An be talatalon wulafɛ, Nisan tile 11nan na. Tile be ɲini ka ban ani Yezu fana tun be baaraba min kɛra dugukolo kan, o fana sera a laban yɔrɔ la. Loon o loon tile kɔnɔ, Yezu be mɔgɔw kalan Alabatosoba kɔnɔ. Ni suu kora, a be bɔ ka taga si dugu kɔfɛ. Mɔgɔ caaman y’u mako don Yezu ka kalanw na. ‘Sɔgɔmada joona, mɔgɔ bɛɛ be taga a sɛgɛrɛ Alabatosoba kɔnɔ k’a lamɛn.’ (Luka 21:37, 38). Sisan, Yezu be Oliviyeyirikulu kan n’a ka kalanden Piyɛri, Andere, Zaki ani Zan ye.

O mɔgɔ naani tagara sigi ni Yezu ye u dan na. U be jɔrɔla Alabatosoba koo la sabu Yezu y’a fɔ u ye ko a bena halaki. Nka, u be miirila koo wɛrɛw la fana. A ma mɛɛn, Yezu tun ye u jija ko: “Aw fana labɛnnin ka kan ka to, bari aw te miiri waati min koo la, o waati la, Mɔgɔ Dencɛ bena na.” (Luka 12:40). “Mɔgɔ Dencɛ bena segi loon min na,” Yezu kumana fana o koo la (Luka 17:30). Yezu ye kuma minw fɔ u ye, yala u ɲɛsinna Alabatosoba koo ma wa? Cidenw b’a fɛ ka dɔ lɔn o koo la. U ye Yezu ɲininga ko: “Koo nunu bena kɛ tuma jumɛn? Taamasiɲɛ jumɛn bena i nako, ni diɲɛ laban koo yira?”—Matiyo 24:3.

Cidenw ɲɛɛ tun be Alabatosoba min na, n’a sɔrɔ u tun be miirila ale lo halakili koo la. U b’u yɛrɛ ɲiningara fana ko Mɔgɔ Dencɛ bena kɛ a ka masaya la wagati juman? N’a sɔrɔ u hakili jigira Yezu ka ntalen dɔ la, a tun ye min la “faamanden” dɔ koo la. O deen tagara jamanajan dɔ la walisa ka masaya sɔrɔ ani o kɔ, a segira ka na (Luka 19:11, 12). A laban, cidenw b’u yɛrɛ ɲiningara “diɲɛ laban” kɔrɔ ye min ye.

Yezu ye u jaabi k’a pereperelatigɛ: a ye tagamasiɲɛ dɔ fɔ u ye min b’a yira wagati min na Yahutuw ka koow sigicogoya bena ban ani Alabatosoba bena halaki. Nka, a ma dan o ma. Loon nataw la, o tagamasiɲɛ tun bena kerecɛnw dɛmɛ u k’a lɔn ko Krista be yen masaya la ani ko duniɲa laban wagati surunyana.

Saan caaman o kɔ, cidenw y’a ye ko Yesu ka kiraya kuma be dafara. Yezu tun kɔnna ka koo minw fɔ, u caaman y’a daminɛ ka dafa u ɲɛɛ na. Saan 37 o kɔ, o kɔrɔ saan 70 wagati la, kerecɛn minw tun be sii la ani u tora ɲɛɛ na, Yahutuw ka koow sigicogoya ani u ka Alabatosoba halakili ma bari olu la. Nka, fɔɔ ka taga se saan 70 ma, Yezu tun kɔnna ka koo minw fɔ, u bɛɛ ma dafa. O la do, mun lo tun bena a yira ko Yezu be masaya la sankolo la? Yezu ye cidenw dɛmɛ k’o faamu.

