Yesũ nĩwasũngĩie makũlyo ma atũmwa make ĩũlũ wa kwĩthĩwa vo kwake na ĩũlũ wa mũminũkĩlyo wa ĩvinda yĩĩ. Nĩwasyokie amanenge ũtao wa ũĩ aitũmĩa ngelekany’o ĩngĩ. Ala mekalĩte ĩvindanĩ ya kwĩthĩwa vo kwake nĩmo maĩ mone ũndũ ũsu ũyĩanĩa.

Ambĩĩie ngelekany’o ĩsu kwa kwasya ũũ: “Ũsumbĩ wa ĩtu no ũelekanw’e na eĩtu ĩkũmi ala moosie taa syoo na mathi kũthaũa mũtwaani. Atano maĩ atumanu, na atano maĩ oĩ.”—Mathayo 25:1, 2.

Yesũ ndoonanasya kana nusu ya amanyĩw’a make ala makatiĩwa Ũsumbĩ wa ĩtu makeethĩwa me atumanu na nusu ĩla ĩngĩ me oĩ. Vandũ va ũu, endaa kũmamanyĩsya kana kĩla ũmwe woo aĩ na ũtonyi wa kwĩnyuvĩa kwĩthĩwa e metho maũndũnĩ makonetye Ũsumbĩ kana kwĩtĩkĩla avĩngĩĩswe nĩ maũndũ angĩ. O na vailye ũu, Yesũ ndaĩ na nzika kana kĩla ũmwe wa athũkũmi make akekala e mũĩkĩĩku na aikwata moathimo ma Ĩthe wake.

Nthĩnĩ wa ngelekany’o ĩsu, eĩtu asu ĩkũmi maĩ mathi kũmũthaũa mũtwaani na mayĩendany’a nake. Mũtwaani avika, eĩtu asu maĩ matũmĩe taa syoo kũmũmulĩkĩla nzĩa, na kwa kwĩka ũu mayonany’a kana nĩmeũmũnenga ndaĩa aetete mũtwawa wake nyũmbanĩ ĩla yaseũvĩtw’e kwondũ wake. Ĩndĩ kweethĩiwe ata?

Yesũ aisye ũũ: “Ala maĩ atumanu nĩmakuie taa syoo ĩndĩ mayaakua mauta, namo ala maĩ oĩ nĩmakuie taa vamwe na mauta me isũvanĩ. Yĩla mũtwaani wekalangile ate kũka, onthe nĩmambĩĩie kwombosya na makoma.”  (Mathayo 25:3-5) Mũtwaani ndaavika saa ila masũanĩaa ta ũtonya kũvika. Kwoou eĩtu asu moona ta wekala mũno namo makoma. No kwĩthĩwa atũmwa malilikanile ũndũ Yesũ wamaeleetye ĩũlũ wa mwana wa mũsumbĩ ũla waendie na ũla “wesie kũsyoka ĩtina wa kũnengwa ũsumbĩ.”—Luka 19:11-15.

Nthĩnĩ wa ngelekany’o ĩsu ya eĩtu ĩkũmi, Yesũ nĩwaeleisye ũndũ kweethĩiwe yĩla mũtwaani wesie kũvika. Aisye: “Ũtukũ katĩ nĩveew’ĩkie wasya mũnene ũkyasya: ‘Mũtwaani nĩwũkĩte! Umaalai mũmũthaũe.’” (Mathayo 25:6) Mo eĩtu asu nĩmeeyũmbanĩtye na maĩ metho?

Yesũ aendeeie kwasya ũũ: “Na ĩndĩ ala eĩtu onthe maamũka na maseũvya taa syoo. Ala atumanu meea ala oĩ, ‘Tũolelei mauta, nũndũ taa sitũ ikilyĩ kũvoa.’ Ala oĩ mamasũngĩa, mamea: ‘Nĩvatonyeka ũkethĩa ala twĩ namo mayĩanĩte kwondũ witũ na kwondũ wenyu. Kwoou no mũthi kwa ala matesaa nĩ kana mũkathooe menyu.’”—Mathayo 25:7-9.

Kwoou ala eĩtu atano atumanu mayaĩ metho na mayeeyũmbanĩtye kwondũ wa kũvika kwa mũtwaani. Mayaĩ na mauta meanĩtye kwondũ wa taa syoo na yaĩ no nginya mathi kũmantha angĩ. Yesũ aisye ũũ: “Na maendete kũthooa, mũtwaani avika. Na eĩtu ala meeyũmbanĩtye malika nake mbokanĩ ya mũtwaano na mũomo wavingwa. Ĩtina wa vau, eĩtu ala angĩ nĩmookie na mambĩĩa kwĩtana, ‘Mũtwaani, Mũtwaani, tũvingũĩe!’ Nake amasũngĩa, amea, ‘Nĩmũtavya w’o, nyie ndimwĩsĩ.’” (Mathayo 25:10-12) Ũsu waĩ ũndũ wa kyeva mũno kwoo nũndũ wa kũema kwĩyũmbany’a na kũlea kwĩthĩwa me metho!

Atũmwa nĩmamanyie kana Yesũ nĩwe mũtwaani ũla wawetaa. Nĩkĩ? Nũndũ vau mbeenĩ nĩweeyĩelekanilye na mũtwaani. (Luka 5:34, 35) Nao nata ala eĩtu oĩ? Yesũ aineena ĩũlũ wa “ĩĩthya ĩnini” yĩla yaĩ yĩnengwe Ũsumbĩ atũmĩie ndeto ii: “Ĩkĩai ngũa na mũyĩthĩwa mwĩyũmbanĩtye na taa syenyu syakene.” (Luka 12:32, 35) Kwoou nthĩnĩ wa ngelekany’o ĩsu ya ala eĩtu, atũmwa ma Yesũ nĩmamanyie kana awetaa ĩũlũ wa amanyĩw’a ala maĩ aĩkĩĩku tamo. Kwondũ wa ũu, Yesũ endaa kũmanyĩsya kyaũ aitũmĩa ngelekany’o ĩsu?

Nĩwamaeleisye mamanya nesa vyũ kĩla wendaa kũmamanyĩsya. Aminĩĩie ngelekany’o yake na kũweta atĩĩ: “Kwoou, endeeai kũsyaĩĩsya, nũndũ mũyĩsĩ mũthenya ũsu kana saa ũsu.”—Mathayo 25:13.

Vate nzika, Yesũ awetie ndeto isu ayenda kũmatavya aatĩĩi make aĩkĩĩku kana maaĩle ‘kũendeea kũsyaĩĩsya’ ĩvindanĩ ya kwĩthĩwa vo kwake. Aĩ ese kũka, na kwoou maaĩle kwĩthĩwa meyũmbanĩtye na me metho o ta ala eĩtu atano oĩ. Ũu waĩ ũtume maendeea kwona wĩkwatyo woo wĩ wa vata na mayĩsa kũkwata ĩtuvi yoo.