Ka lukʼ Jesús tu kaajil Jerusalén tu tardeil le lunesoʼ, suunaj tu kaajil Betania, tu laakʼin u Puʼukil le Olivoʼoboʼ. Maʼ xaaneʼ tiʼ tu máansaj le áakʼab tu yotoch Lázaro, María yéetel Marta, le máaxoʼob yéetel ku biskubaoʼ.

Beoraaʼ tsʼoʼok u sáastal tu kʼiinil 11 tiʼ nisán. Jesús yéetel u disipuloʼobeʼ joʼopʼ u kaʼa suutoʼob Jerusalén utiaʼal u binoʼob teʼ templooʼ, lelaʼ letiʼe u tsʼook kun binoʼ. Letiʼe u tsʼook kʼiin kun kʼaʼaytaj tiʼ yaʼab máakoʼob táanil tiʼ le Pascua yéetel u káajsik le Ookʼin Janal utiaʼal u kʼaʼajsaʼal kíimikoʼ, ken tsʼoʼokkeʼ yaan u juzgartaʼal yéetel yaan u kíimsaʼal.

Le ka kʼuchoʼob tu tojil u puʼukil le Olivoʼoboʼ, Pedroeʼ tu yilaj le cheʼ maldecirtaʼab tumen Jesús joʼoljeakeʼ. Ka tu yaʼalaj: «¡Ile, j-Kaʼansaj!, le higuera ta kʼaakʼastʼanteʼ tsʼoʼok u tijil» (Marcos 11:21).

¿Baʼaxten tu beetaj Jesús u tijil le higueraoʼ? Letiʼeʼ tu yaʼalajtiʼob: «Wa yaan a fejeʼex yéetel maʼ tu kaʼapʼéelchajal a tuukuleʼexeʼ, maʼ chéen yaan a beetkeʼex le baʼax tin beetaj tiʼ le higueraoʼ, baʼaxeʼ yaan a waʼalikeʼex tiʼ le puʼukaʼ: ‹Líikʼen ka a pulaba teʼ kʼáaʼnáaboʼ›, yaan u beetik. Yéetel wa yaanteʼex fejeʼ tuláakal baʼax ka a kʼáateʼex ich oracioneʼ yaan u tsʼaʼabalteʼex» (Mateo 21:21, 22). Ka tu kaʼa aʼalaj le fejoʼ jeʼel tak u péeksik junpʼéel puʼukeʼ (Mateo 17:20).

Le úuchik u beetik u tijil le higueraoʼ tu tsʼáaj tuʼux u kaʼansik u kʼaʼabéetil u tsʼáaik u fe máak tiʼ Dios. Letiʼeʼ tu yaʼalaj: «Tuláakal baʼax ka kʼáatkeʼex ich oracioneʼ, creerteʼex yaan u tsʼaʼabalteʼex, bey túunoʼ yaan a kʼamkeʼex» (Marcos 11:24). ¿Máasaʼ jach maʼalob le baʼax tu kaʼansaj tiʼ u disipuloʼoboʼ? Lelaʼ jach letiʼe baʼax kʼaʼabéet tiʼ le apostoloʼoboʼ, tumen jach taʼaytak u káajal u chʼaʼpachtaʼaloʼob. Baʼaleʼ le úuchik u beetik u tijil le higueraoʼ tu kaʼansaj bix unaj u yeʼesik fe cada juntúul máak.

Jeʼex le higueraoʼ, u kaajil Israeleʼ bey jach maʼalob yanil kaʼacheʼ. U kajnáaliloʼobeʼ u beetmoʼob junpʼéel núuptʼaan yéetel Dios yéetel ku yilaʼal bey jach ku tsʼoʼokbeskoʼob le baʼax ku yaʼalik le Leyoʼ. Baʼaleʼ óoliʼ tuláakloʼob tsʼoʼok u yeʼeskoʼob minaʼan u fejoʼob yéetel maʼatech u tsʼáaikoʼob maʼalob ich. Letiʼobeʼ maʼ tu kʼamoʼob mix tak u Hijo Diosiʼ. Bey túunoʼ, le úuchik u beetik u tijil le higueraoʼ, Jesuseʼ tu yeʼesaj baʼax kun úuchul tiʼ u kajnáaliloʼob Israel, tumen maʼatech u tsʼáaikoʼob maʼalob ich wa maʼatech u creertikoʼob baʼaxoʼob ku yaʼalik Dios.

Chéen ichil jun chan súutukeʼ yaan u kʼuchul Jesús yéetel u disipuloʼob tu kaajil Jerusalén. Jeʼex suukil u beetkeʼ, letiʼeʼ yaan u bin teʼ templo utiaʼal u seguertik u kaʼansajoʼ. U nuuktakil le sacerdoteʼob yéetel u nuuktakil le judíoʼoboʼ, maʼ xaaneʼ yoʼolal le baʼax tu beetaj Jesús tiʼ le máaxoʼob kʼexik taakʼin teʼ templooʼ, tu yaʼaloʼobtiʼ: «¿Bix u páajtal a beetik le baʼaloʼobaʼ? ¿Máax tsʼáatech u páajtalil a beetkoʼob?» (Marcos 11:28).

Jesuseʼ tu núukajtiʼob: «Teen xaneʼ yaan in beetikteʼex junpʼéel kʼáatchiʼ. Núukeʼexten ka in waʼalteʼex xan bix u páajtal in beetik le baʼaloʼobaʼ. ¿Máax tsʼáa páajtalil tiʼ Juan utiaʼal u tsʼáaik okjaʼ, Dios wa le máakoʼoboʼ? Núukeʼexten». Beoraaʼ letiʼe máaxoʼob pʼekmil ken u tukultoʼob baʼax ken u yaʼaloʼoboʼ. Le sacerdoteʼob yéetel u nuuktakil le judíoʼoboʼ joʼopʼ u tuklikoʼob bix jeʼel u núukikoʼob tiʼeʼ: «Wa k-aʼalik: ‹Dioseʼ›, letiʼeʼ yaan u yaʼalik: ‹¿Baʼaxten túun maʼ ta creerteʼexiʼ?›. Baʼaleʼ ¿yaan wa túun k-táabal k-aʼal: ‹Le máakoʼoboʼ›?». Letiʼobeʼ ku yaʼalikoʼob lelaʼ tumen saajkoʼob tiʼ le máakoʼoboʼ, «tumen tuláakal aʼalikeʼ Juaneʼ jach tu jaajil juntúul profeta» (Marcos 11:29-32).

Le máaxoʼob pʼekmiloʼ maʼ tu kaxtikoʼob baʼax maas maʼalob ka u núukoʼobtiʼ. Le oʼolal tu yaʼaloʼob: «Maʼ k-ojliʼ». Ka aʼalaʼabtiʼob tumen Jesús: «Teen xaneʼ maʼ táan in waʼalikteʼex bix u páajtal in beetik le baʼaloʼobaʼ» (Marcos 11:33).