Wañuchisqa kanan p’unchay achhuykamusqanman jinan Jesusqa ejemplokunata willaspa rikuchiran umalli sacerdotekuna juj yachachiqkunapas millay kasqankuta. Chaymi paykunaqa wañuchiyta munaranku (Lucas 20:19). Jesusmi ichaqa juj ejemplotawan willaran.

Niranmi: “Janaq pacha gobiernoqa kaymanmi rijch’akun: Juj reymi casarakuy fiestata qhari wawanpaq ruwaran. Chay reymi kamachinkunata kacharan casarakuy fiestaman invitasqa runakunata wajamunankupaq, paykunan ichaqa mana jamuyta munarankuchu”, nispa (Mateo 22:2, 3). Janaq pacha gobiernomantataq Jesús rimasharan chayqa, chay reyqa Jehová Diostan representaran, chay ‘qhari wawantaq’ Jesusta representaran, chay invitasqa runakunataq janaq pachapi Jesuswan kanankupaq invitasqakunata representaran.

¿Pikunatan ñaupaqta invitakuran? Judío runakunatan. Paykunatan Jesusqa apostolninkunawan astawan predicaranku (Mateo 10:6, 7; 15:24). Paykunawanmi Diospas rimanakuran 1513 watapi m.J.j. Chhaynaqa paykunan ñaupaq “sacerdotekuna” Diospaq kananku karan (Éxodo 19:5-8). Paykunataqa 29 watapi Jesús predicayta qallarisqanwanmi invitakuran chay “casarakuy fiestaman”.

Ichaqa yaqa llapankun judío umallikuna, judío runakunapas mana chay invitacionman “jamuyta munarankuchu”. Chaymi mana iñirankuchu Jesús Diospa churasqan rey kasqanpi.

Diosmi ichaqa juj oportunidadtawan qoran. Chaymantan Jesús niran: “[Chay reyqa] juj kamachinkunatan wajmanta kachallarantaq, paykunatan niran: ‘Invitasqakunata nimuychis: “Wayk’uchiniñan mijunata, [...] jamuychis casarakuy fiestaman”’, nispa. Invitasqakunan ichaqa mana uyariqpas tukurankuchu, aswanmi ripuranku wakin chajrankuman, wakintaq negocionkuman; wakintaqmi reypa kamachinkunata jap’ispa millayta k’amiykuranku maqaykuranku ima, jinaspa wañuchipuranku”, nispa (Mateo  22:4-6). Cristiano iñiq t’aqa qallariqtinmi Diosqa wajmanta judiokunaman chay invitacionta qoran, paykunan ichaqa yaqa llapanku mana uyarikurankuchu, wakinqa Diospa kachasqan ‘kamachikunataqa’ qatikacharankuraqmi kanpas (Hechos 4:13-18; 7:54, 58).

¿Imatan Dios ruwaran chaykuna pasaqtin? Chaymantan Jesús niran: ‘Reymi sinchita phiñakuran, chaymi soldadonkunata kacharan, paykunataq chay wañuchiqkunata wañuchipuranku, llaqtankutapas kanaykapuranku’, nispa (Mateo 22:7). Chaymi junt’akuran 70 watapi Roma soldadokuna Jerusalenta thunisqankuwan.

Chhaynaqa, ¿pikunan chay invitacionman riranku? Chaymantan Jesús niran: “Chaymantataq reyqa kamachinkunata niran: ‘Casarakuy fiestapaqqa tukuy imapas listoñan kashan, invitasqakunan ichaqa mana chaypaq jinachu karanku. Chayrayku, jatun ñankunaman riychis, jinaspa llapa tarimusqaykichis runakunata [...] wajamuychis’, nispa. Chaymi chay kamachikunaqa ñankunaman lloqsispa llapa tarisqanku runakunata juñumuranku, millay runakunaña allin runakunaña karanku chaypas; chhaynapin casamiento wasiqa invitasqakunawan junt’a kasharan”, nispa (Mateo 22:8-10).

Chaymi junt’akuran mana judío runakunamanpas chay invitacionta qokusqanwan. 36 watapin apóstol Pedroqa Roma llaqtayoq Cornelio runata familiantawan yanaparan cristiano kanankupaq, chay kutipin paykunapas santo espirituta chaskiranku, chhaynapi Diospa gobiernonman jaykunankupaq (Hechos 10:1, 34-48).

Ichaqa manan llapan chay invitacionman riqkunachu Diospa chaskisqan kananku karan, chaymi Jesusqa niran: “Invitasqa runakunata qhawaq jaykuspanmi reyqa chaypi rikuran casarakuy p’achawan mana p’achasqa runata. Chaymi reyqa niran: ‘Amigo, ¿imaynapitaq kaymanri jaykumuranki casarakuy p’achawan mana p’achasqa?’, nispa. Paytaq ch’inlla karan. Jinan reyqa kamachinkunata niran: ‘Makintawan chakintawan wataruspa tutayaq jawaman wijch’umuychis. Chaypin payqa waqanqa, mana imanakuyta atispataq kiruntaraq k’achachachinqa’, nispa. Askhan invitasqakunaqa, pisillataqmi ajllasqakunaqa”, nispa (Mateo 22:11-14).

Jesusta uyariq umallikunaqa manachá allintachu entienderanku chay ejemplo willasqanta. Chaywanpas paykunaqa ima jinallañan munasharanku Jesús wañuchiyta, chhaynapi amaña paykunata p’enqayman churananpaq.