I te hiero, aita ˈtura i taa faahou i te mau tahuˈa tiaau e aratai ati Iuda e nafea ia pahono ia Iesu, i to ratou faahaparaa i te mana e rave ai oia i te mau mea. Mamû noa ˈtura ratou. Horoa ˈtura oia i te hoê faahohoˈaraa o te faaite maitai i to ratou huru mau:

“E piti tamarii ta te hoê taata, haere atura oia i te matahiapo ra e na ô atura: ‘Ta ˈu tamaiti, i teie mahana e haere oe i te faaapu vine e rave i te ohipa.’ Pahono maira te tamaiti: ‘Eita.’ I muri iho râ, tatarahapa ihora oia e haere atura. Tapiri atura te metua tane i te teina, e na reira atoa ˈtura i te parau i te teina, o tei pahono mai: ‘E.’ Aita râ oia i haere. O vai o raua tei rave i te hinaaro o to ˈna metua tane?” (Mataio 21:28-31) O te tamaiti matahiapo iho â ïa.

Na ô atura Iesu i te feia patoi: “Oia mau ta ˈu e parau atu: O te mau titau tute e te mau vahine taiata te na mua ˈtu ia outou i te ô i roto i te Faatereraa arii a te Atua.” I te omuaraa aita te mau titau tute e vahine taiata i tavini i te Atua. I muri aˈe râ, mai te tamaiti matahiapo, ua tatarahapa ratou, a tavini atu ai i te Atua. Mai te teina râ te mau aratai haapaoraa, e faahua tavini ra i te Atua. Parau atura Iesu: “Ua haere mai hoi Ioane [Bapetizo] ia outou ra ma te faaite i te eˈa o te parau-tia, aita râ outou i tiaturi ia ˈna. Te mau titau tute râ e te mau vahine taiata, oia ïa. Outou râ o tei ite i te reira, aita ïa i tatarahapa a tiaturi atu ai ia ˈna.”—Mataio 21:31, 32.

Faatia ˈtura Iesu i te tahi atu faahohoˈaraa no te faaite ïa e mea ino roa atoa te mau aratai haapaoraa aita e tavini ra i te Atua. Ua parau Iesu: “Ua tanu te hoê taata i te vine, aua ˈtura, pao ihora i te hoê apoo taataahiraa vine, faatia aˈera i te hoê pare tiairaa, horoa tarahu atura i ta ˈna faaapu i te tahi feia faaapu, e reva ˈtura i te ara. I te tau ootiraa vine, tono ihora oia i te hoê tavini i te feia faaapu ia horoa mai ratou i ta ˈna tuhaa vine. Haru aˈera te feia faaapu i te tavini, rutu ihora ia ˈna e faahoˈi maira ia ˈna ma te ore e horoa mai i te vine. Tono faahou atura te fatu i te tahi atu tavini, tupai ihora ratou i te upoo o taua tavini ra e faahaama ˈtura ia ˈna. Tono atura oia i te tahi â tavini, e taparahi pohe atura ratou i taua tavini ra. Mea rahi â ta ˈna i tono atu, ua rutuhia vetahi e ua haapohehia te tahi atu.”—Mareko 12:1-5.

E taa anei i te feia e faaroo ra ta Iesu faahohoˈaraa? Ua haamanaˈo paha ratou i te parau faahapa a Isaia: “O taua ô vine a Iehova sabaota ra, o te utuafare ïa o Iseraela; e te mau taata no Iuda ra, o tana ïa ohi popou: e ua tiai hoi oia i te parau au, e inaha, o te faafao [aore ra parau-tia ore] tei itea.” (Isaia 5:7) I roto atoa i ta Iesu faahohoˈaraa, o Iehova te fatu fenua, o te nunaa Iseraela te faaapu vine tei auahia e tei paruruhia e te ture a te Atua ia Mose. Ua tono Iehova i te mau peropheta no te haapii e no te tauturu i to ˈna nunaa ia faatupu i te hotu maitai.

Ua rave ino râ e ua haapohe “te feia faaapu” i te “mau tavini” tei tonohia ˈtu. Faataa ˈtura Iesu: “E i te hopea, tono atura ïa te fatu vine i ta ˈna tamaiti here i te feia faaapu, a na ô ai: ‘E faatura ratou i ta ˈu tamaiti.’ Na ô aˈera râ taua feia faaapu ra te tahi i te tahi: ‘Teie te taata o te fatu i teie faaapu, mai haere anaˈe e haapohe ia ˈna, a fatu atu ai tatou i teie faaapu.’ Haru aˈera ratou ia ˈna, [e] haapohe ihora.”—Mareko 12:6-8.

Ui atura Iesu: “Eaha ta te fatu vine e rave?” (Mareko 12:9) Pahono maira te mau aratai haapaoraa: “No to ratou ino, e haapohe roa ïa oia ia ratou, a horoa tarahu atu ai i te faaapu vine i te tahi atu feia faaapu o te horoa ˈtu i ta ˈna tuhaa vine i te taime au.”—Mataio 21:41.

Na ratou noa iho â i faautua ia ratou iho, o ratou  atoa hoi “te feia faaapu” o ta Iehova “faaapu vine,” te nunaa Iseraela. Te hotu ta Iehova i tiai ia faatupu teie feia faaapu, o te faaroo atoa ïa i ta ˈna Tamaiti, te Mesia. Hiˈo tia ˈtura Iesu i te mau aratai haapaoraa e na ô atura: “Aita outou i taio aˈenei i teie parau tei papaihia: ‘Te ofai ta te feia patu fare i faarue, ua riro mai ïa ei ofai tihi. No ǒ mai te reira ia Iehova ra, e mea faahiahia roa no matou’?” (Mareko 12:10, 11) Na ô roa ˈtura oia: “No reira vau e parau atu ai: E iritihia te Faatereraa arii a te Atua ia outou e e horoahia i te hoê nunaa o te rave i to te Atua ra hinaaro.”—Mataio 21:43.

Taa ihora i te mau papai parau e tahuˈa tiaau e “no ratou te faahohoˈaraa ta [Iesu] i parau.” (Luka 20:19) Rahi roa ˈtura to ratou hinaaro e haapohe ia ˈna, te taata mau o te fatu i te faaapu. Aita râ ratou i tamata i te haapohe ia ˈna i taua taime ra no to ratou mǎtaˈu i te nahoa o te tiaturi ra e e peropheta Iesu.