Templopi yachachishaspan Jesusqa umalli sacerdotekunata juj umallikunatawan juj tapuywan upallachiran “¿ima autoridadwantaq qanri kaykunata ruwanki?” nispa niqtinku. Juj ejemplota willaspataq allinta rikuchiran chay runakuna imaynapunichus karanku chayta.

Jesusmi niran: “Juj runaqmi karan iskay wawankuna. Kuraq kaqman achhuykuspan niran: ‘Wawáy, kunan p’unchay uvas chajrapi llank’amuy’, nispa. Jinan payqa niran: ‘Manan riymanchu’, nispa, chay nisqanmanta pesapakuspan ichaqa riran. Sullk’a kaqman achhuykuspan kaqta nillarantaq. Paytaq niran: ‘Risaqmi, papáy’, nispa, ichaqa manan riranchu. ¿Iskayninkumanta mayqen kaqmi taytanpa munayninta ruwaran?”, nispa (Mateo 21:28-31). Chay runaq wawankunamantaqa kuraq kaqmi kasukuran.

Jinaspan Jesusqa chay umallikunata niran: “Impuesto cobraqkunapas qhelli kausaypi puriq warmikunapas qankunaq ñaupaykichistaraqmi Diospa gobiernonman rishanku. [Bautizaq] Juanmi qankunaman jamuran allin kaq ñanta yachachispa, qankunataq mana creerankichischu. Aswanpas impuesto cobraqkunan, qhelli kausaypi puriq warmikunan creeranku, qankunataq chayta rikushaspapas mana pesapakurankichischu creenaykichispaq”, nispa. Juchasapa runakunaqa chay kuraq wawa jinan juchankumanta pesapakuspa Diosta servisharanku, umallikunan ichaqa chay mana kasukuq sullk’a wawa jina karanku (Mateo 21:31, 32).

Chaymantapas chay umallikunaqa sinchi millaymi karanku. Chaymi Jesusqa juj ejemplotawan willaran. Niranmi: “Juj runan chajranpi uvasta plantaran, jinaspa muyuriqninta cercoran, uvas sarunatapas t’oqoran, [...] jinaspa llank’aqkunaman arrendopi qospa karu llaqtaman ripuran. Cosecha tiempo chayamuqtintaq juj kamachinta llank’aqkunaman kacharan chajraq rurusqanmanta tupaqninta juñumunanpaq. Chay llank’aqkunan ichaqa jap’ispa maqaykuranku, ch’usaq makintintataq qatirpariranku. Jinan chajrayoqqa jujnin kamachintañataq paykunaman kacharan, ichaqa umanta k’irispankun millayta k’amiykuranku. Wajmantan juj kaq kamachintañataq kachallarantaq, paytan ichaqa wañuchipuranku; kachallarantaqmi jujkunatapas, jinan wakinta maqaykuranku, wakintataq wañuchipuranku”, nispa (Marcos 12:1-5).

Chayta Jesús willaqtinqa uyariqninkunaqa yuyarirankuchá profeta Isaiaspa nisqanta, paymi niran: “Diospa uvas chajranqa Israel runakunan [...]. Payqa chanin ruwaytan maskharan, ichaqa runa wañuchiyllatan paykunapi tariran”, nispa (Isaías 5:7). Jesuspa willasqan ejemplopi uvas chajrayoqqa Jehová Diostan representaran, chajrataq Israel nacionta, cercotaq Diospa kamachikuyninkunata. Diosmi Israel nacionman profetankunata kacharan yachachinanpaq, yanapananpaq ima.

Jesuspa nisqan jina, chay ‘kamachikunatas’ ‘uvas chajrapi llank’aqkunaqa’ maqaykuranku wañuchiranku ima. Chaysi chajrayoqqa munakusqan churinta kachasqa: “Churiytaqa respetanqakuchá”, nispa. Llank’aqkunataq rikuruspa ninakusqaku: “Kaymi herencia chaskiqqa. Jaku wañuchimusun, jinan herencianqa noqanchispa kapunqa”, nispa. Jinas paykunaqa jap’ispa wañuchipusqaku (Marcos 12:6-8).

Chaymantan Jesusqa uyariqnin umallikunata tapuran: ‘¿Imananqataq uvas chajrayoqri chay llank’aqkunata?’, nispa (Marcos 12:9). Paykunataq niranku: “Millay kasqankuraykun paykunata wañuchinqa, chajrantataq arrendanqa chajraq rurusqanta tiempollanpi qoq llank’aqkunaman”, nispa (Mateo 21:41).

 Chayta nispaqa paykuna kikinkutan juchachakusharanku, paykunan karanku chay “llank’aqkuna” jina, Israel naciontaq karan chay uvas chajra jina. Jehová Diosqa munaranmi chay umallikuna Jesuspi iñinankuta, paykunan ichaqa mana iñirankuchu. Chaymi Jesusqa niran: “¿Manachu Diospa simin qelqaq nisqanta leerankichis? Chaypin nin: ‘Perqaqkunaq wijch’usqan rumin esquina jap’iq jatun kaq rumi kapun. Chayqa Jehová Diosmantan jamun, ancha admiranapaqtaqmi ñawinchispaqpas’”, nispa (Marcos 12:10, 11). Chaymantataq Jesusqa niran: “Diosmi qankunamanta gobiernonta qechusunkichis, jinaspa munayninta ruwaq runakunaman qopunqa”, nispa (Mateo 21:43).

Chay umallikunataq repararanku chay ejemplo churasqanpi “paykunamanta rimashasqanta”, chaymi chay ratopi jap’iyta munaranku chay ejemplopi ‘herencia chaskiqta’ jina, ichaqa runakunatan manchakuranku, Jesusta profetapaqpuni jap’isqankurayku (Lucas 20:19).