Jesuseʼ taʼaytak u kíimsaʼal, le oʼolal seguernaj u meyaj kettʼaanoʼob tiʼ utiaʼal u yeʼesik bix u tuukul le escribaʼob yéetel u nuuktakil le sacerdoteʼoboʼ. Tumen letiʼobeʼ taak u kíimskoʼob Jesús (Lucas 20:19). Baʼaleʼ Jesuseʼ maʼ u láaj aʼaltiʼob baʼax unaj u yojéeltikoʼobiʼ. Ka tu yaʼalajtiʼob uláakʼ kettʼaan.

Tu yaʼalajtiʼob: «U Reinoil kaʼaneʼ bey jeʼex juntúul rey tu beetaj u festejoil u tsʼoʼokol u beel u paaleʼ. Letiʼeʼ tu túuxtaj u palitsiloʼob ka xiʼikoʼob u tʼan le máaxoʼob u invitartmaj utiaʼal u festejoil le tsʼoʼokol beeloʼ, baʼaleʼ le máakoʼoboʼ maʼ tu yóotoʼob taaliʼ» (Mateo 22:2, 3). Jesuseʼ tu káajsaj le kettʼaan yéetel le tʼaan «u Reinoil kaʼan». Le «rey» tu yaʼaloʼ Jéeoba Dios. ¿Kux túun le u hijo le rey yéetel le máaxoʼob tu invitartoʼob utiaʼal le tsʼoʼokol beeloʼ? Láayliʼ maʼ talam xan u naʼataʼal máaxoʼobeʼ, u hijo le reyoʼ ku chíikbesik u Hijo Jéeoba, le máaxoʼob invitartaʼaboʼoboʼ letiʼe máaxoʼob kun meyajoʼob yéetel le Hijo tu Reino teʼ kaʼanoʼ.

¿Máaxoʼob yáax invitartaʼaboʼob? ¿Máaxoʼob tu yéeyaj Jesús utiaʼal u beet u apostoliloʼob yéetel utiaʼal u kʼaʼaytikoʼob le Reinooʼ? Judíoʼob (Mateo 10:6, 7; 15:24). Letiʼobeʼ tu beetoʼob junpʼéel núuptʼaan le ka tu kʼamoʼob u Ley Dios tu jaʼabil 1513 táanil tiʼ u taal Jesús, le oʼolal aʼalaʼab yaan u beetik u reyiloʼob yéetel u sacerdoteiloʼob (Éxodo 19:5-8). Baʼaleʼ, ¿baʼax kʼiin ka invitartaʼaboʼob utiaʼal «u festejoil le tsʼoʼokol beeloʼ»? Lelaʼ beetaʼab tu jaʼabil 29 tiʼ le yáax siglo, le ka káaj u kʼaʼaytaʼal u Reinoil kaʼan tumen Jesusoʼ.

¿Baʼax tu beetaj le israelitaʼob le ka invitartaʼaboʼoboʼ? Jesuseʼ tu yaʼalaj: «Le máakoʼoboʼ maʼ tu yóotoʼob taaliʼ». U maas yaʼabil tiʼ u nuuktakil le judíoʼob yéetel u maasil máakoʼoboʼ maʼ tu kʼamoʼob Jesús bey Mesíasil yéetel maʼ tu creertoʼob wa letiʼe Rey yéeyaʼan tumen Diosoʼ.

Baʼaleʼ Jesuseʼ tu yaʼaleʼ yaan u kaʼa invitartaʼal le judíoʼoboʼ: «[Le reyoʼ] tu kaʼa túuxtaj uláakʼ u palitsiloʼobeʼ, ka tu yaʼalajtiʼob: ‹Aʼaleʼex tiʼ le máaxoʼob in invitartmoʼ: «¡Ileʼex! Tsʼoʼok in beetik janal, tsʼoʼok in kíimsik in waakaxoʼob yéetel le uláakʼ in waalakʼoʼob tin polokkíintoʼoboʼ, tsʼoʼok u listochajal tuláakal. Koʼoteneʼex tu festejoil le tsʼoʼokol beeloʼ»›. Baʼaleʼ le invitadoʼoboʼ maʼ tu beetoʼob u cuentailiʼ, baʼaxeʼ binoʼob yaanal tuʼux, juntúuleʼ bin tu kool, uláakʼeʼ bin koonol; baʼaleʼ u maasileʼ, tu machoʼob le palitsiloʼoboʼ, tu poʼopochʼoʼob yéetel tu jaʼajatsʼoʼob tak ka tu kíimsoʼob» (Mateo 22:4-6). Lelaʼ  letiʼe baʼax tu muʼyajtaj le yáax cristianoʼoboʼ. Teʼ kʼiinoʼob jeʼeloʼ le judíoʼoboʼ yaan kaʼach u páajtalil u yookloʼob teʼ Reinooʼ, baʼaleʼ u maas yaʼabileʼ maʼ tu kʼamoʼob le invitacionoʼ, ka tak tu chʼaʼpachtoʼob u palitsiloʼob le reyoʼ (Baʼaxoʼob 4:13-18; 7:54, 58).

