Muciposa co madeko, Jesu anobuda mu Jerusarema ecihwirira ku Bhetania ngo kumabvazuva ko Dundhu ro Maorivhe. Kangaije wakapeja usikuho ari pa muzi pa Razaro, Marita na Maria shamwari jake.

Comangwanafumi, mu dhiya yo 11 ya Nisani, Jesu no vajiji vake vanoendazve ku Jerusarema. Hunova hwendo hwo kupejisira hwo kwenda mu themberi. Zve i dhiya yo kupejisira yo mushando wake wo kucumaera pakazara vandhu, acito aceukija Phasika, acito aita ciceukijo co kufa kwake zve acito atongwa no kuurawa.

Pavanobva ku Bhetania, vanofamba ngo Mutundhu wo Maorivhe, vecienda ku Jerusarema, Pedhru anovona muti wakatukwaya ndi Jesu zuro co mangwanani. Iyena anoti: “Mujijisi. Ringisanyi mukuyu wo makatuka, waoma.”—Marco 11:21.

Ngenyi Jesu wakaomesa mukuyu uwu? Iyena anonanga caakazviitira eciti: “Bzokadi ndinomubvunja kuti mukatenda mucingarangariji, amuzoiti ibzi no mukuyu basi, kaveta mukabvunja dunthu iri kuti: ‘Ibvai apo, jikhandirei mu jombe’ bzinozoitika. Mukakumbira bziribzese mecitenda, munozopuwa.” (Mateu 21:21, 22) Ngo magama aya Jesu wainga eciphinda zvaainga akambonanga ngo pamusoro po kuti rutendo hunokwanisa kubvita dundhu kakuriimisa pamweni.—Mateu 17:20.

Paanoomesa mukuyu, Jesu wainga ecipekeja cijijo cinoshanda ngo pamusoro pokuti kuva no rutendo kunosisira maningi. Iyena wakati: “Bzese bzo munokumbira mecinamata, tendanyi kuti munozopuwa no kubziaxira.” (Marco 11:24) Ici i cijijo cinosisira maningi ku vateveri vese va Jesu. Zve zvinosisira maningi kuno vapostori ngo pamusoro po muejo javanozosongana najo. Kuoma ko mukuyu, kunopekeja cijijo cimwenizve ngo pamusoro po rutendo.

Kutojana no mukuyu, vaIziraeri vainga vanomavonekere o ciphameso. Jinja ro vaIziraeri rino citenderano na Mwari zve zvingatoitisa kuti ivona vanozwira maningi Mutemo. Asi, jinjero rese, rinovonesa kuti arina rutendo nee aribari mucero. Vanotoramba Mwana wa Mwari. Ngo kudaro, Jesu paanoomesa mukuyu ucikabari uwu, wainga ecitatija muviyo unozova no vaIziraeri vokutama rutendo no mucero.

Avazivi kunonoka maningi, Jesu no vajiji vake vanoguma ku Jerusarema. Inga cirovejeso, Jesu anoenda mu themberi zve wotanga kujijisa. Vapiri vakuru no vatungamiriri vo vandhu, kangaije vainga vecirangarira zvakaitaya Jesu zuro ku vandhu vaitengesa zviro muthemberi, vanotanga kumushora veciti: “Unoita ibzo ngo muthetho wa ani? Ndiani wakupa muthetho wo kuita bzakadaro?”—Marco 11:28.

Jesu anoti: “Ininivo ndinomubvunjisa ciro cimwe. Mukandidavira, inini ndinozomubvunjavo kuti ndinoita bziro ibzi ngo muthetho wa ani. Rubapatizo hwa Johani hwainga hwo mugore, nokuti hwo vandhu? Ndidavirenyi.” Wari vatanga shwiro iri kuvaphindukira! Vapiri no vakuru vobvunjisana kuti vawane manera o kupingura veciti: “Tikananga kuti hwainga hwo mugore, yena anozotibvunjisa kuti: ‘Waro, makatama ngenyi kuhutenda’? Ngatinange kuti nghwa vandhu?” Ivona vainga vecirangarira kudari ngo kuti vaithya mbhungano ngo kuti vese “vairangarira kuti Johani wainga muporofeti wokadi-kadi.”—Marco 11:29-32.

Vapostori va Jesu avakwanisi kunasa kuziva madavirire aushoni. Ngo kudaro vanoti: “Atibzizivi.” Jesu ngo wakazonanga kuti: “Inini andimubvunjivo kuti ndinoita ibzi ngo muthetho waani.”—Marco 11:33.