Ngöne la uma ne hmi, Iesu a ase icilekeu me itretre huuj, me itre qatr. Hnei angatr hna tupathi nyidrë göne la qaane la mene i nyidrë. Matre nyidrëti a thinge ju la që i angatr. Thupene lai, nyidrëti a hamëne jë la ketre ceitun ka amamane la pengö i angatr.

Öni Iesu: “Hetrenyi la ketre trahmanyi ka lue nekön. Hnei angeic hna pane tro kowe la haetra me hape: ‘Neköng, pane tro jë troa huliwa ngöne la vin.’ Ame hnei nyën hna sa ka hape: ‘Waea,’ ngo thupene jë hi lai, huliwa pi hi la hni i nyën, matre, nyën a tro ju. Nge kem a tro ju fe kowe la hnaaluene me upi angeice fe. Nge öni nyën: ‘Ö ka loi, eni hë la a tro,’ ngazo pe, tha tro kö nyën. Matre drei e nyidro la ka kuca la aja i kem?” (Mataio 21:28-31) Kolo haetra, ke nyëne la ka eatrëne la aja i kem.

Matre öni Iesu koi itre ithupëjia: “Eni a qaja hnyawa koi nyipunie laka, ame la itretre hle mani me itre föe ne gojeny, tre, ase hë angatr thipatrë nyipunie kowe la Baselaia ne hnengödrai.” Tha ka nyihlue i Akötresieti kö la itretre hle mani, me itre föe ne gojeny. Ngo ceitu i angatr me haetra, ke ase hë angatr ietra, nge angatre hi la ka nyihlue i Akötresie. Ngo ame pena itre hene ne hmi, ceitu i angatr me cipa, ke angatr a selëne ka hape, ka nyihlue i Akötresie, ngo göi qaja hi. Matre öni Iesu: “Hnei Ioane lo hna traqa koi nyipunie ngöne la nyipici, ngo tha hnei nyipunieti kö hna kepe angeic. Ngo hnene pe la itretre hle mani, me itre föe ne gojenyi hna mejiune koi angeic. Nge ngacama öhne hnyawa hi nyipunieti lai, ngo tha huliwa kö la itre hni nyipunie matre troa kepe angeic.”—Mataio 21:31, 32.

Iesu a hamëne hmaca jë la ketre ceitun. Ngo enehila, nyidrëti a nyixane me qaja la ngazo ka tru i angatr. Öni nyidrë: “Hnene la ketre atr hna eënyi vin, me ekö hage xötreith, me hnëkëne la hnë weje wene vin, me acile la ketre ita ne thup. Ase jë hi, angeic a nue pi kowe la itre xa atre eënyi troa thupën, nge angeic a tro ju kowe la ketre nöje gaa nany. Nge traqa ha la ijine menu, ame hnei angeic hna upe jë la ketre hlue kowe lo itretre eëny, matre troa hane menuën la itre vin. Ngo hnene pë hë la itretre eënyi hna xolouth lai hlu, me lepe angazo angeic, me upi angeice hmaca matre pë ju kö hna bëeke fë. Hnene la maseta hna upe hmaca la ketre hlu, ngo hnei angatr hna lepe la he i angeic, me ahmahmanyi angeic. Nyidrë a upe hmaca jë la ketre hlu, ngo hnei angatr hna humuthi angeic. Nge nyimutre fe la itre xan hna lepe me humuth.”—Mareko 12:1-5.

Tro kö itre ka dreng a trotrohnine la alien? Ma mekune pala kö angatr lo aqane eetre i Isaia, öni angeice lo: “Nöje Isaraela la hnënge vine i Iehova, Joxu ne la itre trongene isi e hnengödrai, nge itre atre Iudra la hlapa hnimina i nyidrë; nyidëti a thele la meköt, ngo pëkö meköt ka ijij.” (Isaia 5:7, MN) Tune lo hna qaja hnei Iesu, Iehova la atrekë vin, nge hnënge vin la nöje Isaraela, nöj hna ekö hagen hnei Trenge Wathebo. Hnei Iehova hna upe la itre perofeta troa inine la nöje i nyidrë, me xatua angatr troa wa wen ka loi.

Ngazo pe, hnene la “itretre eëny” hna qanangazon, me humuthe la itre “hlue” hna upe koi angatr. Öni Iesu hmaca jë: “Hnene la trene vin hna upe la nekö hnimina i nyidrë kowe la itre ka eëny, me hape: ‘Tro angatre lai a metrötrëne la neköng.’ Matre, hnene la itretre eëny hna iqajakeune ka hape, ‘Hane hi la nekön. Jë fe, matre tro sa humuthi nyën, matre ewekë i easë  pë hë la edrö i nyën.’ Haawe, angatr a xolouthi nyëne ju, me humuthi nyën.”—Mareko 12:6-8.

Iesu a hnyinge jë me hape: “Nga nemene jë la hna troa kuca hnene la trene vin?” (Mareko 12:9) Sa jë hi la itre hene ne hmi ka hape: “Pine laka, ngazo catr angatr, tro angeic a humuthi angatr me nue pë hë la vin kowe la itre xa atre eëny, itre ka troa hamë angeic la itre wen ngöne la ijine menu.”—Mataio 21:41.

Angatre hi lai a sipu jelengazo angatr, ke angatre la “itretre eëny” ka huliwa hnine la “vine” i Iehova, lo nöje Isaraela. Nge ame la hnei Iehova hna ajan, tre tro itretre eëny a lapaun kowe la nekö i nyidrë, lo Mesia. Iesu a goeë tiline la itre hene ne hmi me hape: “Hapeu, tha hane kö nyipunieti e lo hna hape? ‘Ame lo etë hna nuetrije hnene lo itre ka xupi uma, tre eje hi lo etë ka sisitria catr. Nge qaathei Iehova la ewekë cili, matre hapeu, tha ewekë kö lai nyine tro sa hain’?” (Mareko 12:10, 11) Thupene lai, Iesu a qaja jë la ini me hape: “Hane hi lai kepin matre eni a qaja koi nyipunie laka, tro ha xome qaathei nyipunie la Baselaia i Akötresie, me hamëne kowe la nöje ka troa wa wen.”—Mataio 21:43.

Trotrohnine hi itretre cinyihan me itre tane i angetre huuj laka, “nyidrëti a qeje angatr ngöne lai ceitun.” (Luka 20:19) Qaane ju hi lai, meci hë angatr hna pi humuthi Iesu, lo nyipi “nekön.” Ngo xou i angatre la ka ala nyimu, ke perofeta Iesu koi nyudren. Matre angatr a uthe pi troa humuthi nyidrë.