Ora Hesus a sali djaluna atardi for di Herúsalèm, el a bai bèk Betania, ku tabata situá na e bahada parti ost di Seru di Oleifi. Probablemente el a pasa nochi na kas di Lázaro, Maria i Marta, kendenan tabata su amigunan.

Mainta, dia 11 di nisan, e i su disipelnan tabata riba kaminda atrobe pa bai Herúsalèm. Esei lo tabata e último biaha ku lo el a bishitá e tèmpel i siña hende públikamente. Despues, lo el a selebrá Pasku Hudiu i instituí e Konmemorashon di su morto pa finalmente e ser husgá i matá.

Awor, ora nan tabata riba kaminda, bayendo di Betania via Seru di Oleifi pa Herúsalèm, Pedro a mira e palu ku Hesus a maldishoná un dia promé. El a bisa Hesus: “Rabi, wak!, e palu di figu ku bo a maldishoná a seka.”—Marko 11:21.

Dikon Hesus a pone e palu seka? Hesus mes a revelá e motibu, bisando: “Di bèrdat mi ta bisa boso: Si boso tin fe i no ta duda, boso no solamente lo hasi loke mi a hasi ku e palu di figu, ma tambe si boso bisa e seru akí: ‘Hisa bo mes benta den laman,’ esei lo sosodé. I tur loke boso pidi den orashon ku fe, boso lo haña.” (Mateo 21:21, 22) Sí, Hesus a ripití loke el a siña su disipelnan anteriormente, esta, ku si un hende tin fe, e por move seru.—Mateo 17:20.

Pues, Hesus a usa e palu di figu ku el a laga seka komo un ehèmpel bibu pa siña su disipelnan e importansia di pone fe den Dios. El a bisa nan: “Tur loke boso pidi den orashon, tene fe ku boso kasi a haña nan kaba, i boso lo haña nan sigur.” (Marko 11:24) Esaki ta un lès importante pa tur siguidó di Hesus! E tabata spesialmente importante pa e apòstelnan mirando e pruebanan difísil ku nan lo a haña nan kuné. No opstante, e palu di figu ku a seka ta siña nos algu mas relashoná ku e importansia di pone fe den Dios.

Meskos ku e palu di figu akí, e nashon di Israel tabata duna un impreshon robes. Komo ku e nashon akí tabatin un relashon spesial ku Dios, tabata parse ku tur su miembronan tabata kumpli ku e Lei di Dios. No opstante, e nashon en general no tabata demostrá fe den Dios ni tabata produsí bon fruta. Nan a asta rechasá e Yu di Dios! P’esei, e echo ku Hesus a pone e palu di figu seka a demostrá kiko lo a spera e nashon sin fe akí ku no tabata duna fruta.

Poko despues, Hesus i su disipelnan a yega Herúsalèm. I manera tabata su kustumber, el a bai e tèmpel i a kuminsá siña e hendenan. E saserdotenan prinsipal i e ansianonan di e pueblo, probablemente pensando riba loke el a hasi un dia promé ku e kambiadónan di plaka, a bini serka dje i a puntr’é: “Ku ki outoridat bo ta hasi e kosnan akí? Òf ken a duna bo e outoridat ei pa hasi e kosnan akí?”—Marko 11:28.

Hesus a kontestá nan: “Lo mi hasi boso un pregunta. Boso kontestá mi, anto mi tambe lo bisa boso ku ki outoridat mi ta hasi e kosnan akí. Di unda Huan a haña outoridat pa batisá hende? Di shelu òf di hende? Kontestá mi.” Hesus a hinka su enemigunan den un dilema. I nan a kuminsá deliberá ku otro pa wak kon pa kontest’é. Nan a bisa otro: “Si nos bisa: ‘Di shelu,’ lo e puntra nos: ‘Pakiko boso no a ker’é anto?’ Ma nos lo tribi di bisa: ‘Di hende’?” E saserdotenan prinsipal i e ansianonan di e pueblo a rasoná na e manera akí pasobra nan tabatin miedu di e multitut, “pasobra henter e multitut tabata kere ku di bèrdat Huan tabata un profeta.”—Marko 11:29-32.

E enemigunan akí no tabata sa kiko pa kontestá. Nan a bisa Hesus: “Nos no sa.” Hesus a bisa nan: “Ami tampoko no ta bisa boso ku ki outoridat mi ta hasi e kosnan akí.”—Marko 11:33.