Yezu ko u bena “kɛlɛw kibaru, ani kɛlɛw mankan mɛn” ani ko “siya dɔ bena wili siya wɛrɛ kama. Jamana dɔ bena wili jamana wɛrɛ kama.” (Matiyo 24:6, 7). A y’a fɔ fana ko “dugukolo bena yɛrɛyɛrɛ kosɔbɛ yɔrɔ dɔw la. Fɔɲɔbanaw ni kɔngɔ bena don yɔrɔ dɔw la fana.” (Luka 21:11). Yezu y’a ka kalandenw lasɔmi ko: “Mɔgɔw bena aw minɛ k’aw tɔɔrɔ kosɔbɛ.” (Luka 21:12). Kira ngalontigɛlaw bena wuli ka mɔgɔ caaman lafili. Kojugukɛlaw bena caya ani mɔgɔ caaman ka kanuya bena  sumaya. Yezu y’a fɔ fana ko: “Kibaru Duman waajuli na kɛ diɲɛ yɔrɔw bɛɛ la sankolo masaya ko la ka kɛ siyaw bɛɛ seere ye. O kɔ, a laban na se.”—Matiyo 24:14, ABM.

Yezu ka kiraya kuma faan dɔw dafara sanni Ɔrɔmukaw ka Zeruzalɛmu halaki. U dɔw dafara fana a halaki tuma na. Yala o kiraya kuma tun bena dafa bɛrɛbɛrɛ kɔfɛ tugun wa? Yezu ye kiraya kuma min fɔ, a kɔrɔtanin lo kosɔbɛ. Koo minw b’a yira k’o kiraya kuma fanba be dafara an ka wagati la, yala aw y’o kɔrɔsi wa?

Fɛɛn minw tun bena a yira ko Yezu be masaya la, u la kelen ye “fɛnjugu cɛnnikɛla” ye (Matiyo 24:15). Saan 66 Krista Tile La (K.T.L), Ɔrɔmukaw ka “kɛlɛbolo ye dugu lamini” n’u ka jamana ka darapo ye, u tun b’o min jati batofɛn ye. O kɛlɛbolo lo kɛra “fɛnjugu cɛnnikɛla” ye o wagati la. U ye Zeruzalɛmu dugu lamini ani u y’a kogo faan dɔw ci (Luka 21:20). O cogo la, “fɛnjugu cɛnnikɛla” tun man ɲi ka kɛ yɔrɔ min na, a tagara lɔ yen. Yahutuw tun be o yɔrɔ jati “yɔrɔ senuman” ye.

Yezu y’a fɔ fana ko: “O bena kɛ tɔɔrɔba ye, min ɲɔgɔn ma kɛ ka ye kabini diɲɛ dantuma, fɔɔ ka na se bii ma, ani o tɔɔrɔ ɲɔgɔn fana tena kɛ tugu abada.” Saan 70 K.T.L, Ɔrɔmukaw ye Zeruzalɛmu dugu halaki. Yahutuw ka “dugu senuman” ani u ka Alabatosoba halakili kɛra tɔɔrɔba ye u fɛ. Mɔgɔ waa caaman fana fagara o sen fɛ (Matiyo 4:5; 24:21). O koo ɲɔgɔn tun ma deli ka Zeruzalɛmu dugu ni Yahutuw sɔrɔ. O halakili yɛrɛ lo ye daan sigi Yahutuw ka koow sigicogoya la. U tun tɛna basigi Alabatosoba kan tugun walisa ka batoli kɛ i ko u tun be deli k’a kɛ cogo min na kabi wagatijan. Yezu ka kiraya kuma bena dafa bɛrɛbɛrɛ wagati min na, an ka la a la k’o bena kɛ tɔɔrɔba yɛrɛ lo ye.

Tagamasiɲɛ min bena a yira ko Yezu be masaya la ani ko duniɲa banwagati sera, Yezu n’a ka kalandenw bele be baro kɛra o kan. Yezu y’u lasɔmi ko farati b’a la ka boliboli “Krisita nkalontigɛlaw ni cira nkalontigɛlaw” kɔ. N’u be se, olu bena a ɲini ka “Ala ka ɲɛnatɔmɔlenw lafili.” (Matiyo 24:24, ABM). Nka, o mɔgɔ ɲɛnatɔmɔninw tɛna a to u k’u lafili. Krista ngalontigɛlaw kɔni be se ka ye ɲɛɛ na. Nka, tuma min na Yezu bena kɛ masaya la, mɔgɔ ɲɛɛ tɛna la a kan.

