Jesu ko to gblọndo na na kanbiọ apọsteli lẹ tọn gando ohia tintin tofi etọn tọn po vivọnu titonu lọ tọn po go. Todin, po ehe po to ayiha mẹ, e yí apajlẹ devo zan nado na yé tudohomẹnamẹ nuyọnẹn tọn de. Mẹhe to gbẹnọ to tintin tofi etọn whenu lẹ wẹ na mọ hẹndi apajlẹ lọ tọn.

E bẹ apajlẹ lọ jẹeji po hogbe ehelẹ po dọmọ: “Ahọluduta olọn tọn sọgan yin yiyijlẹdo awhli ao go he ze miyọ́ngbán yetọn lẹ bo tọ́nyi nado pé asisunọ yọyọ. Atọ́n to yé mẹ yin nulunọ, bọ atọ́n yin nuyọnẹntọ.”—Matiu 25:1, 2.

Jesu ma to didọ dọ mado-awe devi emitọn he na dugu Ahọluduta olọn tọn lẹ tọn na yin nulunọ bọ mado-awe he pò na yin nuyọnẹntọ gba. Kakatimọ, nuhe dọ e te wẹ yindọ, na nuhe dù Ahọluduta lọ, devi emitọn dopodopo tindo nugopipe lọ nado de nado nọ aṣeji kavi nado yin ayihafẹsẹna. Amọ́, Jesu ma tindo ayihaawe depope dọ devizọnwatọ etọn dopodopo sọgan yin nugbonọ bo mọ dona Otọ́ etọn tọn lẹ yí.

To apajlẹ lọ mẹ, awhli ao lọ lẹpo wẹ tọ́nyi nado dokuavọna asisunọ yọyọ lọ bo kọnawudopọ hẹ ẹ to tito alọwle tọn lọ mẹ. To whenue asisunọ lọ na wá, awhli lọ lẹ na tá miyọ́ngbán yetọn lẹ do aliho lọ ji bo na doyẹyigona ẹn dile e plan asiyọyọ etọn jei ohọ̀ he ko yin awuwlena na asiyọyọ lọ mẹ. Ṣigba, nawẹ nulẹ yì do?

Jesu basi zẹẹmẹ dọmọ: “Nulunọ lọ lẹ . . . ze  miyọ́ngbán yetọn lẹ ṣigba bo ma hẹn amì dovo, amọ́ nuyọnẹntọ lọ lẹ hẹn miyọ́ngbán yetọn lẹ, bosọ hẹn amì do ogo mẹ dogọ. Dile asisunọ yọyọ lọ to dindẹn, yemẹpo samlọngọ bo damlọn.” (Matiu 25:3-5) Asisunọ yọyọ lọ ma yawu wá dile yé to nukundo e do. E taidi dọ e dẹn taun bọ awhli lọ lẹ damlọn. Apọsteli lọ lẹ sọgan ko flin nuhe Jesu dọ gando dawe he wá sọn whẹndo he diyin de mẹ go, mẹhe tọ́nwhẹ̀n bọ ‘to godo mẹ, to whenue e ko mọ aṣẹpipa ahọlu-yinyin tọn lọ yí, e lẹkọ.’—Luku 19:11-15.

To apajlẹ awhli ao lẹ tọn lọ mẹ, Jesu basi zẹẹmẹ nuhe jọ to whenue asisunọ yọyọ lọ wá to godo mẹ tọn dọmọ: “To whenuena e jẹ zánhomẹ pete, awhá de di dọ: ‘Asisunọ yọyọ lọ die! Mì tọ́n wá pé e.’” (Matiu 25:6) Be awhli lọ lẹ ko wleawudai bo tin to aṣeji ya?

Jesu zindonukọn dọmọ: “To whenẹnu, awhli lọ lẹpo fọ́n bo wleawuna miyọ́ngbán yetọn lẹ. Nulunọ lọ lẹ dọna nuyọnẹntọ lọ lẹ dọ, ‘Mì na mí amì mìtọn pẹẹde, na miyọ́ngbán mítọn lẹ to ṣíṣí.’ Nuyọnẹntọ lọ lẹ gblọnna yé dọ: ‘Vlavo e sọgan nọma pé na míwlẹ po mì po. Enẹwutu, mì gbọ bo yì mẹhe nọ sà lẹ dè bo jẹ mìtọn.’”—Matiu 25:7-9.

Enẹwutu, awhli nulunọ atọ́n lọ lẹ ma tin to aṣeji bo ma wleawudaina wiwá asisunọ yọyọ lọ tọn. Yé ma tindo amì susu to miyọ́ngbán yetọn lẹ mẹ podọ yé dona yì jẹ. Jesu dọmọ: “Dile yé tọ́n jei jijẹ gbé, asisunọ yọyọ lọ wá. Awhli he ko wleawufo lọ lẹ biọ họmẹ hẹ ẹ yì hùnwhẹ alọwle tọn lọ, ohọ̀n lọ sọ yin súsú. Enẹgodo, awhli he pò lẹ lọsu wá, bo to didọmọ, ‘Mẹdaho, Mẹdaho, hùnhọ̀n na mí!’ E gblọnna yé dọ, ‘Nugbo wẹ yẹn dọna mì, yẹn ma yọ́n mì.’” (Matiu 25:10-12) Lehe e blawu do sọ dọ yé ma wleawudai bo ma tin to aṣeji!

Apọsteli lọ lẹ sọgan doayi e go dọ Jesu lọsu wẹ yin asisunọ yọyọ he go e donù lọ. Ewọ tlẹ ko yí ede jlẹdo asisunọ yọyọ de go wayi. (Luku 5:34, 35) Bọ awhli nuyọnẹntọ lọ lẹ lo? To whenue Jesu to hodọ gando “lẹngbọpa pẹvi” he Ahọluduta lọ na yin nina go, e dọmọ: “Mì sọnú bo wleawudai bo gbọ miyọ́ngbán mìtọn ni to jiji.” (Luku 12:32, 35) Enẹwutu, apọsteli lẹ sọgan ko mọdọ devi nugbonọ taidi yewlẹ nkọ lẹ wẹ Jesu to alọdlẹndo to apajlẹ ehe mẹ. Eyin mọ wẹ, etẹwẹ Jesu jlo na plọnmẹ gbọn apajlẹ ehe dali?

Jesu hẹn nuplọnmẹ lọ họnwun. E dotana apajlẹ etọn dọmọ: “Enẹwutu, mì nọ họ́ mìde, na mì ma yọ́n azán kavi gànmẹ lọ gba.”—Matiu 25:13.

E họnwun dọ Jesu to tudohomẹna hodotọ nugbonọ etọn lẹ dọ yé dona ‘nọ họ́ yede’ na nuhe dù tintin tofi etọn. Ewọ ja bọ yé dona wleawudai bo tin to aṣeji—taidi awhli nuyọnẹntọ atọ́n lọ lẹ—ma nado wọnji todido họakuẹ yetọn go bọ ale he yé sọgan mọyi lọ na gbọ yé go.