Amu ésaé nkañete Yésus é nga ke e memane, a ke ôsu a belane minkana asu na a liti avale bôte bescribe a betebe ôsu ya ñyebe be né. Ajô te, ba jeñe na be wôé nye. (Luc 20:19) Ve Yésus a ngenane te mane kulane mimboone miap mise. A beta kane nkana ôfe a jô’ô na:

“[Éjôé] ya yôp je afunan ane njô bôt éziñ a nga kuli bidi éyoñ mone wé a nga luk. Ane a nga lôme bebo bisaé bé be ke loene bôt a nga bañete, be zu di bidi [abô’ô aluk] amu mon a nga luk: ane be nga bene zu.” (Matthieu 22:2, 3) Yésus a taté nkana wé a kobô’ô ajô ya “[Éjôé] ya yôp.” Nde ñhe, “njô bôt” a yiane fo’o bo Yéhôva Zambe émien. Za ki a ne mone njô bôt, a beza be ne bôte ba bañete abô’ô aluk? Bia ji’a beta wô’ô valé na, mone njô bôt a ne Mone Yéhôva, nyô a kane nkana wu, a na bôt ba te bañete be ne ba ba ye tabe a Mon Éjôé ya yôp.

Beza ba taté bañete? Bi tame fas: beza mbe Yésus a minlômane mié be nga taté kañete foé y’Éjôé? Bejuif. (Matthieu 10:6, 7; 15:24) Ayoñ ete é nga kañese élate y’Atiñ é nga bobane mbu 1513 Ô.É.J., ane be nga bi fane ya bo “ayoñe beprêtre.” (Nkôlan 19:5-8) Ve be nga bañete be asu “abo’o aluk” éyoñ évé? Mbañete ôte ô nga taté mbu 29 .É.J., éyoñe Yésus a nga taté na a kañete foé y’Éjôé ya yôp.

A aval avé abui bone b’Israël be nga nyoñe mbañete ôte? Avale Yésus a te jô, “be nga bene zu.” Bebé betebe ôsu bese ya ñyebe a abui bôt be nga bene nyoñe nye ane Messie a ane nyô Zambe a nga top ane Njôô.

Ve Yésus a liti na Bejuif ba ye beta bi fane fe a jô’ô na: “Ane [njô bôt] a nga beta lôme bebo bisaé befe, a jô be na, Katane bôt me nga bañete na, Tama yenan, me maneya kôme bidi; me maneya wôé binyaka biam a betit be ne  avoñ; biôm bise bi nto nkôman: zaka diane bidi ya aluk. Ve be nga biasé ajô te a ke be nga ke, wua a ke afupe dé, nyô mbo’ a ke kuan abom; bevo’o be nga bi bebo bisaé bé, a dañe kpwe’ele be, a wôé be.” (Matthieu 22:4-6) Jam ete da lu’an a di da ye boban éyoñ ba ye telé akônda Bekristen. Éyoñe te, Bejuif ba ye beta bi fane ya bo benyoñe ngap ya Éjôé Zambe. Ve da bebé bese ba ye ben mbañete ôte, a ba ye kui kui na be tibili ‘bebo bisaé be njô.’​—Mam Minlôman 4:13-18; 7:54, 58.

Jam avé da ye kui ayoñ ete? Yésus a jô na: “Ane njô bôt a nga yaa; a lôme bezimbi bé be ke wôé bewôé bôte bete, a di’i nlame wop.” (Matthieu 22:7) Bejuif be nga tôbane jam ete mbu 70 É.J., éyoñe Beromain be nga mane zu di’i Jérusalem, “nlame wop.”

Ye njô bôt a nga ye su’u ve valé, teke bañete bôte befe? Teké’é. Yésus a ke ôsu a jô na: “Ane [njô bôt] a nga jô bebo bisaé bé na, Biôme ya aluk bi nto nkôman, ve bôt me nga bañete be nji bo bôt be ayiane zu. Ajô te, kelane ma’ane mezen, abime bôt mi aye yen, lo’ene be be zu di bidi ya aluk. Ane bebo bisaé bete be nga ke mezene mezen, a kôane bôte bese abim be nga yen, bôt be ne abé a ba be ne mvaé: nalé nda be nga luk é nga jaé beyeñ.”​—Matthieu 22:8-10.

Nalé a nga kôme yené, éyoñe Pierre a nga taté na a volô Begentil, bôte be nji bo Bejuif, na be bo Bekristen. Mbu 36 É.J., Corneille, évete bezimbi ya Rome a nda bôte jé ése be nga bi mbamba nsisim, a bi fe fane ya nyiine Éjôé ya yôp Yésus a nga jô je.​—Mam Minlôman 10:1, 34-48.

Yésus a liti na “njô bôt” a ye yene bôte bese ba ye so abô’ô mvaé. Amu a jô na: “Éyoñ njô bôt a nga nyi nda a fombô beyeñ, a nga yene môte wôé, te yen a be’e ngômesane ya aluk: ane a nga jô nye na, A mô, wo ate zu nne te ngômesane ya aluk amu jé? Ane a nga ku évô. Ane njô bôt a nga jô bebo bisaé na, Ka’ane nye mo a mebo, a wua nye dibi e ne atan; vôm ate a ye bo ve yi a late mesôñ. Amu abui bôt e ne nloen, ve ba be ne ntoban, be ne tyôtyoé.”​—Matthieu 22:11-14.

Betebe ôsu ba vô’ôlô mame Yésus a kobô be nji tu’a wô’ô jôm a kômbô jô, nge atinan ébien ya jam ete. Ve jame da, ba wô’ô nye mbia ôlun a be bili nkômbane ya ve ngule jap ése na be wôé nye, amu a bo na be tebe mbia été.