Vatungamiriri vo zviara vanovengaya Jesu, vakanyangajwa maningi. Iyena wapera kuita muezaniso wo kuphetura ushati hwavo. Wari vaFarisi vanoronga kuti vapsake pokumubatira. Vanoda kuuita kuti Jesu averekete zviro zvingaitisa kuti aendeswe ka mambo wo Roma. Ngo kudaro vanotenga vatevereri vanganani va Jesu kuti vamusunge.—Luka 6:7.

Ivona vanoti: “Mujijisi! Tinoziva kuti unovereketa no kujijisa ngo kuteveja urungami, kuti unotatija gwanja ra Mwari ucikathyi vandhu no kuteveja gwinyiso. Bzinotendehwa, kani, kuxabira Sezare, nokuti abzitendehwi?” (Luka 20:21, 22) Jesu aabathwi kumeso ngo kusimbhwa uku, ngo kuti sure ko kusimba kwaifindara ucengeji. Kudari Iyena akananga kuti: ‘Haiwa, azvitendehwi kushaba,’ ivona vaizomupumbha kuti aazwiri utongi wo Roma. Asi akananga kuti: ‘Hina, shabanyi,’ vandhu vaingaya vakanyangajwa ngo pamusoro po mutemo jo ciRoma, vaizoguma pa mbhejiso jakashata, perepo votomuphindukira. Waro Jesu anodavirisa kudini?

Jesu anoti: “Vajiitisi! Munondieja ngenyi? Nditatijenyi kobiri ro muxabo!” Pavanoviisa cereni iri, iyena anoti: “Nja ani hope ii no matahwa aya?” Ivona vanomupingura kuti: “Mbza Sézare.” Ecishandisa uzivi hwake, Jesu anopekeja ndhungamiro inoti: “Ndibzo, ipanyi Sézare bza Sézare, ipanyibze Mwari bza Mwari.”—Mateu 22:18-21.

Vandhu vanokahamara ngo masoko a Jesu. Ngo  pamusoro po mupinguro wo ungwaru wa Jesu, ivona vanopinda vacina no muromo. Asi njiku aito yapera, nee mazano okuda kusungwa kwake aato aperavo. Pasure po kudunya ko mazano o vaFarisi, cikwata cimweni co vatungamiriri vo zviara cinomukhwederera.

VaSadhuki, vacikatendiweya kuti rumuko huriyo, vanoita mubvunjo ngo pamusoro po rumuko no mucadho wa mwaramu na mwaramu veciti: “Mujijisi! Mosi wakati: ‘Mundhu akafa acina vana, munukuna wake anozorovora mwaramu, ngo kuda kumusijira bvumbo ra nevanji wake.’ Pakati pedu paiva no hama nomwe. Yokutanga yakarovora mukaji, yofa. Ngokuti aizivi kubara vana, yakasiira munukuna mukaji wayo. Bzondhobzo bzakaitika no yocipiri, no yocitatu, mbhera no yocinomwe. Sure ko kufa kwavo vese, wakafavo mukaji. Pakumuka ko vakafa, mukaji unozova waani pa vanomwe? Ngokuti vese vakamurovora.”—Mateu 22:24-28.

Ecinangira matahwa a Mosi, anodavihwaya ngo vaSadhuki, Jesu anoti: “Amuposi here, mecitama kuziva Matahwa no simba ra Mwari? Ngokuti, pakumuka ko vakafa, avazorovori nokuti kurovohwa, kaveta vanozotojana no ngirozi jo mugore. Ngo njio yo kumuka ko vakafa, amuzivi kujija mu Matahwa a Mosi, apo wakavona fusi recibwaka, kuti Mwari wakamubvunja kuti: ‘Inini ndiri Mwari wa Abrahama, Mwari wa Isaki, Mwari wa Jakobe’? Mwari [asipi] Mwari wo vakafa, kaveta wo vapenye. Muri kuposa kamare.” (Marco 12:24-27; Exodo 3:1-6) Mbungano yakakahamara ngo mupinguro uwu.

Vecivona kuti Jesu ari kufunga muromo jo vaFarisi no vaSadhuki, mukati mozvikwata zviviri izvi zvo vatungamiriri vo zviara, makabuda vandhu vanganani vaida kuejazve Jesu. Vatari vakabvunjisa kuti: “Mujijisi, ngowapi mupango mukuru wo Mutemo?”—Mateu 22:36.

Jesu anovapingura kuti: “Mupango wokutungamira nga uu: ‘Izwai Israeli! Tenji Mwari wedu ndiyena basi Tenji. Disai Tenji Mwari wako ngo mwoyo wako wese, ngo mwiha wako wese, ngo hwiru hwako hwese, ngo simba rako rese.’ Wocipiri nga uu: ‘Disai mudoni wako, inga mudiro wounojiita iwewe.’ Akunabze mupango uriwese mukuru kupinda ii.”—Marco 12:29-31.

Mutari paanozwa mupinguro wa Jesu, anoti: “Ndibzona Mujijisi! Mananga bzokadi kuti Mwari ndi umwe basi, nokuti kunja kwake akunabze umweni. Kumudisa ngo mwoyo wese, ngo hwiru hwese, ngo simba rese, no kudisa vadoni inga mudiro wo unojiita wega, kuno mutengo kupinda” mupiro jokupiswa no zvipiriso. Ecivona kuti mutari wadavira inga mundhu wakatongwaravo, Jesu anoti: “Auripi ndhambo no Umambo hwa Mwari.”—Marco 12:32-34.

Jesu wapeja dhiya 3 ecijijisa muthemberi kutangira mu dhiya 9, 10, no dhiya yo 11 yo mweji wa Nisani. Vamweni vakadari inga vatari ava vanomupurutana no mudakaro wese. Asi ku vatungamiriri vo zviara kwainga kucicinazve na umwe hake “waimubvunjisa.”