Wau vo e salu kia Yesu kilueke ku mfoko, mu sadila kena yingana mu senzeka o bi wa asoneki ye nganga zambuta. I dianu bazolele kumvondela. (Luka 20:19) Kansi o Yesu kamene senzeka o bi wau ko. Otele kingana kiankaka, oku vo:

“E Kintinu kia zulu kilenda tezaneswa yo ntinu ona okubikidi nkinzi a longo lwa mwan’andi. Otumini ntaudi zandi benda susumuna awana babokelwa kuna nkinzi a longo, kansi ke bazolele kwiza ko.” (Matai 22:2, 3) Kuna lubantiku lwa kingana kiandi, Yesu ovovele “Kintinu kia zulu.” Dialudi vo, Yave wa Nzambi yandi i “ntinu.” Ozevo, nani i mwan’a ntinu? Aki nani babokeleso ku nkinzi a longo? Ke dina kwandi mpasi ko mu zaya o mwan’a ntinu: i Mwan’a Yave, yandi otanga e yingana yayi yawonso. Vo i awana babokeleso ku nkinzi i yau beyala kumosi yo Mwana muna Kintinu kia zulu.

Aki nani bateka bokeleswa? Kwa aki nani o Yesu ye ntumwa zandi besamunwinanga e nsangu zambote? Kwa Ayuda. (Matai 10:6, 7; 15:24) E zulu kia Ayuda batambulwila e kangu dia Nsiku muna mvu wa 1513 V.T.K., muna mpila yayi i bakitukila se wantu antete muna “kimfumu kia nganga.” (Luvaiku 19:5-8) Kansi, nkia ntangwa babokeleswa ku “nkinzi a longo”? Babokeleswa muna mvu wa 29 wa tandu kieto, vava Yesu kayantika samuna e nsangu za Kintinu kia zulu.

Nga Aneyisaele awonso batambulwila e mboka yayi? Yesu wavova vo: “ke bazolele kwiza ko.” Ndonga muna mfumu za mabundu yo nkangu ke bakwikila ko vo Yesu i Masia ye Ntinu wasolwa kwa Nzambi.

Kansi Yesu osongele vo Ayuda lau diankaka bakala diau, ovovele vo: “[o ntinu] Otumini diaka ntaudi zankaka, oku vo, ‘Nuzayisa awana babokelwa vo: “Nkubikidi madia mame, mvondese ngombe ye twelezi yame yamazi, yawonso imene kubikwa. Nwiza ku nkinzi a longo.”’ Kansi, ke bavuidi wo mfunu ko, omosi wele kuna mpatu andi, wankaka wele muna kinkita kiandi; kansi, ankaka babakidi ntaudi zandi, babawende yo kubavonda.” (Matai 22:4-6) Ediadi difwananene ye dina diabua vava e nkutakani ya Akristu yavangama. Muna ntangwa yayina, Ayuda bakala ye lau diakala muna Kintinu, kansi ndonga muna yau ke batambula mboka yayi ko, bavezele nkutu ‘ntaudi za ntinu.’—Mavangu 4:13-18; 7:54, 58.

Aweyi e diambu dia zula kiaki diafokokele? Yesu ovovele vo: “O ntinu ofungidi makasi, otumini vu kia makesa mandi, bavondele avondi awaya yo yoka e vata diau.” (Matai 22:7) Ayuda bamona e ndungan’a mvovo miami muna mvu wa 70 wa tandu kieto, vava makesa ma Roma bafwasa e “mbanz’au,” Yerusaleme.

Wau vo Ayuda ke batambulwila e mboka ya ntinu ko, nga disongele vo o wantu ankaka ke balendi bokeleswa ko e? Yesu kavovele dio muna kingana kiandi ko. Tala dina kavovele: “I bosi, [o ntinu] ovovese ntaudi zandi vo, ‘O nkinzi a longo ukubamene, kansi awana babokelwa ke bafwanukinu wo ko. Dianu vo, nwenda muna mpambu za nzila, nubokela awonso nusolola beza ku nkinzi a longo.’ Ntaudi zazi zele muna mpambu za nzila, babokele awonso basolwele, wantu ambi ye ambote; e seka dia nkinzi a longo dizele ye awana bavuende kuna meza.”—Matai 22:8-10.

Kuna kwalanda, ntumwa Petelo wayantika sadisa Esi Zula, i sia vo, awana bena vo ke mingutukila mia Kiyuda ko. Petelo wabasadisa bakituka se Akristu akieleka. Muna mvu wa 36 wa tandu kieto, Koneleo wa mfidi a makesa ma Roma kumosi ye esi nzo andi, batambula Mwan’a Nzambi. Muna mpila yayi bavua e fulu muna Kintinu kia zulu kina o Yesu kavovele.—Mavangu 10:1, 34-48.

Yesu osongele mpe vo, ke awonso ko bezidi ku nkinzi a longo betondwa kwa “ntinu.” Ovovele vo: “O ntinu vava kakotele katala ana bavuende kuna meza, omwene muntu mosi walembi vuata mvuatu a longo. Unyuvuidi vo, ‘E nkwame, aweyi oluakidi ovava kondwa kwa mvuatu a longo?’ Kavutwidi diambu ko. I bosi, o ntinu ovovese selo yandi vo, ‘Nunkanga moko yo malu, nuntuba kuna mbazi kuna tombe. I kuna kedidila yo kwetesa meno.’ “Kadi ndonga babokelwa, kansi akete kaka basolwa.”—Matai 22:11-14.

Mfumu za mabundu ke babakwidi ko mawonso man’o Yesu kavovele. Ke bayangalele ko, bakinu kaka yo makasi ye bazolele vonda o muntu okubafusulwisanga e nsoni za mpila yayi.