Kinde ma Yesu ubino i hekalu, etalu dhu julam ma dongo ku judongo mange ma gimito ginyoth wie ku penji ma nia ng’a dhe m’umio ire ng’ol m’etimo ko gin ceke m’ebino timo. Lembe ma Yesu udwoko igi uketho giling’ ting’. Ing’eye etio ku lapor moko m’ugolo wigi.

Eyero kumae: “Ng’atu moko ubedo ku wote ario; ebino de ba ma kayu, ewacu kumae, woda ci tim tic i podho mir ulok tinuni. Man eloko lembe ewacu de kumae, ayenyo ngo; ento macen elokre, ecidho de. Ebino de ba mir arionde, ewacu de kumeca. Man eloko lembe ewacu kumae, acidho, rwoth: ere ecidho ngo. Makani ma kind juario m’utimo kacwiny woni?” (Matayo 21:28-31) Dwokowang’ lembe maeno utie kamaleng’: Nyathin ma kwong’a re m’udok utimo yeny pa won.

Pieno Yesu uyero ni judhoge kumae: “Andha awacu iwu, nia weg ajok ku weg tarwang’ gilar gimondo iwu i Ker pa Mungu.” Ku kwong’a weg ajok ku weg tarwang’ giyio ngo Mungu. Re ing’eye calu nyathin mi kwong’o, gidok giloko cwinygi man gicaku nitimo ire. Tung’ kugi, calu nyathin mir arionde, judong dini giwacu nia gitimo ni Mungu ma ke i andha gitimo ire ngo. Yesu uyero kumae: “Yohana bino i beng’wu i yo mi bedopwe, wuyie de ngo; ento weg ajok ku weg tarwang’ e ma giyie; wun de, ka wuneno maeni, macen wuloko cwinywu ngo, kara wuyie.”​—Matayo 21:31, 32.

Yesu udok umaku lapor mukende. I lapor maeni, Yesu unyutho nia judong dini gikoso ngo kende kende nitimo yeny pa Mungu, ento gitie bende jutimrac. Ewacu kumae: “Ng’atu moko pidho podho mir ulok, epidho arara de i kume, ekunyo vur ma jubiyo ie nying ulok de, man egomo [otkur], e emie ni sumba ba jutipodho, en ke ecidho i ng’om mange. Ka kacekne tundo eoro jamiru ba jutipodho, kara egam kum nying ulok moko m’i podho mir ulok ba jutipodho. E gigame, gifode de, giketho edok mananu. Man eoro jamiru mange kendo i bang’gi; e gitong’o lero i wie, man gitime rac dit. Man eoro mange; e ginege: ku mange de dupa; moko gifodo, moko ke ginego anega.”​—Marko 12:1-5.

Nyo juwinj pa Yesu ginyang’ i lapor maeno? Eyo, gicopo nipoi ikum wec ma jabila Isaya ugam uyero, m’uwacu kumae: “Podho mir ulok pa Yehova mir udul en e ot mir Israel, man dhanu mi Yuda gi yen m’apidha pare ma ber: man egeno pokolembe, ento, nen [turocik].” (Isaya 5:7) I lapor maeno pa Yesu, won podho utie Yehova, podho mir ulok ke utie thek mir Israel ma Mungu ugoyo gang’ i kume ku Cik pare pi nigwoke. Yehova uoro jubila kara uponj dhanu pare man kara gikonygi giceg nying’gi maber.

Ento, “jutipodho” gitimo “jumiru” ma juoro i bang’gi rac man ginegogi. Yesu uyero kumae: ‘E macen [won podho], uoro wode ma jamer i bang’gi, ewacu kumae, gibijwigiri ni woda. Ento jutipodho maeno giweciri i kindgi gigi kumae, maeni jacampacu; wubin, wanegue, kara camupacu dong’ iwa. E gimake man ginege.’​—Marko 12:6-8.

Yesu udok upenjogi kumae: ‘Ka kumeno, won podho mir ulok bitimo ang’o?’ (Marko 12:9) Judong dini gidwoko ire lembe kumae: “Ebinyotho dhanu ma rac maeno ku rac, man ebimio podho mir ulok ni jutipodho mange, ma bimio ire nyinge ku ba nindo migi.”​—Matayo 21:41.

M’umbe ninyang’, gipoko lembe i wigi gigi, pilembe gin de gitie acel m’ikind “jutipodho” mi “podho mir ulok” pa Yehova, niwacu thek mir  Israel. Nying’gi ma Yehova ukwayu nia gicegi utie nia gibed ku yioyic i Wode, niwacu Masiya. Yesu ugam uneno wang’gi, man ewacu igi kumae: “Fodi wusomo lembagora pa Mungu maeni ngo ma kumae, kidi ma jugomot gikwero, kidine judwoke ni wi gul; maeni ai ba [Yehova], man en e gin ma wang’u ijo i wang’wa?” (Marko 12:10, 11) Ing’eye Yesu udok ukoro i lembene kamaleng’ kumae: “Ka kumeno awacu iwu kumae, jubikabu Ker pa Mungu woko kud i beng’wu, jubimie ni thek ma cego nyingene.”​—Matayo 21:43.

Jugorcik ku julam ma dongo ging’eyo nia Yesu uyero “lembabola maeni i kumgi.” (Luka 20:19) Ng’ecwiny umakugi, gimito gineg ‘jacam pacu’ maeno mandha. Ento calu m’udul dhanu neno Yesu ni jabila, ninege iwang’gi utie igi lembe matek.