Han Lunes han kulop binaya hi Jesus ha Jerusalem ngan binalik ha Betania ha este nga bakilid han Bukid han mga Olibo. Posible nga kumaturog hiya ha balay han iya kasangkayan nga hira Lasaro, Maria, ngan Marta.

Aga na han Nisan 11. Nagbabaktas na liwat hi Jesus pati an iya mga disipulo tipabalik ha Jerusalem. Ini an iya kataposan nga pagkadto ha templo. Ngan ini an ultimo nga adlaw han iya pagsangyaw ha publiko antes niya isaurog an Paskua, tikangan an Memoryal han iya kamatayon, ngan katapos bibistahon hiya ngan papatayon.

Samtang nagbibiyahe tikang ha Betania ngan naagi ha Bukid han mga Olibo tikadto ha Jerusalem, nakita ni Pedro an kahoy nga iginsumpa ni Jesus han naglabay nga aga. Hiya nagsiring: “Rabbi, kitaa! an igera nga imo iginsumpa uga na.”—Marcos 11:21.

Pero kay ano nga iginpahinabo ni Jesus nga mauga an kahoy? Iya iginsaysay an hinungdan: “Ha pagkamatuod, susumatan ko kamo: Kon may pagtoo kamo ngan diri nagruruhaduha, mahihimo niyo diri la an pariho han akon ginbuhat hito nga igera, kondi kon sidngan liwat niyo ini nga bukid, ‘Magabot ka ngan mahilabog ngadto ha dagat,’ mahitatabo ito. Ngan an ngatanan nga iyo pangaroon pinaagi ha pag-ampo nga may pagtoo, makakarawat niyo.” (Mateo 21:21, 22) Hini nga paagi, iya gin-utro an punto nga iya na gin-unabi mahitungod han pagtoo nga nakakagbalhin hin bukid.—Mateo 17:20.

Salit pinaagi ha pagpahinabo nga mauga an kahoy, igintutdo ni Jesus nga kinahanglan magkaada hin pagtoo ha Dios. Hiya nagsiring: “An ngatanan nga iyo igin-aampo ngan gin-aaro sigurado nga makakarawat niyo.” (Marcos 11:24) Importante gud ini nga leksyon para ha ngatanan nga sumurunod ni Jesus! Angayan gud ini labi na ha mga apostol kay diri mag-iiha maatubang hira hin makuri nga mga pagsari. Pero an kauga han igera may koneksyon liwat ha kalidad han pagtoo.

Pariho hini nga kahoy nga igera, an nasud han Israel malimbong pagkit-on. An mga tawo hini nga nasud may kasabotan ha Dios ngan baga hin nagtutuman han iya Balaud. Pero ginpamatud-an han nasud ha kabug-osan nga waray hira pagtoo ngan waray hira mag-opay nga bunga. Iginsalikway pa ngani nira an Anak mismo han Dios! Salit, pinaagi ha pagpahinabo nga mauga an waray bunga nga igera, iginpakita ni Jesus kon ano an mahitatabo hinin waray bunga ngan waray pagtoo nga nasud.

Waray pag-iha, hi Jesus ngan an iya mga disipulo sinulod ha Jerusalem. Sugad han iya nahiaraan, kinadto hiya ha templo ngan nanutdo. Posible nga nahinunumdoman pa han punoan nga mga saserdote ngan katigurangan an ginbuhat ni Jesus han naglabay nga adlaw ha mga parabalyo hin kwarta, salit ginkwestyon nira hiya: “Ha ano nga awtoridad ginbubuhat mo ini nga mga butang? O hin-o an naghatag ha imo hin awtoridad ha pagbuhat hini nga mga butang?”—Marcos 11:28.

Hi Jesus binaton: “May ipapakiana ako ha iyo. Batona niyo ngan babatunon ko liwat kamo kon ha ano nga awtoridad ginbubuhat ko ini nga mga butang. An awtoridad ba ni Juan ha pagbawtismo, tikang ha langit o ha mga tawo? Batona ako niyo.” Yana an iya mga parakontra na an ginkukwestyon. Salit an mga saserdote ngan katigurangan nag-uruistorya han ira ibabaton: “Kon sumiring kita, ‘Tikang ha langit,’ masiring hiya, ‘Kay ano man nga waray kamo tumoo ha iya?’ O masiring ba kita, ‘Tikang ha mga tawo’?” Nagsiring hira hini tungod kay nahadlok hira ha mga tawo, “kay an mga tawo natoo nga hi Juan usa gud nga propeta.”—Marcos 11:29-32.

Diri maaram an mga nakontra kan Jesus kon ano an ira angay ibaton. Salit hira nagsiring: “Diri kami maaram.” Hi Jesus binaton: “Diri ko liwat isusumat ha iyo kon ha ano nga awtoridad ginbubuhat ko ini nga mga butang.”—Marcos 11:33.