Samtang nag-iikatarapos an ministeryo ni Jesus, padayon hiya nga naggamit hin mga ilustrasyon basi ibuhayhag an mga eskriba ngan punoan nga mga saserdote. Salit karuyag nira patayon hiya. (Lucas 20:19) Pero diri pa tapos hi Jesus ha pagbuhayhag ha ira. Naghatag hiya hin usa pa nga ilustrasyon:

“An Ginhadian han langit iginpariho ha panagtawo ha kasal nga gin-andam han hadi para ha iya anak nga lalaki. Ngan ginsugo niya an iya mga uripon nga dapiton an mga gin-imbitar ha kasal, pero waray maruyag pagkadto an mga gin-imbitar.” (Mateo 22:2, 3) Gintikangan ni Jesus an iya ilustrasyon pinaagi ha pag-unabi han “Ginhadian han langit.” Matin-aw, hi Jehova nga Dios amo an “hadi.” Hin-o man an anak han hadi ngan an mga imbitado ha kasal? Diri liwat makuri hibaroan nga an anak han hadi amo an Anak ni Jehova, an nag-iistorya han ilustrasyon, ngan an mga gin-imbitar amo adton makakaupod han Anak ha Ginhadian han langit.

Hin-o an siyahan nga mga gin-imbitar? Aw, hin-o an ginsangyawan ni Jesus ngan han iya mga apostol mahitungod han Ginhadian? An mga Judio. (Mateo 10:6, 7; 15:24) Ginkarawat hini nga nasud an Balaud nga kasabotan hadton 1513 B.C.E., salit hira an siyahan nga gintagan hin higayon nga magkompwesto han ‘ginhadian han mga saserdote.’ (Eksodo 19:5-8) Pero san-o hira dadapiton para ha “panagtawo ha kasal”? Matin-aw, ito nga imbitasyon iginhatag hadton 29 C.E. han nagtikang magsangyaw hi Jesus mahitungod han Ginhadian han langit.

Ano an reaksyon han kadam-an nga Israelita hito nga imbitasyon? Sugad han ginsiring ni Jesus, ‘waray hira maruyag pagkadto.’ An kadam-an han mga lider han relihiyon pati an mga tawo waray kumarawat ha iya sugad nga an Mesias ngan an Hadi nga ginpili han Dios.

Pero nagsiring hi Jesus nga tatagan hin usa pa nga higayon an mga Judio. “Nagsugo utro [an hadi] hin iba nga mga uripon, ngan ginsidngan, ‘Sumati an mga gin-imbitar: “Nag-andam ako hin panagtawo, nag-ihaw ako hin mga baka ngan pinatambok nga mga hayop, ngan andam na an ngatanan. Kadi kamo ha panagtawo ha kasal.”’ Kondi ginbalewaray ito han mga gin-imbitar, lugod linakat hira, an usa kinadto ha iya uma, ngan an usa kinadto ha iya negosyo. Pero gindakop han iba an iya mga uripon, ginmaltrato ngan ginpatay hira.” (Mateo 22:4-6) Pariho ito ha mahitatabo kon maestablisar na an Kristiano nga kongregasyon. Hito nga panahon, an mga Judio may-ada pa higayon nga makapanunod han Ginhadian, pero iginsalikway han kadam-an ha ira an imbitasyon, ginpatay pa ngani nira an ‘uripon han hadi.’—Buhat 4:13-18; 7:54, 58.

Ano an mahitatabo ha nasud? Hi Jesus nagsiring: “Salit nangalas an hadi ngan ginsugo an iya mga sundalo nga patayon ito nga mga kriminal ngan sunugon an ira syudad.” (Mateo 22:7) Naeksperyensyahan ito han mga Judio hadton 70 C.E. han ginbungkag han mga Romano “an ira syudad,” an Jerusalem.

An ira ba pagsalikway ha pagdapit han hadi nagpapasabot nga waray na iba nga iimbitaron? Diri, sumala ha ilustrasyon ni Jesus. Nagpadayon hiya: “Katapos, nagsiring [an hadi] ha mga uripon, ‘Andam na an panagtawo ha kasal, kondi diri takos an mga imbitado. Salit kadto kamo ha mga dalan tipagawas ha syudad, ngan bisan hin-o nga iyo igkita imbitara ha panagtawo ha kasal.’ Dida hito an mga uripon kinadto ha mga dalan ngan gin-imbitar an ngatanan nga ira iginkita, maopay man o maraot. Ngan an lugar han seremonya ha kasal napuno hin mga bisita.”—Mateo 22:8-10.

Tigamni nga ha urhi, bubuligan ni apostol Pedro an mga Hentil—adton diri mga Judio o nakombirte—nga magin tinuod nga mga Kristiano. Han 36 C.E., an Romano nga opisyal han kasundalohan nga hi Cornelio pati an iya pamilya kinarawat han espiritu han Dios, ngan nagin kaapi hadton makakapanunod han Ginhadian han langit nga gin-unabi ni Jesus.—Buhat 10:1, 34-48.

Iginpakita ni Jesus nga diri ngatanan nga makadto ha panagtawo kakarawaton “han hadi.” Hiya nagsiring: “Han sinulod an hadi basi usisahon an mga bisita, nakita niya an usa nga tawo nga an bado diri naangay ha okasyon ha kasal. Salit an hadi nagpakiana ha iya, ‘Sangkay, kay ano nga nakasulod ka dinhi nga an imo bado diri man naangay ha okasyon ha kasal?’ Waray makabaton ito nga tawo. Katapos, ginsugo han hadi an iya mga surugoon, ‘Gaposa an iya mga kamot ngan mga tiil ngan ilabog hiya ha kasisidman ha gawas. Didto hiya magtatangis ngan mangingigot an iya mga ngipon.’ Kay damu an gin-imbitar, kondi gutiay la an ginpili.”—Mateo 22:11-14.

Posible nga waray masabti han namamati nga mga lider han relihiyon an kahulogan o importansya han ngatanan nga ginsiring ni Jesus. Bisan pa hito, nasina gud hira ngan mas nagin determinado pa gud nga patayon an nagpakaalo ha ira.