Yezu kumana tɔɔrɔba dɔ koo la min bena juguya ka tɛmɛ saan kɛmɛkulu fɔlɔ ta kan. O bena kɛ duniɲa juguman nin bantuma na. A ko: “Tile bena fin, kalo tena yeelen bɔ tugu, lolow bena bɔ sankolo la ka ben, ani sankolo fangatigiw bena yɛrɛyɛrɛ.” (Matiyo 24:29). Ciden minw y’o kumaw mɛn, olu m’a lɔn o koo bena kɛ tigitigi cogo min na. Nka, u tun lanin b’a la k’o jatigɛkow bena kɛ.

O kabakow tun bena nɔɔ juman lo to mɔgɔw kan? Yezu ko: “Mɔgɔ caaman bena sa jatigɛkojugu bolo, kabako miiri kosɔn minw be nana kɛ dugukolo kan. Sankolofɛnw bena ɲagami ɲɔgɔn na.” (Luka 21:26). Tiɲɛn na, tɔɔrɔba min ma adamadenw sɔrɔ ka ye, Yezu b’o lo lakalila ten.

Nka, Yezu y’a ka cidenw hakili sigi ko tuma min na ‘Mɔgɔ Dencɛ bena na sankaba kan ni sebagaya ni nɔɔrɔ ye,’ mɔgɔ bɛɛ lo tɛna kasi (Matiyo 24:30). A tun kɔnna k’a fɔ ko Ala ye “minw woloma k’u kɛ a yɛrɛ taw ye, olu kosɔn,” Ala bena dɔ kɛ dɔ ye (Matiyo 24:22). Yezu ye jatigɛko minw fɔ, n’olu nana a daminɛ ka dafa tuma min na, a ka kalanden kantigiw ka ɲi ka mun lo kɛ? Yezu y’u jija ko: “Ni o kow daminɛna tuma min na, a’ ye aw kɔ lawuli ka aw kun kɔrɔta, katuguni aw kunmabɔli surunyara.”—Luka 21:28, ABM.

Nka, Yezu ka kalanden minw bena kɛ o wagati la, olu bena a lɔn cogo di ko duniɲa laban surunyana? Yezu ye ntalen dɔ la torosun koo la. A ko: “N’a bolow nugura tuma min na ka furaburu bɔ, aw b’a lɔn ko samiɲa surunyana. O cogo kelen na, aw mana o koow bɛɛ kɛtɔ ye  tuma min na, aw k’a lɔn ko Mɔgɔ Dencɛ natuma sera ka ban, a be sira la. Tiɲɛ na, ne b’a fɔ aw ye ko bii mɔgɔ nunu bɛɛ tena sa, ni koo nunu bɛɛ ma kɛ.”—Matiyo 24:32-34.

O la do, ni Yezu ka kalandenw y’a ye k’o tagamasiɲɛ kɔnɔko caaman be dafara tuma min na, u ka ɲi k’a faamu ko laban surunyana. Yezu ka kalanden minw bena kɛ o wagati gwɛlɛw na, a ye olu lasɔmi ko:

“Mɔgɔ si t’o loon n’o waati lɔn. Hali mɛlɛkɛw ni Ala Dencɛ t’a lɔn, fɔɔ Faa Ala kelenpe. Koo min tun kɛra Nuhun ka tile la, o ɲɔgɔn bena kɛ fana Mɔgɔ Dencɛ natuma la. Bari sanni jiba ka na, mɔgɔw tun be dumunibabaw kɛ ka minni kɛ, ani ka furu fɔɔ ka taga se Nuhun donlon ma kurunba kɔnɔ. O tun te miiri foyi la, fɔɔ jiba nana u halaki. Mɔgɔ Dencɛ ka nako bena kɛ ten fana.” (Matiyo 24:36-39). Yezu tun b’a lamɛnbagaw hakili jigira le ko sanjiba min nana Nuhun ka wagati la, o kɛra dugukolo kuru bɛɛ lo kan. O la, duniɲa laban fana bena kɛ dugukolo kuru bɛɛ lo kan.

