I te taimi ko pili ei o oti atu a te taviniga a Iesu, ne tumau eiloa a ia i te fakaaogaga o tala fakatusa ke fakaasi faka‵sau atu a failautusi mo faitaulaga pule. Tela la, ne ma‵nako latou ke tamate a ia. (Luka 20:19) Kae ne seki gata atu eiloa a te fakaasi faka‵sau atu ne Iesu o latou. Ne fakamatala atu ne ia a te suā tala fakatusa:

“A te Malo o te lagi e mafai o fakatusa ki se tupu telā ne fakatoka ne ia se ‵kaiga o te avaga a tena tama. Ne uga ne ia ana pologa ke ka‵laga atu ki tino kolā ne ‵kami ki te ‵kaiga o te avaga, kae ko latou ne seki fia olo ki ei.” (Mataio 22:2, 3) Ne kamata ne Iesu tena tala fakatusa ki “te Malo o te lagi.” Tela la, a te “tupu” e ‵tau eiloa o fakasino atu ki a Ieova te Atua. Kae e a te tama a te tupu mo tino kolā ne ‵kami ki te ‵kaiga o te avaga? E se faigata foki ke iloa aka me i te tama a te tupu, ko te Tama a Ieova, telā e fakamatala atu ne ia te tala fakatusa, kae iloa foki me i tino ‵kami, ko tino kolā ka ‵kau fakatasi mo te Tama i te Malo o te lagi.

Ko oi la a tino muamua ne ‵kami? Ia, ko oi ne talai atu ki ei a Iesu mo te kau apositolo e uiga ki te Malo? Ko te kau Iutaia. (Mataio 10:6, 7; 15:24) Ne talia ne te fenua tenei a te feagaiga o te Tulafono i te 1513 T.L.M., telā ka aofia muamua latou i a latou kolā ‘ka tavini atu e pelā me se malo o faitaulaga.’ (Esoto 19:5-8) Kae se a te taimi ka olo atu ei latou ki te “‵kaiga o te avaga”? A te ‵tonuga loa, ne kamata o fai te ‵kamiga tenā i te 29 T.A. i te taimi ne kamata ei o talai atu a Iesu e uiga ki te Malo o te lagi.

Kae ne ‵saga atu pefea a te tokoukega o tino Isalaelu ki te ‵kamiga? E pelā mo pati a Iesu, “ne seki fia olo [latou] ki ei.” Ne seki talia ne te tokoukega o takitaki lotu mo tino, a te Mesia e pelā me ko te Tupu telā ne ‵tofi aka ne te Atua.

Ne fakaasi atu ne Iesu me ne maua ne te kau Iutaia a te suā avanoaga: “Ne toe uga atu ne ia [te tupu] a nisi pologa, ana muna, ‘Fai atu ki tino ‵kami: “Kiloke! ko oti ne fakatoka ne au taku ‵kaiga, ko oti ne ‵ta aku pulumakau mo manu puta‵puta, kae ko toka a mea katoa. ‵Mai ki te ‵kaiga o te avaga.”’ Kae ne seki fia ‵saga atu a latou ki ei kae olo ei kea‵tea,  tasi fano loa te tino ki tena fatoaga, kae ko te suā tino ki tena pisinisi; kae ne puke ne te ‵toega o tino ana pologa, ‵ta fakamasei kae tamate latou.” (Mataio 22:4-6) Ne fetaui eiloa te mea tenā mo te mea ne tupu i te taimi ne fakatu aka ei te fakapotopotoga Kelisiano. I te taimi tenā, koi maua eiloa ne te kau Iutaia a te avanoaga ke aofia i te Malo, kae ne ‵teke atu a te tokoukega o tino ki te kalagaga tenei, ke oko foki eiloa ki te fai fakamasei ne latou a ‘pologa a te tupu.’—Galuega 4:13-18; 7:54, 58.

Kae ne a mea ne iku atu ki te fenua? Ne fakamatala mai a Iesu: “Ne kaitaua te tupu, uga atu ei tena kautau o tamate a tino tatino konā kae ‵sunu foki te lotou fa‵kai.” (Mataio 22:7) Ne fe‵paki eiloa a te kau Iutaia mo te mea tenā i te 70 T.A. i te taimi ne fakaseai atu ei ne te kau Loma a te “lotou fa‵kai,” telā ko Ielusalema.

E mata, e fakauiga te lotou ‵teke atu ki te ‵kamiga a te tupu me ko seai aka foki eiloa ne tino e mafai o ‵kami? Ikai, e ‵tusa mo te tala fakatusa a Iesu. Ne toe fai atu a ia: “Fai atu ei a [te tupu] ki ana pologa, ‘Ko toka te ‵kaiga o te avaga, kae ko se ‵tau o ‵mai a tino kolā ne ‵kami. Tela la, olo atu koutou ki auala katoa o te fa‵kai, kae ‵kami mai so se tino e maua ne koutou ki te ‵kaiga o te avaga.’ Ne olo atu ei a pologa konā ki auala katoa kae fakamaopoopo mai a tino katoa kolā ne maua ne latou i konā, tino ma‵sei mo tino ‵lei; kae ne ‵fonu eiloa te koga telā e fai i ei te avaga i tino kolā ne ‵mai o ‵kai.”—Mataio 22:8-10.

E manino ‵lei, me e ‵tau o fesoasoani fakamuli atu a te apositolo ko Petelu ki Tino mai Fenua Fakaa‵tea—tino kolā e se ne tino Isalaelu faka-te-foitino—ke fai mo fai ne Kelisiano ‵tonu. I te 36 T.A., ne maua ne te ofisa o kautau Loma ko Konelio mo tena kāiga a te agaga o te Atua, telā ko mafai ei o aofia i te Malo o te lagi telā ne taku mai ne Iesu.—Galuega 10:1, 34-48.

Ne fakaasi mai ne Iesu me e se ko tino katoa ne ‵mai ki te ‵kaiga ka talia fakamuli ne te “tupu.” Ne fai mai a ia: “I te vauga a te tupu o iloilo a tino ‵kami ne lavea ne ia se tagata e se pei ki gatu e ‵tau mō te avaga. Fai atu ei a ia ki ei, ‘Toku tagata, ne ulu mai pefea koe ki loto nei e aunoa mo gatu e ‵tau o pei ki te avaga?’ Ne seai eiloa sena pati ne fai. Fai atu ei te tupu ki ana tavini, ‘Saisai ana lima mo ana vae kae ‵pei atu ki tua i te pouliga. Tenā eiloa te koga ka tagi mautuutu kae fai ana lili i ei.’ Me e tokouke a tino e ‵kami, kae ne nai tino fua e filifiligina.”—Mataio 22:11-14.

A takitaki lotu kolā ne lagona ne latou a Iesu, kāti ne seki malamalama latou i te uiga io me ko te fakauigaga o mea katoa ne fai atu ne ia. E tiga eiloa te feitu tenā, ne seki fia‵fia latou kae ne momea aka te lotou manakoga ke ‵kalo keatea mai i te tino telā e fai ne ia ke ‵ma latou.