E temple, Yésus a ndeme mane jo’otane bemie beprêtre a betebe ôsu ya ayoñe minlô, mbe bete ba bo nye bisô a lat a ngul a bo je mam. Yésus a yalan a dibe be menyu. Nde fe a kane be nkana wo liti avale bôt avé be né.

Yésus a kañete na: “Môt a nga bili bone bebaé, ane a nga zu be nyô ya ôsu a jô nye na: Kele den a bo ésaé afube mindi’i mi woon. Nde mone nyô a nga yalane na me nji kômbô ke, v’asu’ulan, éyoñ a kôñelaneya nlem, a nga ke. A nga ke fe be mone mbok a jô nye avale da, nye ve yalan a jô ésaa na: Yaa ésa wom, ve a nji ke. Mbé ya be bebaé a nga bo nkômban ésa?” (Matthieu 21:28-31, Mfefé Nkôñelan) Da yené ne ngeññ na a ne mon ôsu nnye a nga su’ulane bo nkômban ésa.

Nde Yésus a jô besiñe bé na: “Ma jô mia bebela na, Benyoñe toya a binga ba bo ébamba ba ye ke mia ôsu Éjôé Zambe.” Atata’a, benyoñe taxe nge toya, a bewôlôwôs be nji be be kañe Zambe. Ve, fo’o v’ane ntôle mon, ba te su’ulane jôban a éyoñe ji be nga kañe nye. Betebe ôsu ya ñyebe ki be ne ane mone baa: ba jô v’anyu na ba kañe Zambe, ve nalé a nji bo été. Yésus a liti na: “Jean [Baptiste] a nga zu fo’o be mia e zôsôa zen été, ve mi nji buni nye, ve benyoñe toya a binga be ébamba be nga buni nye. Ja’ane mi yeneya nalé, mi nji kôñelane minlem a buni nye.”​—Matthieu 21:31, 32, Mfefé Nkôñelan.

Yésus a beta kane nkana ôfe. Éyoñe ji, Yésus a liti na ékobe betebe ôsu ya ñyebe ja beta dañe nyoñane ba nyoñ ésaé ba yiane bo Zambe éngbwemese. Be nto mbia be bôt. Yésus a kañete na: “Môt éziñ a nga bé afub woon, a lôñe nka’alé mbôma’ane, a mane fak ébé éfu’u woon, a lôñe fe nkumenda ya ba’ale woon. Ane a nga nyoñ afub a ve [beba’ale afup], ane a nga ke e dulu. Éyoñe mekoé bibuma me nga kpwaan, e nde a nga lôme mbo ésaé na a ke yene [beba’ale afup] a nyoñ akab bibuma dé ya afub woon. E nde be nga bi nye, be mane bôme nye, be bulane fe lôme nye ve mo, ve mebo. Ane a nga beta lôme be mbo ésaé mfe. Nyuli e nye be nga mane bibi biôm e nlô, be nga mane fe samele nye. E nde a nga lôme mfe, nyuli ate e nye be nga wôé a si. A lôme fe befe abui. Balé bete, be bôme bevok, be wôé ke bevok.”​—Marc 12:1-5, Mfefé Nkôñelan.

Ye bôte ba vô’ôlô Yésus ba ye fo’o wô’ô nkana wu? Ba yiane simesane mejô me Ésaïe ma: “Afube mindi’i [Yéhôva] ya minsamba mewosan e nji bo jôm éfe ve Nda bôte Israël. A bôte ya Juda be ne atôk a mbe a dañe nye’e. A nga yange nya ntyi’ane mejôô be nye, ve miñyône bingôngole bi bôt mmie mia viane wô’é.” (Ésaïe 5:7, Mfefé Nkôñelan) E nkana Yésus, mie afube woon a ne fe Yéhôva, a afup mindi’i mi woon e ne ayoñ Israël, Atiñe Zambe é bôma’an a kamane de. Yéhôva a nga lôme bekulu mejô na be ye’ele ayoñe dé a volô de na é wume mbamba bibuma.

Ve jame da, “beba’ale afup” be nga tibili a wôé ‘bebo bisaé’ bete. Yésus a ke ôsu a jô na: “[Mie afube woon] a nga li’i a bili môte wua wua, ve mone wé a dañe nye’e. Ane a nga su’ulane lôme nye e be be a jô’ô na: Ba ye boone ko woñ amu na a ne mone wom. [Beba’ale afup] bete be nga ke ba kobô beebe na, e nye nyuna, e môt a ye nyoñ élik, za’ane bi wôé nye, élik é bo éli’i jangan. E nde be nga bi nye, be mane wôé nye, be vaa nye afub été be ke wua nye e fé.”​—Marc 12:6-8, Mfefé Nkôñelan.

Éyoñe ji Yésus a sili be na: “Mie afube woon a ye bo aya?” (Marc 12:9, Mfefé Nkôñelan) Betebe ôsu ya ñyebe ba yalane na: “A ye wôé bingôngole beba’ale bete mbia ñwôan, a kee afup e mo beba’ale befe mbe ba ye ve nye bibuma éyoñe ja yian.”​—Matthieu 21:41, Mfefé Nkôñelan.

 Be ndôme tyi’i ajô dap bebien teke de yem, amu be ne fe “beba’ale afup” y’ayoñ Israël, “afup mindi’i mi woon” Yéhôva. Ébuma Yéhôva a yange e be beba’ale afup é ne mbunan e be Mone wé, Messie. Yésus a fombô be mis été a jô be na: “Ye mi ne teke yeme ntilan wuna na: Ako’o belôñ menda be nga ben a wua e si, e nde te e nga bo ako’o ya jua? Jame te da so [be Yéhôva]. E ne jame ya semé e mise mangan.” (Marc 12:10, 11, Mfefé Nkôñelan) Nde a beta jô na: “Ajô te ma jô mia na éjôé ja ye vasebane be mia a ja ye veeban e be ayoñ da ye wume bibuma y’été.”​—Matthieu 21:43, Mfefé Nkôñelan.

Bescribe a bivete beprêtre ba yemelane na Yésus “a nga kane nkana ôte amu ajô dap.” (Luc 20:19) Nde ba dañe beta jeñe na be wôé nye, “môt a ye nyoñ élik.” Ve ba ko ékôane bôte woñ amu ja nyoñe Yésus ane nkulu mejô; nde ba jeñe ki na be wôé nye été été.