Ciden minw tun be Yezu lamɛnna Oliviyeyirikulu kan, siga t’a la, olu y’a faamu ko a kɔrɔtanin lo u ka to ɲɛɛ na. Yezu ko: “Aw k’aw yɛrɛw kɔlɔsi, aw kan’a to nugubagatɔya, ni dɔrɔtɔya, ani diɲɛ hamikow k’aw hakili ɲagami, n’o tɛ, laban loon bena bari aw la, bari o loon bena cun diɲɛ mɔgɔw bɛɛ kan i n’a fɔ jɔɔ be fɛɛn minɛ cogo min na. Aw ye jija ka Ala daali tuma bɛɛ, ka kɛ mɔgɔ timinadiyaninw ye, waasa aw ka se ka kisi o koo nataw bɛɛ ma, ani aw ka se ka lɔ Mɔgɔ Dencɛ ɲakɔrɔ.”—Luka 21:34-36.

O kumaw fɛ, Yezu y’a yira tugun ko a be kiraya kuma min fɔra, o tɛna kɛ kɔlɔkɔlɔko ye. Yezu be koo minw fɔra, u tɛna kɛ Zeruzalɛmu dugu wala Yahutu siya dɔrɔn na yanni saan 30 wala 40 cɛ. O koow ɲɛsinna “diɲɛ mɔgɔw bɛɛ” lo ma.

Yezu ko a ka kalandenw ka ɲi ka to ɲɛɛ na ani u labɛnnin ka ɲi ka to. A ye ntalen dɔ la walisa ka sinsin o lasɔmi kuma kan. A ko: “Aw b’a lɔn ko ni sotigi tun be soon nawaati lɔn sufɛ, a tun bena to ɲana k’a bali ka don a ka soo kɔnɔ. O kosɔn, aw fana labɛnnin ka kan ka to, bari aw te miiri waati min koo la, o waati la Mɔgɔ Dencɛ bena na.”—Matiyo 24:43, 44.

O kɔ, Yezu y’a ka kalandenw dɛmɛ walisa u jigi kana tigɛ. A y’u hakili sigi ko ale ka kiraya kuma bena dafa tuma min na, “jɔnkɛ” dɔ bena kɛ yen. O jɔncɛ bena to ɲɛɛ na ani k’a jija baara la. Yezu ye wale dɔ lakali min faamuyali ka nɔgɔ a ka cidenw fɛ. A ko: “Jɔnkɛ dannamɔgɔ hakiliman min makɛ bɛ a bila jɔn tɔw kun na ka u ka dumuni ko ɲɛnabɔ a waati latigɛlen na, o ye jɔni ye? O jɔnkɛ min makɛ nalen y’a sɔrɔ a b’a kɛ a cogo la, o ye dubaden ye. Tiɲɛ la ne b’a fɔ aw ye ko o makɛ na o jɔnkɛ sigi a bolofɛn bɛɛ kun na.” Nka, n’o “jɔnkɛ” nin ye ŋaniya jugu ta ani a y’a daminɛ ka to k’a tɔɲɔgɔnw tɔɔrɔ, a kuntigi bena a “halaki ka a niyɔrɔ di a ma filankafow fɛ.”—Matiyo 24:45-51, ABM; Luka 12:45, 46 lajɛ.

Nka, Yezu ka kuma kɔrɔ tɛ ko a ka kalanden dɔw bena ŋaniya jugu ta. Yezu b’a fɛ a ka kalandenw ka mun lo faamu? A b’a fɛ u ka to ɲɛɛ na ani u jijanin ka to baara la. A y’o lo ɲɛfɔ ntalen wɛrɛ sababu fɛ.