Vaka-kole jaYesu vamukwitava vapihililile chikuma, mwomwo asopolwele vilinga vyavo vyakuhuka hakuzachisa vifwanyisa. VaFwaliseu jino vasakile kuwana jijila jakumukwachilamo. Vesekele kumulingisa ahanjike vyuma vize navivalingisa vamutwale kuli nguvulu wavaLoma, nakufweta jimbongo tumbaji twenyi vamwe mangana vamukwate.—Luka 6:7.

Vambile ngwavo: “Ove Muka-kunangula, tunatachikiza ngwetu ove weji kuhanjikanga nakunangula mwakwoloka, kaha kaweshi kutala mutu kumesoko, oloze weji kunangulanga jila yaKalunga kweseka nomu mwaya muchano: Uno vatwitavisa kuhana Kesale mitelo tahi, nyi chiku?” (Luka 20:21, 22) Chipwe ngocho, kavahashile kwonga Yesuko mwomwo ejivile ngwenyi vyuma vapwile nakuhanjika vyamakuli. Nge akanyine ngwenyi, ‘Nduma, kavamitavisa kuhana Kesale miteloko,’ kachi vamuhanyine mulonga wakufumbukila chiyulo chavaLoma. Oloze nge etavile ngwenyi, ‘Eyo, hanenu mitelo kana,’ kachi vatu vaze vakanyine chiyulo chavaLoma vamufumbukilile, mwomwo yakuhona kwivwishisa ulumbunwiso wamazu kana. Jino akumbulwile ngachilihi?

Yesu avakumbulwile ngwenyi: “Enu vaka-kulyonga, muli nakungwesekela ika? Ngulwekesenu lumbongo lwachichele lwamutelo.” Vamunehelele ndenali, kaha avahulishile ngwenyi: “Uno ou mutwe namazu vasonekaho vyeya?” Vamukumbulwile ngwavo: “VyaKesale.” Yesu avambile ngwenyi: “Hanenunga vyuma vyaKesale kuli Kesale, oloze vyuma vyaKalunga kuli Kalunga.”—Mateu 22:18-21.

Ava malunga valikomokelele chikuma hamazu ahanjikile Yesu, ngocho kavahanjikile chuma numba chimweko, kaha vayile. Chipwe ngocho, vishinganyeka  vyavo vyakusaka kumujiha kuvyapwile lika. Omu vaFwaliseu vahonene kumukwata, vatwamina vamukwitava vejile cheka kuli Yesu.

VaSatuse vaze vahanjikilenga ngwavo kakwatwama kusangukako, vamuhulishile chihula chakupandama kukusanguka nachihande chakumbata chipwe kusomboka kuli nyali yamutu. Vamuhulishile ngwavo: “Ove Muka-kunangula, Mose ambile ngwenyi: ‘Kachi nge lunga mwafwa chakuzeneka vana, kaha ndumbwenyi atela kumbata uze pwevo nakusemena uze ndumbwenyi vana.’ Jino twapwile namalunga 7 vamujimo limwe. Uze watete ambachile pwevo, kaha afwile. Jino hakuwana nge kapwile navanako, ngocho ndumbwenyi ambachile uze pwevo lyenyi. Kahomu mukiko chapwile nakuli wamuchivali nawa, nayou wamuchitatu, swi nakuli ou wakusokesa 7. Kukuminyinako, nauze pwevo afwile. Ngocho hakusanguka, mwakapwa pwevo lyaumwe ulihi hali vaze 7? Mwomwo vosena vamumbachile.”—Mateu 22:24-28.

Hakuvakumbulula, Yesu azachishile jishimbi jaMose jize vetavilile vaSatuse, ambile ngwenyi: “Munalimbenje, mwomwo kamwatachikiza Visoneka, chipwe ngolo jaKalungako. Mwomwo omu navakasanguka kuvafu, malunga kaveshi kukambatako, mapwevo nawa kaveshi kukasombokako, oloze navakapwanga nge vangelo mwilu. Jino hakuvuluka vafu vaze navakasangula, uno kanda mutangengaho lyehi mujimbu wachiputa, mumukanda waMose omu Kalunga ambile kuli ikiye ngwenyi: ‘Ami yami Kalunga kaApalahama, Kalunga kaIsaka, Kalunga kaYakovako’ tahi? Ikiye kapwa Kalunga kavafuko, oloze wavava vavatonyi. Enu munalimbenje chikuma.” (Mako 12:24-27; Kulovoka 3:1-6) Mayongomena alikomokelele hakukumbulula mujila kana.

Yesu ahonesele vaFwaliseu navaSatuse, ngocho mazavu osena awa avali avaka-kwitava ejile hamwe nakumweseka cheka. Muka-kusoneka umwe amuhulishile ngwenyi: “Ove Muka-kunangula, lushimbi muka lwapwa lwalulemu haJishimbi josena?”—Mateu 22:36.

Yesu akumbulwile ngwenyi: “Lwatete lukiko elu ngwavo, ‘Ivwililenu, enu vaIsalele, Yehova Kalunga ketu ikiye Yehova umwe kaha. Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena, nangolo jenu josena.’ Kaha lwamuchivali lukiko vene elu ngwavo, ‘Zangenunga vakwenu nganomu mwalizanga enu vavene.’ Kakweshi lushimbi lweka lwalulemu kuhambakana ejiko.”—Mako 12:29-31.

Omu evwile mazu kana, ou muka-kusoneka ambile ngwenyi: “Ove Muka-kunangula, unahanjika mwamuchano. ‘Kalunga apwa Umwe kaha, kakweshi wekako shina Ikiye kaha.’ Mutu kuzanga Kalunga namuchima wenyi wosena, nakunangakana chenyi chosena, nangolo jenyi josena, nakuzanga mukwavo mutu nganomu alizanga ivene, chapwa chachilemu chikuma kuhambakana mawana akulumba osena navimuna vakuvatula.” Yesu hakumona ngwenyi ou muka-kusoneka nakumbulula mwamangana, amwambile ngwenyi: “Ove kaweshi kwakusuku naWangana waKalungako.”—Mako 12:32-34.

Hamakumbi atatu (Nyisane 9, Nyisane 10, naNyisane 11), Yesu apwile nakunangula mutembele. Vatu vamwe vakufwana nge uze muka-kusoneka, vevwilenga kuwaha kwivwilila kuli Yesu. Oloze omu keshi mukiko chapwile kuli vatwamina vamukwitavako, vaze kavahamukile nakuhasa “kumwihula cheka chihulako.”