Jesus baru udah nyaut tanya bala rasul iya pasal tanda iya pulai baru, enggau tanda pengujung sistem dunya tu. Udah nya, Jesus meri sida jaku lalau nengah siti da agi jaku sempama. Utai ke disebut Jesus dalam sempama tu deka dikeamatka maya iya pulai baru.

Ku iya madah: “Perintah serega tau dibandingka enggau 10 iku indu dara, ke mai lampu kelita mansang ngambat pengantin lelaki. Lima iku ari sida nya beli, lalu lima iku da agi pintar.”—Matthew 25:1, 2.

Jesus ukai madahka, sekeda ari bala murid iya ke deka nerima Perintah serega nya beli, lalu sekeda agi pintar. Taja pia, utai ke disebut Jesus nunjukka tiap iku murid iya ulih milih, sekalika sida deka mengkang bejaga tauka deka dilimpangka. Tang Jesus yakin tiap iku nembiak iya deka tetap setia sereta nerima berekat ari Apai iya.

Dalam sempama nya, 10 iku indu dara nya patut ngambat pengantin lelaki nya lalu ngagai pengerami tikah. Lebuh pengantin lelaki nya datai, semua indu dara nya deka ngena lampu sida ngambika ulih meri penampak lebuh sida nengah jalai ti petang. Sida deka ngiring iya lebuh iya mai pengantin indu pulai ngagai rumah ke udah disediaka iya. Tu meh chara sida ngayanka basa ngagai pengantin lelaki nya. Taja pia, nama utai ke nyadi lebuh pengantin lelaki nya datai?

 Ku Jesus: “Sida ke beli mai lampu kelita sida, tang sida nadai mai minyak lebih. Tang sida ke pintar mai lampu kelita sida, sereta mega mai minyak dalam butul. Lebuh pengantin lelaki nya laun datai, semua sida ngantuk lalu tinduk.” (Matthew 25:3-5) Pengantin lelaki nya enda datai ba maya ti dijangka sida. Ketegal 10 iku indu dara nya udah lama nganti, nya alai sida tetinduk. Ba senentang tu, bala rasul engka agi ingat sempama Jesus pasal siku orang ari ruang bilik raja ke mupuk, lalu “pengudah nyadi raja, iya pan pulai.”—Luke 19:11-15.

Pengudah nya, Jesus madahka utai ke nyadi lebuh pengantin lelaki nya datai: “Ba tengah malam, bisi orang ngangau: ‘Pengantin lelaki udah datai! Pansut kita lalu ambat iya.’” (Matthew 25:6) Kati 10 iku indu dara nya mengkang bejaga sereta udah besedia ngambat pengantin lelaki nya?

Jesus madah: “Semua indu dara nya angkat lalu nyediaka lampu kelita sida. Sida ke beli lalu bejaku ngagai sida ke pintar: ‘Beri kami minyak, laban lampu kelita kami nyauka padam.’ Tang ku sida ke pintar nyaut: ‘Engka enda chukup minyak tu dibagi kitai. Manah kita mansang ngagai orang ke bejual minyak, lalu meli minyak ke diri empu.’”—Matthew 25:7-9.

Nya alai, lima iku indu dara ke beli nya enda bejaga sereta enda besedia ke penatai pengantin lelaki nya. Nya kebuah, sida enda mai chukup minyak ke lampu kelita sida. Ketegal nya, sida pansut meli minyak. Jesus madah: “Lebuh sida mansang meli minyak, pengantin lelaki nya pan datai. Bala indu dara ke udah besedia nya, tama enggau pengantin lelaki nya ngagai pengerami tikah. Pintu pan lalu ditutup. Udah nya, bala indu dara ke bukai pan datai. Ku sida: ‘Tuan, tuan! Buka pintu ke kami!’ Tang ku pengantin lelaki nya nyaut: ‘Enggau bendar aku madah ngagai kita: Aku enda ngelala kita.’” (Matthew 25:10-12) Sayau amat, sida rugi laban enda bejaga sereta enda besedia.

Bala rasul nya nemu, pengantin lelaki nya Jesus laban sebedau tu, iya kala madahka diri baka siku pengantin lelaki. (Luke 5:34, 35) Lalu sapa lima iku indu dara ke pintar nya? Lebuh Jesus nyebut pasal “raban mit,” ke deka nerima Perintah Petara, iya madah: “Tentuka kita udah begari sereta besedia. Lalu tentuka mega lampu kelita kita udah ditungkun.” (Luke 12:32, 35) Nya alai bala rasul nemu, sempama Jesus tu merujuk ngagai orang ke baka sida. Nyadi, nama deka diajar Jesus nengah jaku sempama tu?

Ba pengujung sempama nya, Jesus madah: “Nya alai, kita patut seruran bejaga, laban kita enda nemu hari tauka jam iya.”—Matthew 25:13.

Nya alai, Jesus meransang bala murid iya ke tetap ati ngambika sida “seruran bejaga.” Tu amat penting ngambika sida ke baka lima iku indu dara ke pintar nya, enda lenyau harapan sereta berekat ke udah disemaya ngagai sida.