¿Baʼax túun úuch tiʼ le kaajoʼ? Jesuseʼ ku yaʼalik: «Le rey túunoʼ jach kʼuuxilnajeʼ ka tu túuxtaj u soldadoʼob utiaʼal u xuʼulsoʼob tiʼ le j-kíimsaj máakoʼobaʼ bey xan utiaʼal u tóokik u kaajaloʼob» (Mateo 22:7). Lelaʼ béeychaj tu jaʼabil 70 tiʼ le yáax siglo le ka xuʼulsaʼab tiʼ Jerusalén, «u kaajal» le judíoʼob, tumen le romailoʼoboʼ.

Tumen maʼ tu yóotaj u kʼamoʼobeʼ, ¿u kʼáat wa túun u yaʼal jach mix máak uláakʼ invitartaʼabi? Maʼatech, lelaʼ bey u yeʼesik le kettʼaan tu yaʼalaj Jesusoʼ. Letiʼeʼ tu yaʼalaj: «Ka tsʼoʼokeʼ [le reyoʼ] tu yaʼalaj tiʼ u palitsiloʼob: ‹U jaanlil le tsʼoʼokol beeloʼ tsʼoʼok u listochajal, baʼaleʼ le máaxoʼob in invitartmoʼ maʼ u náajaltmaj u taaloʼobiʼ. Le oʼolaleʼ, xeeneʼex teʼ bejoʼob tu jóokʼbal le kaajoʼ, ka a invitarteʼex utiaʼal u festejoil le tsʼoʼokol beel jeʼel máaxak ka a wileʼexoʼ›. Le palitsiloʼob túunoʼ jóokʼoʼob teʼ bejoʼoboʼ ka tu invitartoʼob le bukaʼaj máakoʼob tu yiloʼoboʼ, yanoʼobeʼ kʼasaʼanoʼob yéetel uláakʼoʼobeʼ utsoʼob; bey túunoʼ le kúuchil tuʼux ku beetaʼal le festejooʼ chuʼup yéetel le máakoʼob kulukbaloʼob yiknal le mesaoʼ» (Mateo 22:8-10).

Maʼ kun xáantaleʼ apóstol Pedroeʼ yaan u káajal u invitartik le máaxoʼob maʼ judíoʼob bey xan le máaxoʼob u kʼammoʼob u religión le judíoʼob utiaʼal ka u beetubaʼob disipuloil tiʼ Cristooʼ. Tu jaʼabil 36 tiʼ le yáax siglooʼ, Cornelio, u nojchil u soldadoiloʼob Roma, yéetel le máaxoʼob yanoʼob ichil u yotochoʼ tu kʼamoʼob u kiliʼich muukʼ Dios utiaʼal ka táakpajkoʼob tu Reinoil kaʼan, jeʼex aʼalaʼabik tumen Jesusoʼ (Baʼaxoʼob 10:1, 34-48).

Jesuseʼ maʼ tu tsʼáaj naʼatbil wa tuláakal le máaxoʼob binoʼob teʼ janal yaan u láaj kʼaʼamloʼob tumen «le reyoʼ». Letiʼe tu yaʼalaj: «Ka ook le rey u yil le máaxoʼob invitartaʼaboʼoboʼ, tu yilaj juntúul máak maʼ u búukintmaj u nookʼil le tsʼoʼokol beeloʼ. Ka túun tu yaʼalajtiʼ: ‹Amigo, ¿bix ookikech wa maʼ a búukintmaj u nookʼil le tsʼoʼokol beeloʼ?›. Baʼaleʼ le máakoʼ mix baʼal tu yaʼalaj. Le rey túunoʼ tu yaʼalaj tiʼ le máaxoʼob meyajtikoʼ: ‹Kʼaxeʼex u kʼaboʼob yéetel u yookoʼob ka a jóoʼs a píikchʼinteʼex teʼ táankab tuʼux éeʼjochʼeʼenoʼ. Teʼeloʼ tiʼ kun okʼol yéetel tiʼ ken u karachʼt u kojiʼ›. Tumen yaʼab máaxoʼob invitartaʼanoʼob, baʼaleʼ chéen junpʼíit le yéeyaʼanoʼoboʼ» (Mateo 22:11-14).

U nuuktakil le judíoʼoboʼ maʼ tu naʼatoʼob tuláakal le baʼaxoʼob tu yaʼalaj Jesusoʼ. Baʼaleʼ letiʼobeʼ maas taakchaj u kíimskoʼob yoʼolal le baʼaxoʼob ku yaʼalik tu contraʼoboʼ.