka kuna Yerusaleme. Owau i nkumbu a nsuka o Yesu ke kuenda muna tempelo. Ekiaki i lumbu kiansuka kia salu kiandi vitila kadia e Nduta, yo sikidisa Luyindulu lwa lufwa lwandi, i bosi kemwesa e mpasi yo vondwa.

Wau baviokele Mongo a Olive mu kuenda kuna Yerusaleme, Petelo omwene o nti a nsanda una Yesu kasibidi mazono. Ovovese Yesu vo: “E Rabi, tala o nti a nsanda una osibidinge, uvuidi yuma.”—Maku 11:21.

Ekuma Yesu kayumisa o nti wau? Yandi kibeni ovene mvutu, oku vo: “Kieleka inuvovese wo vo, avo luna ye lukwikilu yo lembi kakitisa, ke nuvanga kaka dina mpangidi muna nsanda ko, kansi avo nuvovese mpe o mongo wau vo, ‘Katuka yo tubwa muna mbu,’ ediadi divangama. Mawonso nulomba muna sambu, avo nwina yo lukwikilu, nutambula mo.” (Matai 21:21, 22) Yesu ovutukidi e diambu kateka vova vo o lukwikilu lulenda yalula o mongo.—Matai 17:20.

Ozevo, wau kayumisi o nti a nsanda, Yesu osongele o mfunu wakwikila muna Nzambi. Ovovele vo: “Yawonso nulomba muna sambu, nukwikila vo nutambwidi yo, nukala yau.” (Maku 11:24) Ekwe longi diamfunu kwa awonso belandanga Yesu! E longi diadi mfunu kikilu dina kwa antumwa, kadi ke kolo ko mambu mampasi mekubalwakila. Vena ye longi diankaka muna nti a nsanda uyumini yo lukwikilu.

Nze nti a nsanda wau, e zula kia Isaele kimonekene vo lukwikilu bena lwau, kinga nkatu kwandi. E zula kiaki bakanga e kangu yo Nzambi, bemonekanga nze yau belemvokelanga Nsiku a Nzambi. Kansi, e zula kiawonso kisongele vo ke bena yo lukwikilu ko yo lembi yima e mbongo. Bavezele nkutu o Mwan’a Nzambi! Ozevo, o Yesu osibidi o nti a nsanda muna songa una ukala e mfoko a zula kiaki kia kondwa lukwikilu yo lembi yima mbongo.

Yesu ye alongoki andi basimbidi e nzila, balueke muna Yerusaleme. Wau vo i fu kiandi, Yesu wele muna tempelo, oyantikidi longa. Nganga zambuta ye mbuta za nkangu, batomene zaya mana Yesu kavangidi mazono kwa mimbudi a nzimbu. Dianu vo, bayuvuidi Yesu, oku vo: “Mu nkia wisa ovangilanga mambu mama? Yovo nani uvene wisa kiavanga mambu mama?”—Maku 11:28.

Yesu ubavutwidi vo: “Diambu ikunuyuvula. Numvutula, ozevo mono mpe ikunuvovesa kana mu nkia wisa ivangilanga mambu mama. E mvub’a Yoane, ku zulu yatuka yovo kwa wantu? Numvutula.” Bayantikidi vovaziana, oku vo: “Avo tuvovele vo, ‘Ku zulu,’ okutuyuvula vo, ‘Ekuma nwalembi kunkwikidila?’ Nga twavova vo, ‘Kwa wantu e’?” Bamwene ndonga wonga, kadi yau awonso bekwikilanga vo Yoane ngunza kikilu kakala.”—Maku 11:29-32.

Atantu a Yesu ke bamwene mvutu za sikila ko. Bavutwidi Yesu vo: “Ke tuzeye ko.” Yesu ubavovese vo: “Omono mpe kikunuvovesa ko kana mu nkia wisa ivangilanga mambu mama.”—Maku 11:33.