Easë enehila ngöne hnaipajö ne draiangedic, nge easenyi hë matre fenesi pi la drai 11 Nisan. Ijine fe troa nyipune la huliwa ne cainöje i Iesu. E lai, hnei nyidrë hna majemine hamë ini hnine la uma ne hmi, nge e hej, nyidrëti a meköl e tröne la traon. Ala nyimu la itre ka pi drei Iesu, matre “e hmahmakany, itre atr a traqa koi nyidrë troa drei nyidrë hnine la uma ne hmi.” (Luka 21:37, 38) Ngo enehila, ce Iesu me foa lao aposetolo hune la Wetr Elaio, ene Peteru, me Anederea, me Iakobo, me Ioane.

Hnei angatr hna tro juetrë koi Iesu. Angatr a pi atre la pengöne la uma ne hmi elany, ke hnei Iesu hna perofetan ka hape, tha tro kö a të la ketre etë hune la ketre. Ngo hetre ewekë pala kö ka ajolëne la hni angatr. Hnei Iesu lo hna qaja koi angatre ka hape: “Loi e ka hnëkë pala hi nyipunie, ke tro ha traqa la Nekö i atr ngöne la hawa hnei nyipunieti hna tha mekun.” (Luka 12:40) Nge hnei nyidrëti fe hna qaja “la drai ne mama la Nekö i atr.” (Luka 17:30) Matre hapeu, ka ce tro kö la lue ewekë celë, memine la hnei Iesu hna qaja göi uma ne hmi? Meci hë angatr hnei pi atre, matre öni angatr: “Pane qaja jë koi huni ka hape, eu la troa traqa la itre ewekë cili, nge nemene fe la hatrene laka, celë hë nyipë, memine la hatrene la pune la fene celë?”—Mataio 24:3.

Ma angatre jë a mekune la ijine troa lep apatrene la uma ne hmi e cahu. Ketre, angatr a hnying göne la ijine celë hë la Nekö i Atr. Ma mekune pala kö angatre lo ceitune i Iesu göne la “nekö i joxu” ka ‘tro gaa nany, matre acili joxu angeic, me bëeke hmaca.’ (Luka 19:11, 12) Nge angatre fe a thele la aliene la hna hape, “pune la fene celë.”

Ngöne la aqane sa i Iesu, nyidrëti a hamë ithuemacany nyine xatua angatr, matre atre la ijine nyipune la hneijine i angetre Iudra, me lep apatrene la uma ne hmi. Ngo tru catre hmaca kö la itre ithuemacanyi hna hamën. Tro la hatrene cili a xatua itre Keresiano elany, troa atre ka hape, angatr a mel ngöne la ijine “celë hë” nyidrë, me ijine nyipune la fen.

Ije macatre hë ne goeën itretre dreng la Iesu a eatrëne la itre hna perofetan! Eje hi, nyimutre la itre hna perofetan ka eatr ngöne la hneijine i angatr. Nge elany, thupene la 37 lao macatre, e 70 M.K., tha tro kö itre Keresiano a sesëkötr la kola nyipune la hneijine i angetre Iudra, me lep apatrene la uma ne hmi. Ngo ame pe, tha tro kö la nöjei hatren hna qaja hnei Iesu a eatre la ijine cili. Matre, nemene la itre hatren laka, celë hë Iesu Joxu? Iesu a sa jë koi itre aposetolo.

Öni Iesu ka hape, troa hetre “isi, me itre mejene isi,” nge “tro ha isi la ketre nöj me ketre nöj, me ketre baselaia me ketre baselaia.” (Mataio 24:6, 7) Nge “troa hetre sa atraqatr, nge ngöne la ketre götran me ketre götran, tro ha jiinë xen me hetre itre meci ka ixötrekeu.” (Luka 21:11) Matre Iesu a hmekëne la itretre dreng ka hape: “Tro la itre atr a pane othi nyipunie me axösisi nyipunie.” (Luka 21:12) Eje hi, tro ha mejë la itre perofeta thoi ka troa amenune la ka ala nyim. Tro ha elë la ngazo, nge tro ha patre  trootro la ihnim ne la ka ala nyim. Ngo öni nyidrëti fe ka hape: “Tro ha cainöjëne la maca ka loi ne la Baselaia e cailo fen nyine anyipicine kowe la nöjei nöj; ame hna traqa pi la pun.”—Mataio 24:14.

