Maya nya Hari Dua, lalu 11 Nisan nyauka abis. Pia mega, pengawa nginjil Jesus ba dunya pan nyauka abis. Sebedau tu, maya siang hari, iya ngajar ba Rumah Sembiang. Lalu udah nya, iya ngiga endur bemalam ba luar Jerusalem. Mayuh orang deka betemu enggau Jesus lalu “datai ngagai Rumah Sembiang laban deka mendingka iya.” (Luke 21:37, 38) Diatu Jesus duduk ba Bukit Kana enggau empat iku rasul iya, iya nya Peter, Andrew, James enggau John.

Empat iku rasul nya datai ngagai iya kediri. Sida irau enggau utai ke disebut Jesus pasal Rumah Sembiang, laban iya madah nadai sigi batu pan deka mengkang betusun ba atas pangan diri. Tang bisi mayuh agi utai deka ditemu sida. Sebedau tu, Jesus kala meransang sida: “Kita patut sedia, laban Anak Mensia deka datai ba jam ti enda disangka kita.” (Luke 12:40) Iya mega nyebut pasal “hari Anak Mensia mandangka diri.” (Luke 17:30) Kati jaku ke disebut Jesus tu bekaul enggau Rumah Sembiang? Empat iku bala rasul keran deka nemu. Ku sida: “Padahka ngagai kami, kemaya semua utai tu deka nyadi, lalu nama tanda ti nunjukka nuan pulai baru ngagai kami, sereta tanda pengujung dunya tu?”—Matthew 24:3.

Sida engka berundingka pengerusak Rumah Sembiang ke ulih dipeda lebuh sida benung duduk ba atas Bukit Kana. Lalu sida mega nanya pasal tanda Anak Mensia deka pulai baru. Sida engka agi ingat sempama Jesus pasal “siku orang ke ari ruang bilik raja” ke ‘mupuk laban iya deka nyadi raja lalu udah nya, iya deka pulai baru.’ (Luke 19:11, 12) Kepenudi iya, sida deka nemu nama “tanda pengujung dunya tu” lalu nama deka nyadi maya nya.

Pengudah nya, Jesus madahka tanda ke nunjukka kemaya Jerusalem enggau Rumah Sembiang deka dirusakka. Taja pia, tanda ke diberi Jesus mai reti ti lebih agi ari nya. Tanda tu deka nulung orang Kristian kemayaharitu nemu, sida benung idup ba maya Jesus “pulai baru,” enggau ba pengujung sistem dunya tu.

Seraya masa belalu ari taun siti ngagai taun siti, bala rasul meda jaku benabi Jesus dikeamatka. Mayuh utai ke dipadahka Jesus nyadi ba jeman sida. Nya alai, 37 taun pengudah nya, iya nya ba taun 70 M., orang Kristian ke bejaga maya nya, udah besedia napi pengerusak Jerusalem sereta Rumah Sembiang. Tang nyentukka taun 70 M., enda semua jaku benabi Jesus dikeamatka. Lalu sekeda utai ke dipadahka Jesus enda nyadi nyentukka maya iya pulai baru, lebuh iya nyadi raja ba Perintah Petara. Nya alai, nama tanda ti nunjukka iya pulai baru? Peratika utai ke disaut Jesus ngagai bala rasul iya.

Jesus madah deka bisi “munyi perang, enggau berita pasal perang” enggau “bansa siti deka beperang ngelaban bansa siti, lalu perintah siti deka beperang ngelaban perintah siti.” (Matthew 24:6, 7) Iya mega madah “tanah berenyang ti balat deka nyadi. Lapar pungkang enggau penyakit berampit mega deka nyadi ba mayuh bengkah endur.” (Luke 21:11) Lalu Jesus nangkan bala murid iya: “Orang deka nangkap sereta merinsaka kita.” (Luke 21:12) Mayuh nabi  ti pelesu deka bisi, lalu nesatka mayuh orang. Penyai deka majak nyadi, lalu pengerindu orang ke pangan diri deka majak kurang. Nambahka nya, iya madah: “Berita Manah pasal Perintah Petara deka ditusui ba serata dunya, nyadika saksi ngagai semua bansa. Udah nya, baru pengujung deka datai.”—Matthew 24:14.

