Timpuh pengawa nginjil Jesus ba dunya nyauka abis. Lebuh maya nya, iya terus ngena jaku sempama kena mantaika penyai bala penulis Adat sereta bala tuai imam. Nya alai, sida deka munuh Jesus. (Luke 20:19) Diatu, Jesus madahka siti da agi sempama.

Jesus madah: “Perintah serega tau dibandingka enggau siku raja ke nyediaka pengerami tikah ke anak lelaki iya. Iya ngasuh bala ulun iya mai orang ke udah dikangau datai ngagai pengerami tikah nya. Tang sida enggai datai.” (Matthew 22:2, 3) Jesus ngepunka sempama nya enggau nyebut pasal “Perintah serega.” Nya alai, “raja” merujuk ngagai Petara Jehovah. Anak lelaki raja nya, Jesus. Lalu orang ke dikangau nya, orang ke deka merintah enggau Jesus ba serega.

Sapa keterubah dikangau ngagai Perintah serega? Sida nya orang bansa Judah, laban sida udah ninga pasal Perintah serega ke ditusui Jesus enggau bala rasul. (Matthew 10:6, 7; 15:24) Pia mega, ba taun 1513 S.M., bansa Judah udah ngaga sempekat Adat Moses. Nya alai, sida meh orang keterubah ke nerima peluang nyadi sebagi ari “perintah ke dipegai bala imam.” (Pemansut 19:5-8) Tang kemaya sida deka dibai ngagai “pengerami tikah” nya? Sida berengkah dibai kenyau ari taun 29 M. lebuh Jesus berengkah nginjil pasal Perintah serega.

Tang nama reaksi mayuh orang Israel lebuh sida dibai? Baka ku Jesus nya, “sida enggai datai.” Mayuh ari bala tuai pengarap sereta orang Israel enggai nerima Jesus nya Messiah sereta Raja ke dipilih Petara.

Taja pia, Jesus nunjukka orang Judah deka diberi siti da agi peluang. Ku iya: “Sekali agi [Raja nya] nganjung bala ulun iya ti bukai. Ku iya, ‘Padahka ngagai orang ke udah dikangau datai ngagai pengerami tikah: “Dinga kita! Aku udah nyediaka pengerami makai besai. Jelu sapi aku enggau anak sapi aku ti gemu udah disayat, lalu semua utai udah sedia magang. Datai meh kita ngagai pengerami tikah.”’ Tang sida enda ibuhka  tesau nya lalu mupuk ngagai endur bukai, siku ke ladang, siku ngereja pengawa dagang iya; lalu ke bukai nangkap bala ulun raja nya, malu lalu munuh sida.” (Matthew 22:4-6) Tu meh utai ke nyadi lebuh raban gempuru Kristian ditumbuhka. Maya nya, orang Judah agi dibai tama ngagai Perintah serega, tang mayuh ari sida enggai. Sida indah ngemediska ‘bala ulun raja.’—Surat Kereja Rasul 4:13-18; 7:54, 58.

Nya alai, nama deka nyadi ngagai orang Judah? Jesus madah: “Raja nya lalu ringat. Iya ngasuh bala soldadu iya munuh bala pemunuh nya, lalu nunu nengeri sida.” (Matthew 22:7) Utai tu nyadi ba taun 70 M., lebuh orang Rome ngerusak Jerusalem, iya nya “nengeri sida.”

Taja pan sida nulak raja, tang kati bisi orang bukai ke deka dibai ngagai Perintah serega? Bisi. Jesus nerangka mayuh agi dalam sempama iya: “Udah nya [raja] bejaku ngagai bala ulun iya: ‘Pengerami tikah udah sedia, tang orang ke dikangau datai ngagai pengerami tikah enda layak datai. Nya alai, mupuk kita ngagai jalai besai, lalu bai sapa-sapa ke ditemu kita datai ngagai pengerami tikah tu.’ Bala ulun iya lalu mupuk ngagai semua jalai. Sida ngempuruka semua orang ke ditemu sida, orang ke manah enggau orang ke jai. Nya alai, balai tikah nya nyau penuh laban bala temuai.”—Matthew 22:8-10.

Maya deka datai lebuh rasul Peter deka nulung orang ke datai ari bansa bukai, enggau orang ke enda megai pengarap Judah nyadi orang Kristian. Ba taun 36 M., siku pemesai soldadu Rome ke benama Kornelius enggau ruang bilik iya nerima kuasa kudus Petara. Enggau nya, sida bisi peluang merintah enggau Jesus ba Perintah serega.—Surat Kereja Rasul 10:1, 34-48.

Udah nya, Jesus madahka ukai semua temuai ke datai ngagai pengerami tikah nya deka layak diterima “raja.” Ku iya: “Tang lebuh raja tama, deka meda bala temuai, iya tepedaka siku lelaki ke enda ngena gari ti patut ngagai pengerami nya. Iya lalu bejaku ngagai orang nya: ‘Unggal, baka ni ku nuan ulih tama kitu, taja pan enda ngena gari ti patut?’ Orang nya enda nyaut. Udah nya, raja lalu bejaku ngagai bala ulun iya: ‘Tanchang kaki jari iya lalu buai iya ke luar ngagai endur ti petang. Dia meh alai iya deka nyabak sereta begerit ngeli.’ Laban mayuh ke dikangau, tang mimit aja ke dipilih.”—Matthew 22:11-14.

Bala tuai pengarap ke ninga jaku Jesus engka enda faham utai ti disebut iya. Tang sida ringat lalu deka munuh iya.