Jesu wapera kusiya vapiri no vakuru-kuru vamweni vaimushoraya muthemberi kuti anoita mabasa ngo simba raani. Iyena wakavadhiringanisa musoro wovasiya vakadaro. Mapingurire a Jesu akavasia vacina no muromo. Tevere iyena wakaita muezaniso waiphetura zvavari kamare.

Jesu anoti: “Mundhu umwe wainga no vana vaviri. Wakabvunja wokutanga kuti: ‘Mwana, endai nyamasi kobata basa ku munda wo muuva.’ Yena wakadavira kuti: ‘Andidi.’ Sure kwabzo wakaphinduka woenda. Wakabvunja wocipiri bzimwebzo. Yena wakadavira kuti: ‘Ndinoenda baba.’ Kaveta aazivi kuenda. Vo vaviri, ngowapi wakaita bzo vaida baba?” (Mateu 21:28-31) Pacina mubvunjo i mwana wo kutanga waita kuda ka babake.

Ngo kudaro Jesu anobvunja vavengi vake kuti: “Ndinomubvunja bzokadi kuti vaxabisi no vanakaji voupombo vanozomutungamirira ku Umambo hwa Mwari.” Kutojanavo no mwana wokutanga, vashabisi no vanoita upombo pakutanga vacaishandirepi Mwari. Asi vakazokhauya zve wari vari kushandira Mwari. Mukusiana, vatungamiriri vo zviara vakatojana no mwana wo cipiri, vanojiita inga vashandiri va Mwari kasike avamushandiri. Jesu anoti: “Johani [Mubhabhatiji] wakaza komuri pa gwanja ro kururama; imwimwi amuzivi kumutenda. Kaveta vaxabisi no vanakaji voupombo vakamutenda. Imwimwi nomabzivona, amuzivi kuphinduka kuti mumutende.”—Mateu 21:31, 32.

Tevere, Jesu anoita muezaniso umweni. Wari iyena anovonesa kuti kuposa ko vatungamiriri vo zviara asipi kureja-rejavo hako kushandira Mwari. Vatori vandhu vakashata kamare. Jesu anoti: “Mundhu wakasima munda wake wo muuva. Wakaujivirira ngo rusosa, woca ndau yo kupsinira uva, wakaimisa dumba, kusarepo wakazwirana no varimi, woenda kunja. Ngari noyakwana, wakatuma muranda kuti aaxire ku varimi divi rake ro micero yo muuva. Ivona vakamubata, vomurova, vomuhwirija acina ciro mu nyara. Wakavatumirabze muranda umweni. Vakamutaka pa musoro, vomutuka. Wakavatumirabze muranda umweni, vomuuraya. No vamwenibze vazinji: vamweni vakarohwa, vamwenibze vakaurawa ndivona.”—Marco 12:1-5.

Kureva kuti vapurutani va Jesu vari kuzwisisa muezaniso uwu here? Zvingaita kuti vangarangarira masoko a Isaia waishora vaJudha eciti: “Munda wo muuva wa Tenji wo simba rese, i nyumba yo vaIsraeli, vandhu vo Judheya vari muti yawo yakasimwa, ino mutengo. Yena waivetera bzakarurama, asi vakabara bzokuposa.” (Isaia 5:7) Muezaniso wa Jesu auzivi kusiana maningi ndhambo. Mune wo munda ndi Jehovha, mu uvha i jinja ro vaIziraeri, vaiita inga vakajivirihwa, ngo Mutemo wa Mwari. Jehovha wakatuma vaporofeti kuti vajijise vandhu vake no kuvabesera kuti vabare mucero jakanaka.

Asi, “varimi” vakataka “varanda” vavakatumihwa, no kuvauraya. Jesu anodurujira kuti: “[Mune wo munda] wakasara na umwe; mwana wake wokudikana, wakamutumiravo kovari eciti: ‘Vanozoreremeja mwana wangu.’ Kaveta varimi vakabvunjana ngocavo kuti: ‘Uu nga nyautaka. Ngatimuuraye, kuti utaka hwakhona huzoita hwedu.’ Ngokudaro, vecimubata, vakamuuraya.”—Marco 12:6-8.

Ngo kudaro Jesu anobvunjisa kuti: “Muno wo nyumba anozoitenyi?” (Marco 12:9) Vatungamiriri vo zviara vanodavira kuti: “Anozouraya vakaxata vese vaya, munda wo muuva anozousiira varimi vamweni, vanozomupa mucero mu ngari yokudikana.”—Mateu 21:41.

Vacikazvizivi kuti vainga vecitojitonga vega kamare, ivona vanofananijwa no “varimi” vo “munda wo muuva” wa Jehovha, jinja ro vaIziraeri. Jehovha waivetera kuashara mucero yavaizobara yakadari inga kuva no rutendo kuna Mesia Mwana wake. Akasota vatungamiriri vo zviara, Jesu anoti:  “Amuzivi kujija Matahwa aya: ‘Buwe rakarambwa ngo vavaki ndirona rinozoita cine?’ Ndi Tenji wakaita ibzo, bzinoxamisa kotiri.” (Marco 12:10, 11) Ngo kudaro Jesu anojekesa eciti: “Ngo ndava yabzo ndinomubvunja kuti munozobvisihwa Umambo hwa Mwari, hwozopuwa vandhu vanozobara micero yokudikana.”—Mateu 21:43.

Vatari no vapiri vakuru vanozvibata kuti Jesu ari kuitira ivona muezaniso uwu. (Luka 20:19) Vanozosunga kuuraya Jesu, mugari wo “utaka.” Asi zvecivoneka kuti ivona vari kuthya vandhu vanovonaya Jesu inga muporofita, vapiri vakuru no vatari ava, avaeji kumuuraya hwendo huno.