Sekeda jaku benabi Jesus dikeamatka sebedau sereta lebuh orang Rome ngerusakka Jerusalem. Tang kati jaku benabi Jesus ke bukai deka dikeamatka ba maya ti deka datai, enggau chara ti besai agi? Kati nuan bisi meda bukti jaku benabi Jesus benung dikeamatka kemayaharitu?

Nambahka nya, siti ari tanda Jesus pulai baru nya “utai ti dipegedi ke mai pengerusak” ayan. (Matthew 24:15) Nama reti nya? Ba taun 66 M., utai tu merujuk ngagai “bala soldadu” Rome ke mai bendira enggau lambang bukai ari menua sida, ngelulung Jerusalem sereta ngerusakka beberapa iti dinding kuta Jerusalem. (Luke 21:20) Enggau nya, “utai ti dipegedi ke mai pengerusak” datai ba endur ke dikumbai orang Judah “kudus.”

Udah nya, Jesus madah: “Maya nya, Penusah ti Besai deka nyadi. Penusah nya nadai kala nyadi kenyau ari penumbuh dunya nyentuk ngagai seharitu, lalu iya enda agi nyadi pengudah nya.” Ba 70 M., penusah ti besai nyadi ba jeman nya lebuh perintah Rome ngerusak Jerusalem, iya nya ‘nengeri ti kudus’ sereta Rumah Sembiang iya. (Matthew 4:5; 24:21) Sebedau tu, Jerusalem kala diserang munsuh. Tang ba taun 70 M., pengerusak ke nyadi balat agi ari semua serang ke kala nyadi suba. Lalu pengudah Jerusalem dirusak, pengawa sembah orang Judah enda agi bepanggai ba Rumah Sembiang baka ke udah digaga sida pengelama beratus-ratus taun. Taja pia, jaku benabi Jesus pasal pekara tu deka dikeamatka enggau chara ti besai agi ba jemah ila, lalu lebih agi ngenakutka ari utai ke kala nyadi di Jerusalem ba taun 70 M.

Jesus bedau abis nerangka pasal tanda iya pulai baru nyadi raja ba Perintah Petara enggau tanda pengujung dunya tu. Jesus meri jaku tangkan ngagai bala murid iya, ngambika bala murid iya enda nitihka “Kristus ti pelesu, enggau nabi ti pelesu.” Jesus madah sida tu deka “nesatka orang. Enti ulih, sida indah deka nesatka nembiak Petara ke udah dipilih.” (Matthew 24:24) Tang nembiak Petara ke dipilih enda ulih ditesatka. Penatai Kristus ti pelesu ulih dipeda, tang lebuh Jesus pulai baru, iya enda ulih dipeda.

Bekaul enggau penusah ti besai agi ke deka nyadi ba pengujung sistem tu, Jesus madah: “Mata panas deka bebali petang, lalu bulan nadai agi mancharka penampak iya. Bintang deka labuh ari langit, lalu kuasa ti ba langit deka begegar.” (Matthew 24:29) Pengudah ninga jaku Jesus, bala rasul enda nemu enggau silik pasal utai ke deka nyadi. Tang utai tu tentu luar biasa.

Nama reaksi orang lebuh utai tu nyadi? Jesus nerangka: “Lebuh orang nganti utai ti deka nyadi ba serata dunya, sida deka luput laban takut ketegal kuasa ti ba langit deka begegar.” (Luke 21:26) Iya ke amat, utai ke disebut Jesus ngambarka maya ti pemadu ngenakutka ba sejarah mensia.

Taja pia, Jesus madah ngagai bala rasul iya, ukai semua orang deka tusah ati maya ‘Anak Mensia datai ngena kuasa enggau mulia ti besai.’ (Matthew 24:30) Jesus udah madahka Petara deka masuk champur “ketegal sida ke udah dipilih.” (Matthew 24:22) Nya alai, nama patut digaga bala murid Jesus ti tetap ati lebuh semua utai tu nyadi? Ku Jesus meransang bala murid iya: “Lebuh utai tu belabuh nyadi, bediri rurus lalu angkatka pala kita, laban pengelepas kita nyau semak.”—Luke 21:28.

