Thatreine kö itre ithupëjia qajangazo Iesu, me tra thethi nyidrë matre utisai nyidrë. (Luka 20:20) Easë pala hi e 11 Nisan hnine la uma ne hmi, nge Iesu a hnyinge koi angatr. Tro hë nyidrëti a amamane ka hape, drei nyidrë. Öni nyidrë: “Nemene la mekuna i nyipunie göi Keriso? Nekö i drei nyidrë?” (Mataio 22:42) Atre hi la itre atr ka hape, tro la Keriso, lo Mesia a xulu qaathene la lapa i Dravita. Nge aqane sa i angatre lai.—Mataio 9:27; 12:23; Ioane 7:42.

Sa jë hi Iesu ka hape: “Nga hnauëne kö laka, hnene la ua, matre Dravita a hë Keriso ka hape Joxu, lo öni angeic: ‘Iehova a qaja kowe la Joxung: “Lapa ju ngöne la götrane macang, uti hë la tro ni a amë la itre ithupëjia me hmunë fene la lue ca i hmunë” ’? Haawe, maine Dravita a hë nyidrë, ka hape Joxu, nga tro nyidrëti a nekö i Dravita tune kaa?”—Mataio 22:43-45.

Cile ju hi la itre Faresaio, ke angatr a lapa treqene la ketre atr ka xulu qaathene la lapa i Dravita. Nge tro angeic a thapa la nöj qaathei angetre Roma. Matre ame la Iesu a qeje Salamo 110:1, 2, nyidrëti lai a amamane laka, tha joxu menu kö la Mesia. Tro la Mesia a joxu i Dravita, me lapa ngöne la götrane maca i Akötresie. Nge e cili, tro nyidrëti a nyiqaane mus. Celë hi matre lapa thaupu ju hi la itre ithupëjia me Iesu.

Nge kola drenge hnyawa hnei itretre dreng me itre xan. Matre Iesu a hmekë angatre jë göi itretre cinyihan me itre Faresaio. Itre atre lai ka “xome la göhnë i Mose” troa tro fë Wathebo i Akötresie. Öni Iesu: “Ame la itre ewekë hnei angatr hna qaja koi nyipunie, trongëne jë, ngo the xome kö la thiina i angatr, ke ka atreine angatre qaja, ngo tha ka kuca pe.”—Mataio 23:2, 3.

Thupene lai, Iesu a qaja jë la aqane huliwa thoi i angatr. Öni nyidrë: “Angatr a aisaisan la itre neköi trengene ka qatrenge la itre hna Cinyihan.” Hetre angetre Iudra ka hnöth ngöne la göpadri maine ime i angatr, la ketre neköi kes hna nyialien hnei Wathebo. Nge itre Faresaio a majemin atrune la itre neköi kes, matre nyi ka meköt. Ketre, “angatre fe a aqeane la itre pune iheetre i angatr.” Hna amekötin koi angetre Isaraela troa ketre pengöne la pune iheetre i angatr, ngo ame pala ha itre Faresaio, angatr a aqeane catrën. (Numera 15:38-40) Angatr a “pi mama.”—Mataio 23:5.

Iesu fe a hmekëne la itretre dreng, wanga tro fe a angatr a hane pi mama. Öni nyidrë: “The tro pi kö a hane hë nyipunie ka hape, Rabi, ke casi hi la atre ini nyipunie, nge itre trejin asë pë hë nyipunie. Nge the tro kö a hëne la ketre atr e celë fen ka hape, kaka, ke casi hi la Keme i nyipunie e hnengödrai. Ketre, the tro kö a hane hë nyipunie ka hape, itretre weje meken, ke casi hi la atre Weje Meken, a Keriso.” Nga, tune kaa hö la aqane tro la itretre dreng a waipengöi angatr, me itre huliwa i angatr? Öni Iesu: “Ame la ka tru e nyipunie, tre tro angeice a huliwa koi nyipunie. Ke ame la atre sipu selë angeice kö, tro ha thaipiën, ngo ame la atre ipië, tro ha adraiën.”—Mataio 23:8-12.

Thupene lai, Iesu a ejine la itre Faresaio me itretre cinyihan ka huliwa thoi. Öni nyidrë: “Ekölö hi ni nyipunie itretre thoi! Nyipunie itre Faresaio me itretre cinyihan, ke nyipunie a thingi jëne la itre atr troa lö kowe la Baselaia ne hnengödrai, me sawa la itre ka ajane troa lö. Nge goi tha lö kö nyipunie.”—Mataio 23:13.

 Iesu fe a jelengazone la aqane tha nyipiewekën angatr la ka tru koi Iehova, tune la aqane waipengöne la uma ne hmi. Öni angatr: “Maine tro ketre atr a sisinyi göne la uma ne hmi, tre ka pë pengöne lai, ngo e sisinyi hë göne la gool ne la uma ne hmi, nyipiewekë troa metrötrëne la hna sisiny.” Celë hi ka amamane la aqane ti la luemeke i angatr, ke angatr a nyipiewekëne la gool hnine la uma ne hmi, ngo tha uma ne hmi kö, lo hnë nyihlue i Iehova me easenyi koi nyidrë. Ketre, ‘tha nyipiewekëne kö angatr la itre götrane ka tru ne la wathebo, ene la meköt, me utipin, me inyipicikeu.’—Mataio 23:16, 23; Luka 11:42.

Iesu a qeje itre Faresaio ka hape, “itre timek ka amamai gojeny,” ke angatr a “use trije la tresitr” me ‘ulume la kamela!’ (Mataio 23:24) Angatr a use trije la tresitr qa ngöne waina, ke öni ka sisi lai. Ngo angatre pe a tha nyipiewekëne la itre götrane ka tru ne la wathebo, kösë kola ulumi Kamela, ketre öni ka sisi fe, ngo iatraqatre pe.—Levitiko 11:4, 21-24.