Muna lumbu kia nsuka o Yesu kezidi muna tempelo, osenzekele diaka luvunu lwa asoneki ye Afarisi. Ubayikidi vo mpuki. Ubavovesele muna kingana, oku vo: “Nuvelelesanga kuna mbazi a kopo ye longa, kansi omo kati nwazala ye loko yo kondwa volo. U Mfarisi a mpofo, teka velelesa e kopo ye longa muna kati, i bosi ovelelesa dio mpe kuna mbazi.” (Matai 23:25, 26) Afarisi betokanenanga e nkinzi mia luveleleso ye mpw’au vana meso ma ndonga, kansi ke betokanenanga kimuntu kiau kia kati ko yo lembi velelesa e ntima miau.

O luvunu lwau lumonekanga mpe vava betunganga e ziami ya angunza yo kusa yo e tinta. Kansi, wauna o Yesu kavovele, oyau “i mbongo y’awana bavonda angunza.” (Matai 23:31) Dialudi, kadi bavangidi mawonso mu vava vonda Yesu.—Yoane 5:18; 7:1, 25.

I bosi, Yesu ovovele diambu dilwakila mfumu za mabundu avo ke bavilukidi ntima ko. Ovovele vo: “Nu nioka, nu wan’a mpidi, aweyi nutinina e mfundis’a Ngeena?” (Matai 23:33) E Yenga dia Hinome dina vana ndambu, i fuku diyokelwanga e titi, e kiaki i nona kiambote muna songa o lufwasu lwa kwele mvu lulwakila asoneki ye Afarisi, kadi wantu ambi kikilu.

Alongoki a Yesu yau bekala “ngunza, akwa ngangu ye alongi.” Aweyi akaka bekubavanga? Yesu ovovese mfumu za mabundu vo: “Ankaka muna yau [alongoki ame] nukubavondela vana nti, ankaka nukubatubila matadi muna masambilu meno yo kubabangika muna mavata mawonso, omu ntu mieno i mukala o menga ma wantu awonso ansongi mana mabunguka ova ntoto, tuka muna menga ma Abele wa nsongi yamuna menga ma Zakariya . . . ona nwavonda.” Yesu ubalukisi vo: “Kieleka inuvovese vo, tumbu yayi yawonso ikwiza muna mbandu yayi.” (Matai 23:34-36) E diambu diadi diavangama muna mvu wa 70 wa ntadu kieto, vava makesa ma Roma mafwasa Yerusaleme, mafunda ye mafunda ma Ayuda bafwa.

O Yesu vava kayinduidi o lufwasu lwalu, e ngindu zandi zitokanene. Ovovele kuna nkenda zawonso vo: “E Yerusaleme, e Yerusaleme, on’ovondanga e ngunza, yo tubila awana katuminu o matadi—nkumbu nkwa yazolele konka o wan’aku nze una e nsusu ikonkelanga o wan’andi kuna nsi a mave! Kansi, oyeno ke nwazola wo ko. Tala, e nzo eno ibembwelo kwa Nzambi.” (Matai 23:37, 38) O wantu bawidi e mvovo miami bena kiyuvula kana nkia “nzo” o Yesu kavovele. Nga ovovele tempelo yampwena ina muna Yerusaleme, ina o Nzambi ketaninanga?

Yesu ovovele diaka vo: “Inuvovese vo, tuka owau ke nukumbona diaka ko yavana nuvova vo, ‘Nkwa nsambu ndiona okwizila muna nkumbu a Yave!’” (Matai 23:39) E miami i mvovo mia ungunza mina muna Nkunga 118:26: “Nkwa nsambu ndion’okwizila muna nkumbu a Yave: Tusambulwidi muna nzo a Yave.” Kieleka, vava e tempelo yayi ifwaswa, ke muntu ko okwizila mo muna nkumbu a Nzambi.

Owau, Yesu wele kuna sambu dia nkela za tukau muna tempelo. O wantu tukau bekobolanga muna nkela zazi zakete. Yesu omwene Ayuda bevananga tukau, mvuama “zayingi zitubidi mo nzimbu.” I bosi Yesu omwene mpe nkento wafwilwa yakala “otubidi mo mpata miole.” (Maku 12:41, 42) Dialudi vo, Yesu ozeye wo vo Nzambi otomene yangalela o lukau lwa nkento ndioyo.

Yesu obokele alongoki andi, ubavovese vo: “Kieleka inuvovese vo kina katubidi o nkento ndioyu wa nsukami, wafwilwa yakala, kiviokele awonso batubidi nzimbu muna nkela za tukau.” Ekuma kavovele wo? Yesu osasidi vo: “Kadi yau awonso zina zisuvidi i batubidi, kansi oyandi, muna usukami wandi, i katubidi yawonso kena yau, yawonso ya zingu kiandi.” (Maku 12:43, 44) E ngindu yo mavangu ma nkento ndioyo maswaswana kikilu ye ma mfumu za mabundu.

Wau vo e lumbu kia 11 kia Nisani kilueke ku mfoko, Yesu ovaikidi muna tempelo, ekiaki i lumbu kiandi kiansuka. Mosi muna alongoki andi umvovese vo: “E Nlongi, tala mfunu mia matadi ye nzo zazi!” (Maku 13:1) Dialudi, matadi matungilwa e yaka ya tempelo mampwena kikilu, i mau mesimbanga e tempelo kimana yazinga mvu miayingi. Nanga olenda sivika vava Yesu kavovele vo: “Nga omwene nzo zazi zampwena? Ke vesala tadi vana ntandu tadi ko ovava, dina dilembi kunkumunwa.”—Maku 13:2.

Vava kavovele mambu mama, Yesu ye ntumwa zandi basaukidi Ndimb’a Kiderone, batombokele kuna Mongo a Olive. Una kumosi ye ntumwa yá—Petelo, Andere, Yakobo ye Yoane. Vana ntandu a mongo, antumwa mu toma mona bena e tempelo yampwena kuna yanda.