Itre ithupëjia me Iesu a elëhni, ke nyidrëti a hamë ceitun ka qajaqaja la thiina i angatr. Enehila, itre Faresaio a ithanata troa tra thethi nyidrë. Angatr a uku nyidrë troa qaja la ketre ewekë, matre utisai nyidrë kowe la gavena i angetre Roma. Angatr a nyithupene jë la itre xa atre drei angatr, troa tra thethi Iesu.—Luka 6:7.

Önine la itre hna nyi thupene ka hape: “Atre Ini fe, atre hi huni laka, ka nyipici nyipë, nge tha nyipëti kö a goeëne la pengö i atr, ngo nyipëti pe a inine la itre mekuna i Akötresie ka ihmeku memine la nyipici: Matre tune kaa, meköti kö tro huni a kuiëne la mani hna athip hnei Kaisara, maine waea?” (Luka 20:21, 22) Tha hna amenu Iesu kö hnene la aqane nyinyithiina, me menyike thoi i angatr. E tro Iesu a hape, ‘tha meköti kö,’ tro ha uti sai nyidrë pine icilekeu me musi Roma. Ngo e tro nyidrë a hape, ‘meköt troa kuiën,’ tro hë la itre ka methinëne la musi Roma a mekune menune koilo, me lepi nyidrë. Matre tro nyidrëti a sa tune kaa?

Öni Iesu: “Itretre thoi, hnauëne laka nyipunie a tupathi ni? Awe jë la mani nyine kuiën.” Angatr a hamëne pi koi nyidrë la ca drenari. Nge Iesu a hnyinge jë koi angatre me hape: “Iqëmeke i drei la? Nge ëje i drei la?” Öni angatr: “Kaisara.” Matre öni Iesu jë hi: “Haawe, nga hamëne pi koi Kaisara la ewekë i Kaisara, nge koi Akötresie la ewekë i Akötresie.”—Mataio 22:18-21.

Itre atr a haine la aqane sa i Iesu. Nge ame itre ka nyinyithiina, hna lep ahumunyi angatr, matre angatr a tro pi. Ngo tha fenesi kö la drai, matre hetre trengecatre i angatre pala kö troa  tra thethi Iesu. Thupene la kola apëne lo itupath i itre Faresaio, hnene pena la itre ka sine la ketre hmi hna easenyi nyidrë.

Hnei itre Sadukaio, itre ka tha mejiun koi mele hmaca, hna amejëne la ketre hnying ka qeje mele hmaca, me trejin ka faipoipo. Öni angatr: “Atre Ini fe, öni Mose: ‘Maine tro la ketre trahmanyi a mec nge pëkö nekö i angeic, tro la trejin me angeic a xome la föi angeic, me nyi matrane lai ka mec.’ Haawe, the huni la sevene lao trejin. Hna faipoipo la haetra, ngo meci pi hi angeic nge pëkö kuku, matre hna xome pë hë la föi angeic hnene la jini angeic. Nge hna traqa tune mina fe kowe la hnaaluen me hnaakönin, uti fe hë kowe la hnaasevenen. Nge thupe i angatr asë, ketre meci ju hi lai föe. Matre, ame hë ngöne la mele hmaca, tro eahlo a föi drei? Ke hnei angatr asë hi hna faipoipo me eahlo.”—Mataio 22:24-28.

Iesu a sa jë thenge la hna cinyihan hnei Mose, lo trepene la hmi angatr. Öni Iesu: “Ka tria hnyawa nyipunie, ke thatre kö nyipunie la hna qaja ngöne la Itre Hna Cinyihan, nge ketre, thatre kö nyipunie la aqane huliwa ne la mene i Akötresie. Ke ame ngöne la ijine mele hmaca, pëkö trahmanyi ka troa faipoipo, nge pëkö ihamë föeë, ke tro hë angatr a ceitu me itre angela e hnengödrai. Nge ame göne la mele hmaca, tha hane kö nyipunieti e hnine la itusi Mose, lo Akötresie a qaja koi angeic ngöne la sinöe ka ithinyi ka hape: ‘Eni la Akötresi Aberahama, me Akötresi Isaaka, me Akötresi Iakobo?’ Haawe, tha nyidrëti kö la Akötresi ne la itre ka mec, ngo itre ka mele pe. Matre ka tria hnyawa nyipunie.” (Mareko 12:24-27; Esodo 3:1-6) Itre atr a haine la aqane sa i nyidrë.

Ase petre hi Iesu thinge la që ne la itre Faresaio me itre Sadukaio. Ngo enehila, kola ha traqa koi nyidrë hnei itre ka sine la lue hmi cili. Matre önine la ketre atre cinyihan ka hape: “Atre Ini fe, nemene la wathebo ka tru ne la Trenge Wathebo?”—Mataio 22:36.

Öni Iesu: “Ame la ka sisitria, tre, ‘Isaraela fe, drenge ju! Iehova Akötresi së, la Iehova ka cas, nge qa i eö troa hnimi Iehova Akötresi eö hnene la hni eö ka pexej, me mele i eö ka pexej, me mekuna i eö ka pexej, me trenge catre i eö ka pexej.’ Ame la hnaaluen, tre ka ceitu hi, ‘Qa i eö troa hnime la atre lapa easenyi eö, tui eö hi.’ Nge pëkö xa wathebo ka sisitria hune lue ej.”—Mareko 12:29-31.

Ame hë la angeic a drenge lai, önine lai atre cinyihan: “Atre Ini fe, nyipici hi la hnei nyipëti hna qaja, ke ‘casi hi la Akötresie, nge pë hmaca ju kö ketre, ngo nyidrëti hmekuj.’ Nge troa hnimi nyidrë hnene la hni së ka pexej, me mekuna së ka pexej, me trenge catre së ka pexej, me hnime la atre lapa easenyi së tu së hi, ke sisitria kö lai hune la itre huuje ne dreuth asë, me itre xa huuj.” Öhne hi Iesu laka, ka inamacane la aqane ithanata i angeic, matre öni nyidrë: “Tha iananyi kö eö memine la Baselaia i Akötresie.”—Mareko 12:32-34.

Köni drai hë (9, 10, me 11 Nisan) ne Iesu e hnine la uma ne hmi troa hamë ini. Hetre atr, tune la atre cinyihane celë ka madrine troa drei nyidrë. Ngo tha itre hene ne hmi kö, itre ka ‘cile hnö troa hnyinge hmaca koi nyidrë.’