Yésus a te ve minlômane mié biyalane ya minsili ba te nye sili a lat a ndem ja ye liti na a nga jôé a asu’ulane ya nta’ane mam. A ôsimesan ôte nlô, a ve be abendé a zene ya nkana ôfe. E bôte ba ye nyiñ éyoñ a ye jôé ba ye yen ane nkulan ajô ôte wo tôéban.

A taté nkana wé a jô’ô na: “Nde éjôé ya yôp ja ye funane bengo be binga awôm mbe be nga nyoñe belambe bap a ke tôbane môt a luk. Betane y’été be mbe mekut betane ke mimfefek.”​—Matthieu 25:1, 2, Mfefé Nkôñelan.

Yésus a nji jô valé na, ngabe jia ya beyé’é bé ba ye nyoñ Éjôé ya yôp e ne mekut a ngabe fok e ne mimfefek. Ve, a liti na, beyé’é be ne ngule ya tobe na ba mombô nge ke ôyo mfa’a ya mame ma lat a Éjôé. Ve Yésus a too ndi na, mbo ésaé wé ase a ne ba’ale élate jé a bi bibotan bi Ésa wé.

Nkana ôte, bindune bi ngon awôme bise bia kui nseñ a ke tôbane môt a luk asu na be ke nsamba a beluk. Éyoñe môt a luk a suan, bindune bi ngone bia ye liti nye éfufup a belambe bap, be va’a nye ôlu’u nté a kee minga wé nda é ne nkômesan asu dé. Ve, mam ma ye viane wulu aya?

Yésus a jô na: “Ba be mbe mekut, éyoñ be nyoñeya belambe bap, be nga vuane nyoñe mbon. Ve ba be mbe mimfefek, be nga nyoñe  mbon e mendek a belambe bebien. Amu nlu’u minga a nga bo te ji’a so, nde bese be nga bili atek a ke ôyo.” (Matthieu 25:3-5, Mfefé Nkôñelan) Nlu’u minga a ji’a ke so ane ba too be buni’i. A nyoñ abui éyoñ aval e ne na, bindune bi binga bia su’ulane ke ôyo. Minlôman mia ve’ele simesan jame Yésus a nga kañete, ajô ya éwôlô môt é nga ke si é ne ôyap a su’ulane fe “bulan, mvuse nyoñan éjôé.”​—Luc 19:11-15, Mfefé Nkôñelan.

Éve’ane ya bindune bi ngon awôm, Yésus a liti jame da boban éyoñe môt a luk a su’ulane ke so: “E zañ alu, ôyenga ô nga jô: Nlu’u minga a soya, kuan atan, mi ke tôbane nye!” (Matthieu 25:6, Mfefé Nkôñelan) Ye bindune bengon bi bi ne fo’o nkômesane, ye bia mômbô?

Yésus a ke ôsu a jô na: “Ane bengo be binga bete bese be nga vee a kôme belambe bap. Mekut me nga jô mimfefe’e na: Va’ane bia ngabe ya mbone wônan, amu belambe bangan be nga dim. Mimfefek mi nga yalan a jô na: Teke fo’o! Ô se nguleya yiane bia be mia; ve kelan e be bebo makit mi kus asu denan.”​—Matthieu 25:7-9, Mfefé Nkôñelan.

Bengon betan be ne fo’o mekut amu be nji kui na be tabe nkômesan a mombô asu nzuane môt a lu’u minga. Mbôle mbon wo jemban asu belampe bap, ba yiane ke jeñe wô. Yésus a jô na: “Be ngenan be nga ke kus, ane môt a nga zu lu’u minga a nga so; ane ba be mbe nkôman, ba be be be nga ke vôm be nga di bidi ya aluk: ane be nga dip mbé. Éyoñ ôbe aboñ ô nga lôt, wôna bengone bevo’o be nga su’ulane zu, a jô na a Tat, a Tat, di’i bia mbé. Ve a nga yalan a jô na, me ajô fo’o mia na, me ayeme mia.” (Matthieu 25:10-12) A ne fo’o éngôngole jam éyoñe bia bo teke tabe nkômesan a mombô!

Minlôman mia yiane wô’ô na, môt a lu’u minga Yésus a jôô nye va, a ne émien. Ôsusua, a mbe a tatéya ve’ émien a môt a lu’u minga. (Luc 5:34, 35) Bindune bengon bi ne mimfefe’e ki? Yésus a nga jô “mone nsamba mintômba,” a ye tabe Éjôé ya yôp na: “Taba’ane meses ntiñetane mengeteñ, a belampe benan ve yôñ.” (Luc 12:32, 35) Minlôman mi ne ngule ya yeme na, ajô dap nde Yésus a kobô. Nde ñhe, ñye’elan ôvé Yésus a kômbô ve a lat a nkana ôte?

Yésus a nji yi na be ke ba ve’e befe’e. Nde a suu nkana wé a jô’ô ne sañesañe na: “Ajô te momba’an, amu mi nji yeme môs nge awolo.”​—Matthieu 25:13, Mfefé Nkôñelan.

Da yené fo’o ne ngeññ na, Yésus a ve beyé’é bé abendé a lat a nzuane wé na, ba “yiane mombô.” Asu na be bo teke sube bibotan be nga ka’ale be, aval ane bindune bengon bi ne fek, ba yiane tabe nkômesan a mombô éyoñ a ye so, a ba’ale ndi nlem be bili asu bibotan bia yange be.