Kaka tij Yesu mar yalo ochomo e gikone, e kaka omedo goyo ngeche ma elo kit jondiko gi jotend-jodolo. Kuom mano, jogo dwaro nege. (Luka 20:19) Kata kamano, pod nitie timbe mamoko ma Yesu dwaro elo e wigi. Ogoyo ngero machielo mondo oelgo kitgi.

Owacho kama: “Pinyruodh polo inyalo pim gi ruoth moro ma noloso nyasi mar kend ne wuode. Mi nooro wasumbnine mondo oluong joma ne ogwel e nyasino, kata kamano jogo ne ok dwar biro.” (Mathayo 22:2, 3) Weche ma Yesu chakogo ngerono gin: “Pinyruodh polo.” Omiyo, nyaka bed ni “ruoth” miwuoyoe kanyo en Jehova Nyasaye. To nade wuod ruodhno kod jogo mogwel e nyasi mar kendno? Ok tek fwenyo ni wuod ruodhno ochung’ ne Wuod Jehova, ma e jal ma goyo ngerono, kendo ni jogo mogwel e joma biro locho kanyachiel gi Wuowino e Pinyruodh polo.

Gin jomage ma ne onego ogwel mokwongo? Wanyalo yudo dwoko kuom penjo kama: ‘Gin jomage ma Yesu kod jootene osebedo ka yalonegi wach Pinyruoth?’ Jo-Yahudi e ma gisebedo ka giyalonegi. (Mathayo 10:6, 7; 15:24) Ogandano ne oyie donjo e singruok mar Chik e higa 1513 ka Kristo podi, kendo mano nomiyo gibedo e kidieny mokwongo mag joma ne dhi bedo “pinyruoth ma jodolo.” (Wuok 19:5-8) Kata kamano, en karang’o sie ma ne idhi luonggie ne “nyasi mar kend”? Nyaka bed ni ne ochak gwelgi e higa mar 29 kane Yesu ochako yalo wach Pinyruodh polo.

To ere kaka thoth Jo-Israel ne orwako wachno? Mana kaka Yesu osewacho, “jogo ne ok dwar biro.” Thoth jotend din kod oganda ne ok oyie ni en e Mesia kendo ni en e jal ma Nyasaye noseyiero mondo obi obed Ruoth.

Kata kamano, Yesu nyiso ni Jo-Yahudi ne dhi yudo thuolo machielo mar biro e nyasino. Owacho kama: “Kendo [ruodhno] nooro wasumbni mamoko kowacho niya: ‘Nyisuru joma ogwelgo kama: “Neuru! Aseiko chiemo, oseyang’ ruedhi gi jamni machwe kendo gik moko duto oseik. Biuru e nyasi mar kend.”’ Kata kamano, ne ok gidewo mi ne gidhi mana e yoregi, moro e puothe, machielo e ohande; to modong’ nomako  wasumbninego mi ne gitimonegi timbe achaya kendo ne ginegogi.” (Mathayo 22:4-6) Mano chalo gi gima ne dhi timore ka osechak kanyakla mar Jokristo. E kindeno, Jo-Yahudi pod ne dhi bedo gi thuolo mar bedo jokanyo mag Pinyruoth. Kata kamano, thothgi ne ok orwako luongno kendo ne gisando kata mana ‘wasumbni mag ruodhno.’​—Tich Joote 4:13-18; 7:54, 58.

Tamruok luongno nokelo ne ogandano ang’o? Yesu lero kama: “Ruoth nobedo gi mirima mi nooro jolwenyne kendo ne ginego jonekgo mi giwang’o taondgi.” (Mathayo 22:7) Mano ne otimore ne Jo-Yahudi e higa 70 kane Jo-Rumi obiro moketho “taondgi” mar Jerusalem.

Be bedo ni ne gitamore rwako luong mar ruodhno nyiso ni koro onge ng’ato ang’ata kuomgi ma ne idhi gwel? Ok en kamano ka luwore gi ngero ma Yesu nogoyono. Yesu dhi nyime gi ngerono niya: “Eka [ruodhno] nowacho ne wasumbnine ni, ‘Nyasi mar kend oseikore, to joma ogwel ok nowinjore. Kuom mano, dhiuru e nderni ma wuok e taondni, kendo ugwel ng’ato ang’ata ma uyudo e nyasi mar kend.’ Eka wasumbnigo nodhi e nderni mi ne gichoko ji te ma ne giyudo, maricho gi mabeyo duto, kendo ot ma nitimoe nyasi mar arusno ne opong’ gi joma chiemo.”​—Mathayo 22:8-10.

Ber ng’eyo ni e kinde ma bang’e, jaote Petro ne dhi konyo joma oa e ogendni mamoko mondo gibed Jokristo madier. Jogo ok ne gin jo anyuola mar Jo-Yahudi, to bende ne ok gin joma nolokore modonjo e din mar Jo-Yahudi. E higa mar 36, roho mar Nyasaye ne olor kuom jatend-askeche mag Rumi ma nyinge Kornelio kaachiel gi joode. Mano nomiyo gin bende gibedo joma geno locho e Pinyruodh polo ma ne Yesu owuoyoe.​—Tich Joote 10:1, 34-48.

Yesu ok nyis ni gikone jogo duto mobiro e nyasino biro bedo joma owinjore e wang’ “ruoth.” Owacho kama: “Ka ruoth nobiro nono welo, noneno ng’ato kanyo ma ok norwakore gi nanga mar kend. Omiyo, nopenje kama: ‘Omera, ere kaka nende idonjo kae ka ok irwako nanga mar kend?’ Dhoge nomoko. Eka ruoth nowacho ne jotichne ni, ‘Tueuru lwetene gi tiendene kendo uwite oko e mudho. Kanyo e kama ywagruokne kod muodo lekene nobedie.’ Nimar nitie joma ng’eny mogwel, to joma nok e moyier.”​—Mathayo 22:11-14.

Nyalo bedo ni jotend din-go ok winj tiend weche duto ma Yesu wachogo. Kata kamano, ok gimor gi wechego kendo giramo ni nyaka to gineg jal ma kelonegi wich-kuot kuom elo kitgino.