Muna Tempelo, Yesu osukisi nganga zambuta ye mbuta za nkangu, ana banyuvuidi kana mu nkia wisa kevangilanga mambu. E mvutu za Yesu zibakangidi e nua. I bosi, Yesu otele kingana kisongele e mpila wantu bena.

Ovovele vo: “Muntu una ye wana wole. Wele kwa mwan’antete, umvovese vo, ‘E mwana, wenda sala muna mpatu a vinyu o unu.’ Umvutwidi vo, ‘Kikwenda ko,’ kansi kuna kwalanda, uyibenze, wele. Wele kwa mwan’anzole, ovovele diau dimosi. Umvutwidi vo, ‘Se ngienda, e Mfumu,’ kansi kele ko. Nani muna yau awole ovangidi luzolo lwa se diandi?” (Matai 21:28-31) E mvutu i zazi, o mwan’antete yandi ovangidi luzolo lwa se diandi.

I bosi, Yesu ovovese atantu andi vo: “Kieleka inuvovese vo, avakulwisi a mpaku ye minta-zumba vita bekunuvita muna Kintinu kia Nzambi.” Kuna lubantiku, avakulwisi a mpaku ye minta-zumba ke basadilanga Nzambi ko. Kansi nze una mwan’antete muna kingana kasobele e ngindu zandi, owau oyau mpe bavilukidi e ntima yo sadila Nzambi. Vo i mfumu za mabundu bena nze mwana wanzole, bevovanga vo Nzambi besadilanga, kansi ke bevanganga wo ko. Yesu ovovele vo: “Kadi Yoane [wa Mvubi] wayiza kunusonga nzil’a nsongi, ke nwankwikila ko. Kansi avakulwisi a mpaku ye minta-zumba bankwikila, oyeno kana una vo nwamona wo, ke nwayibanza ko kimana nwankwikila.”—Matai 21:31, 32.

Yesu otele diaka kingana kiankaka. Owau Yesu osongele vo mfumu za mabundu bafungidi yamuna tezo kia yambula sadila Nzambi. Yimpumbulu kikilu. Yesu otele kingana: “Muntu mosi okunini mpatu a vinyu, ozungidi yo lûmbu, otimini mo e kaminu dia vinyu yo tunga mo nzo e zulu; osompekele yo kw’avati, i bosi wele kuna nsi ankaka. Vava kialuaka e nsungi, otumini ntaudi katambula e kunku kiandi kia mbongo a mpatu a vinyu kw’avati. Kansi, bambakidi, banwende, bansindikidi moko-moko. Ubatumini diaka ntaudi ankaka, oyandi mpe banwende vana ntu, bamfusulwisi e nsoni. I bosi, otumini diaka wankaka, oyandi bamvondele, otumini ayingi, akaka babawende, akaka babavondele.”—Maku 12:1-5.

O wantu bawidi e kingana kiaki, nga babakwidi e nsas’e? Nanga basungamene e mvovo mia luvezo mia Yesaya vava kavova vo: ‘E mpatu a vinyu a Yave a vu i nzo a Isaele, o Yuda i mpatu andi katoma zolanga. Unsongi kavingilanga mo, kinga, lubangamu kwandi.’ (Yesaya 5:7) E mvovo miami miele betela ye kingana kia Yesu. E mfumu a mpatu i Yave, e mpatu a vinyu i zula kia Isaele, yazungwa lupangu yo taninwa kwa Nsiku mia Nzambi. Yave watuma ngunza ziza longa nkangu andi yo kubasadisa mu yima e mbongo ambote.

Kansi “avati a mpatu” bawende e “ntaudi” zatumwa kwa yau, bavondele zo. Yesu osasidi vo: “Mosi diaka [mfumu a mpatu a vinyu] kakala yandi, i mwan’andi anzolwa. I bosi, untumini, oku vo, ‘O mwan’ame bekunzitisa.’ Kansi, avati bavovazianene vo, ‘I yandi ndioyu osala ye fwa dia mpatu a vinyu. Nwiza twamvonda, e fwa dikala se dieto.’ Bambakidi, bamvondele.”—Maku 12:6-8.

I bosi Yesu oyuvuidi vo: “Adieyi kevang’o mfumu a mpatu a vinyu?” (Maku 12:9) Mfumu za mabundu bavutwidi vo: “Vonda kekubavonda mu kuma kia bi wau yo sisa e mpatu a vinyu kw’avati ankaka, ana bekumvana e mbongo muna nsungi andi.”—Matai 21:41.

Lembi wo zaya, bavovele lufwasu lwa yau kibeni, kadi bena mu buka kia “avati a mpatu a vinyu” a Yave, i sia vo, zula kia Isaele. E mbongo ina Yave kazolele vo bayima i lukwikilu muna Mwan’andi, Masia. Yesu otadidi mfumu za mabundu, ubavovese vo: “Nga ke nwatanga kio ko e Sono kiaki: ‘E tadi dina diabembolwa kw’atungi i diau diakituka se mbuta tadi dia konko? Ediadi kwa Yave diatuka, diasivi omu meso meto.’” (Maku 12:10, 11) I bosi, Yesu otomene kiesesa diambu diadi muna mvovo emi: “Kiaki i kuma inuvovesele vo, e Kintinu kia Nzambi kikatulwa kwa yeno yo vewa kwa zula kiyimanga e mbongo andi.”—Matai 21:43.

Asoneki ye nganga zambuta babakwidi vo Yesu “mu kuma kiau katelele kingana kiaki.” (Luka 20:19) Muna kuma kiaki, bavangidi mawonso kimana bavonda Yesu, “mvingidi a vua.” Kansi bamwene nkangu o wonga, kadi bekwikilanga vo Yesu ngunza. Ozevo, ke balendele kumvonda ko.