Eje hi, tro la itre xa hatren a eatr qëmeken, me ngöne la ijine lep apatrenyi Ierusalema hnei angetre Roma. Ngo hapeu, tha tro kö lai a hane eatr elany? Eö kö a goeëne la kola eatr asë la hna perofetan hnei Iesu enehila?

Ame la ketre hatren göne la ijine celë hë nyidrë, tre, “ewekë ka sis ka xulu fë hnëjin.” (Mataio 24:15) E 66 M.K., “itre trongene isi” i Roma la ewekë ka sis, ke angatr a hmi koi nöj, me cile fë darapo. Itre trongene isi a cile xötreithi Ierusalema, me thë la ketre götrane la itra etë. (Luka 21:20) Matre hnene la “ewekë ka sis,” hna cile menu ngöne la götran hna mekun ka hape, “gaa hmitrötr.”

Öni Iesu hmaca: “Troa traqa la akötr atraqatr, ewekë ka tha hane kö traqa qaane lo Akötresie a nyiqaane xupe la fene hnengödrai uti hë enehila, nge tha tro hmaca kö a hane tun.” E 70 M.K., hnei angetre Roma hna lep apatrenyi Ierusalema. Akötre atraqatre lai koi angetre Iudra, ke hna lep apatrene la ‘traone ka hmitrötr,’ me uma ne hmi. Ketre, itre thauzan lao atre hna humuth la drai cili. (Mataio 4:5; 24:21) Kolo petre hi a lep angazone la traon me angetre Iudra, matre goi apëne fe la hmi i angatr, hna acil a itre thauzan lao macatre. Haawe, trotrohnine hi së laka, e tro hmaca a eatre la hna qaja hnei Iesu, tha fene akötre kö la ka treqe së.

Hetre ewekë pala kö nyine tro Iesu me itretre dreng a ithanatane göne la ijine celë hë nyidrë, me pune la fene celë. Nyidrëti a hmekë angatr, wanga tro angatr a tro me “itre Keriso thoi me itre perofeta thoi.” Tro la itre atre cili a thele troa “amenune la itre atr me itre hna iën.” (Mataio 24:24) Ngo tha tro kö a amenu angatr, ke öhne hi angatr la itre Keriso thoi, ngo ame göne la ijine celë hë Iesu, pëkö ka atreine öhn.

Iesu a hamë ithuemacanyi jë göne la akötr atraqatr ka troa traqa elany. Öni nyidrë: “Tro ha miti la jö, nge tha tro kö a hudrume la treu, nge tro ha mala la itre wëtresij qa hnengödrai, nge tro ha jumejume la itre ewekë ka men e hnengödrai.” (Mataio 24:29) Maine nyipici laka, tha nyipi trotrohnine kö itre aposetolo, ngo atre hi angatr ka hape, tro ha ketre pengöne la ijine cili.

Tune kaa la itre atr ngöne la ijine cili? Öni Iesu: “Tro hë la itre atr a menumenu hnei xou ngöne la angatr a troa öhne la itre ewekë ka troa traqa e celë fen, ke tro ha jumejume la itre ewekë ka men e hnengödrai.” (Luka 21:26) Iesu hi lai a qaja ka hape, ijine xou atraqatre la ijine cili, a pë pala kö ka hane xou tun.

Iesu a akeukawanyi angatre jë me hape, ngöne la ijine traqa la ‘Nekö i atr cememine la men me lolo atraqatr,’ tha nöjei atr asë kö la ka troa xou. (Mataio 24:30) Eje hi, ase hë nyidrëti lo qaja ka hape, tro Akötresie a “ahopatrene la itre drai cili pine la itre hna iën.” (Mataio 24:22) Ngo eje hi laka, ketre pengöne pi hë la aqane qejepengöne Iesu la drai cili. Matre tune kaa la aqane tro la itretre dreng ka mele nyipici a ujë? Öni Iesu koi itre ka xötrethenge nyidrë: “Ame hë la kola nyiqaane eatre la itre ewekë cili, mejë jë, nge gala jë draië, ke calemi hë la iamele koi nyipunie.”—Luka 21:28.

Ngo tro angatr a atre tune kaa ka hape, easenyi hë la pun? Iesu a hamëne jë la ceitun ne la iwacua. Öni nyidrë: “Ame hë la kola sajem, atre hë nyipunie laka, easenyi hë la ijine hedredrei. Ketre tune mina fe, ame hë la nyipunieti a öhne la itre ewekë cili, lapa atre ju ka hape, easenyi hë angeic, nge angeice hë e celë qe ne qëhnelö. Nge eni a qaja hnyawa koi nyipunie laka, tha tro kö a patre la xötre celë, nge tha  pane traqa kö la itre ewekë cili.”—Mataio 24:32-34.

