Jesusqa lunes tarde lawtam Olivos muqupa waqtan Betania llaqtaman kutirqa. Chaypiqa yaqachusmi kuyasqan Lazaropa, Mariapa hinaspa Martapa wasinkupi puñupakurqa.

Paqarintin madrugawtañataqmi Jesusqa qatiqninkunawan kuska Jerusalenman rirqaku, chayqa nisan killapa 11 kaq punchawninmi karqa. Chay kutillañam Jesusqa Diospa wasinman rirqa hinaspa libreta Diosmanta willakurqa. Chaymantaqa pascua fiestata yuyarispam, wañukusqanta yuyarinapaq cenata ruwaspa hinaspa juzgasqa kaspam wañuchisqaña kanan karqa.

Betaniamanta Jerusalenman rispanmi Olivos muqunta rirqa, chaypim puntan punchawta Jesuspa ñakasqan higos sachata Pedro rikuruspa nirqa: “¡Yachachikuq qaway!, chay ñakasqayki higos sachaqa chakirirusqa”, nispa (Marcos 11:21).

Chaymantam Jesusqa imanasqa higos sachata chakichisqanmanta nirqa: “Chiqaptapunim nikichik: Iñiyniyuq kaspa mana iskayrayaspaqa manam kay higos sachawan ruwasqallaytachu ruwankichik, aswanqa kay urqutapas niwaqchikmi: ‘Huqarikuspa lamar quchaman wischukuy’, nispa. Hinaptinqa chaynam kanman. Mana iskayrayaspa imatapas Diosta mañakuspaykichikqa chaskinkichikmi”, nispa (Mateo 21:21, 22). Chaynatam huk kutipi hina yachachirqa iñiyniyuq kaspaqa urqutapas kuyurachinamanta (Mateo 17:20).

Chaynaqa, sachata chakirachisqanwanmi Jesusqa yachachirqa Diospi ancha hapipakuymanta. Chaymi nirqa: “Imatañapas mañakusqaykichikta chaskirusqaykichikpaqña piensaspaqa chaskinkichikpunim”, nispa (Marcos 11:24). Chayqa lliw qatiqninkunapaqmi ancha allin yachachikuy. Aswanraqmi apostolninkunapaqqa sasachakuykunapiña kananku kasqanrayku. Ichaqa manam chayllatachu chakiruq higos sachawanqa yachachiyta munarqa.

Chay sacha hinam Israel runakunapas karqaku, yanqallam Diospa kamachikuyninkunata kasukuq tukurqaku, paykunaqa Diospi mana hapipakuspankum allin kaqtaqa mana ruwarqakuchu. Hinaspapas kikin Diospa churintam qipancharqaku. Chaynatam qawachirqa chakiruq sacha hina Israel runakunapas mana allinpi tukunankuta, paykunaqa Diospi mana hapipakuq hinaspa mana allinkuna ruwaqmi karqaku.

Chaymantam Jesusqa qatiqninkunawan kuska Jerusalenman chayarurqaku. Chaymi Jesusqa sapa kuti ruwasqanman hina Diospa wasinman yachachiq rirqa. Puntan punchawtam rantiqkunatawan rantikuqkunata chaymanta qarqurqa, ichapas chayrayku riqsisqa sacerdotekunawan llaqtapi autoridadkunaqa nirqaku: “¿Ima derechoykiwantaq kaykunata ruwanki? ¿Pitaq kamachisurqanki kaykunata ruwanaykipaq?”, nispa (Marcos 11:28).

Jesusñataqmi nirqa: “Ñuqapas tapusqaykichikyá, tapusqayta kutichiwaptikichikqa ñuqapas nisqaykichikmi ima derechoywan kaykuna ruwasqayta. Niykuwaychik: ¿Pitaq Juanta kamachirqa bautizananpaq? ¿Hanaq pacha Dioschu icha runakunachu?”, nispa. Chaynapim paykunaraq puntata kutichinanku karqa. Hinaspam sacerdotekunawan llaqtapi autoridadkunaqa kikinkupura ninakuqku: “Sichum ‘Diosmi’ nisun, hinaptinqa niwasunchá: ‘Chaynaqa, ¿imanasqataq mana creerqankichikchu?’, nispa. Manataqmi nichwanchu ‘runakunam’, nispaqa”, nispa. Paykunaqa runakunatam manchakuqku runakunaqa Diosmanta willakuqpaq Juanta hapisqankurayku (Marcos 11:29-32).

Manataqmi imayna kutichiytapas atirqakuchu hinaspam nirqaku: “Manam yachanikuchu”, nispaña. Hinaptinmi Jesuspas nirqa: “Chaynaqa manam ñuqapas nisqaykichikchu ima derechoywan kaykuna ruwasqaytaqa”, nispa (Marcos 11:33).