Tang baka ni bala murid Jesus kemayaharitu ulih nemu pengujung sistem tu nyau semak? Jesus madahka siti jaku sempama pasal kayu ara:  “Lebuh dan muda iya ke lembut belabuh bedaun, kita nemu musin panas nyau semak. Pia mega, lebuh kita meda semua utai tu, kita nemu Anak Mensia udah ba mua pintu. Enggau bendar aku madah ngagai kita, rebak tu enda mati seagi-agi semua utai tu bedau nyadi.”—Matthew 24:32-34.

Lebuh bala murid meda mayuh ari tanda ke dipadahka Jesus udah dikeamatka, sida patut nemu pengujung nyau semak. Nya alai, Jesus deka meransang bala murid ke idup ba hari ti penudi.

Ku Jesus: “Nadai orang nemu hari enggau jam iya. Melikat ke ba serega enda nemu. Indah Anak pan enda nemu. Semina Apai aja nemu. Laban baka maya jeman Noah kelia, baka nya meh gaya maya Anak Mensia pulai baru ngagai kita. Sebedau Bah Besai nyadi, orang majak makai ngirup, jadi melaki-bini, nyentuk ngagai maya Noah tama ke dalam bandung. Sida enda kiruhka utai ke nyadi, nyentuk ngagai maya ai bah datai lalu munuh semua sida. Baka nya meh maya Anak Mensia pulai baru ngagai kita.” (Matthew 24:36-39) Jesus ngena chunto Bah Besai ke nyadi maya jeman Noah kena madahka, lebuh Anak Mensia pulai baru, nya deka mai kesan ngagai serata dunya.

Bala rasul ke ningaka Jesus ba Bukit Kana, nemu sida patut tetap bejaga. Jesus madahka: “Bejimat kita enggaika ati kita kelalu balat ditekan ketegal kelalu bendar makai enggau ngirup sereta irauka pengidup, nyentukka hari nya ngenyit ninggang kita baka panjuk. Laban hari nya deka ninggang semua orang ke diau ba serata dunya. Nya alai, seruran bejaga sereta suah bebendar minta ngagai Petara ngambika kita ulih diselamatka ari semua utai ke patut nyadi tu, lalu kita ulih bediri ba mua Anak Mensia.”—Luke 21:34-36.

Jaku benabi Jesus ukai semina dituju ngagai utai ke deka nyadi dalam timpuh beratus taun, tauka ngagai Jerusalem enggau bansa Judah aja. Tang iya madah utai nya deka nyadi ngagai “semua orang ke diau ba serata dunya.”

Jesus madah ngagai bala murid iya, sida patut bejaga lalu besedia. Jesus ngena jaku sempama kena meri jaku tangkan ngagai bala murid iya: “Perundingka pekara tu: Enti orang ke bempu rumah nemu jam berapa penchuri deka datai maya malam hari, iya tentu deka bejaga semalam-malam, lalu enda nejuka rumah iya dirumpak. Nya alai, kita patut sedia, laban Anak Mensia deka datai ba jam ti enda disangka kita.”—Matthew 24:43, 44.

Udah nya, Jesus madah ngagai bala murid iya kebuah sida patut berasai yakin. Jesus madah lebuh jaku benabi iya dikeamatka, deka bisi “ulun” ti bejaga sereta bagas gawa: “Sapa kebendar iya ke tetap ati sereta bepenemu-dalam, ke udah dipilih tuan iya ngemataka semua ulun ti bukai, ngambika meri sida pemakai ba maya ti patut? Ulun nya tentu deka gaga ati lebuh tuan iya datai lalu nemu iya benung ngereja pengawa iya! Enggau bendar aku madah ngagai kita: Tuan nya deka milih ulun nya ngemataka semua reta tengkira iya.” Tang enti “ulun” nyadi jai lalu berengkah ngelayan ulun ke bukai enggau chara ti enda manah, tuan iya deka “balat amat ngukum iya.”—Matthew 24:45-51; Banding Luke 12:45, 46.

Tang Jesus enda madahka sekeda ari murid iya deka nyadi jai. Taja pia, nama deka diajar iya ngagai bala murid iya? Iya deka sida terus bejaga sereta bagas gawa. Baka ke deka diajar iya ba siti agi sempama pengudah tu.