Haawe, e öhne hë itretre dreng la kola ce eatr la nyimu götrane lai hatren, tro hë angatr a atre ka hape, ijine hë. Ame hnei Iesu hna hmekë itre ka troa melëne la ijine cili, öni nyidrë:

“Ngo ame göi drai me hawa, pëkö ka atre, thatre kö la itre angela ne hnengödrai, nge goi thatre fe la Nekön, ngo Keme hmekuje hi. Ame la ijine celë hë la Nekö i atr, tro ha tune la hneijine i Noa. Ke ngöne lo ijine patre pala kö la Iwë, itre atr a xeni me ij, nge kola faipoipo la itre trahmany, me ihamë föeë, uti hë la drai ne Noa a lö hnine la aka, nge tha semesinene kö angatr, uti hë traqa la Iwë me apatrenyi angatr asë. Haawe, tro fe a hane tune lai ngöne la ijine celë hë la Nekö i atr.” (Mataio 24:36-39) Iesu a aceitunëne lai me Iwë ngöne la hneijine i Noa—ewekë ka ketre la fene hnengödrai asë.

Trotrohnine hi la foa aposetolo laka, nyipiewekë troa hmek. Matre öni Iesu: “Wange pala kö nyipunie ke hace jë la itre hni nyipunie hnene la hna xeni atruny, me iji atruny, me hnehengazone la itre ewekë thatraqane la mel, ke wanga asesëkötrë nyipunieti jë hnene la drai cili tune la ketre itheth. Nge tro lai a traqa kowe la nöjei atr asë e celë fen. Haawe, catre jë hmek, nge the mano kö xëwe koi Akötresie, matre mele pi nyipunie qa ngöne la itre ewekë cili, me cile qëmekene la Nekö i atr.”—Luka 21:34-36.

Iesu hmaca a amamane laka, ame la hnei nyidrëti hna ithanatan, tre tha göne hmekuje kö la ketre götrane la fen, maine koi angetre Iudra hi, me Ierusalema. Nyidrëti pe a ithanatane la ewekë ka troa “traqa kowe la nöjei atr asë e celë fen.”

Öni nyidrë ka hape, loi e tro la itretre dreng a hmek, me thupën, me hnëkë. Nyidrëti a acatrene hmaca jë la mekune cili jëne la ketre ceitun, öni nyidrë: “Trotrohnine jë nyipunie ka hape: Maine tro la trene hnalapa a atre la hawa e jidr ne traqa la atrekënö, tro angeice lai a hmek, nge tha tro kö angeic a nue la atrekënö troa lö hnine la uma i angeic. Qa ngöne lai, loi e ka hnëkë fe nyipunie, ke tro ha traqa la Nekö i atr ngöne la drai me hawa hnei nyipunieti hna tha mekune kö.”—Mataio 24:43, 44.

Thupene lai, Iesu a thue kepin koi itretre dreng troa madrin. Öni nyidrë ka hape, e eatr asë hë la itre hna perofetan, tro ha hetre “hlue” ka hmek me huliwa. Nyidrëti a hamëne jë la ketre ceitun hna melën hnei itretre dreng. Öni nyidrë: “Drei la hlue ka nyipici me ka inamacan, lo hna acil hnene la maseta hune la itre atrene la hnalapa, matre troa hamë xeni ngöne la nyipi ijin? Manathithi la hlue cili e traqa la maseta a öhnyi angeic e kuca lai! Nyipici, eni a qaja hnyawa koi nyipunie laka, tro hë nyidrëti a acili angeic hune la nöjei ewekë i nyidrë asë.” Ngo e traqa jë la “hlu” qenahmo me qanangazo itre xan, “tro ha catre la aqane nyithupene maseta la ngazo i angeic.”—Mataio 24:45-51; Wange ju Luka 12:45, 46.

Tha Iesu kö a qaja ka hape, tro la itre xa hlue i nyidrë a qenahmo me kuca la ngazo. Matre nemene la ini? Aja i nyidrë tro angatr a hmek me huliwa catr. Nge celë hi ka mama ngöne la ketre ceitune i nyidrë.