Jesus okwa kala ta nyamukula epulo lovayapostoli vaye li na sha nedidiliko lokukala po kwaye nosho yo lexulilo lounyuni. Okwa li e va pa omayele opandunge a longifa vali efaneko limwe. Ewanifo olo ola li tali ka didilikwa mo kwaavo tava ka kala po pefimbo lokukala po kwaye.

Okwa hovela nefaneko laye, a ti: “Ouhamba womeulu otau dulu okufaafanifwa noukadona omulongo ovo va kufa eelamba davo, ndele tava i va ka shakeneke omuhomboli. Vatano vomuvo ova li omalai, ofimbo vatano ovanaendunge.” — Mateus 25:1, 2.

Jesus ka li a hala kutya vamwe vomovahongwa vaye ovo tava ka fyuulula Ouhamba womeulu omalai ofimbo vamwe ovanaendunge. Ponhele yaasho, okwa li a hala okuyelifa shi na sha nOuhamba, nonokutya keshe omuhongwa waye ota dulu okuhoolola okukala oupafi ile hasho. Jesus ka li e na oushili kutya omupiya waye keshe ota dulu okukala omudiinini nokumona omanangeko noupuna aXe.

Mefaneko olo, oukadona aveshe omulongo ova li va ka shakeneka omuhomboli nokuwaimina osheendo shehombolo. Eshi a fika, oukadona ova li ve na okutema elamba davo, opo ve mu fimaneke eshi ta twala omufuko keumbo olo a longekida. Mbela oinima oya li ya enda ngahelipi?

Jesus okwa yelifa a ti: “Omalai ova kufa eelamba davo, ndele inava kufa omahooli, ofimbo ovanaendunge va kufa eelamba davo nomahooli meeshanga. Eshi omuhomboli a kala ko, oukadona aveshe ova kwatwa keemhofi, ndele tava kofa.” (Mateus 25:3-5) Omuhomboli ka li a fika pefimbo olo va li ve mu teelela. Molwaashi omuhomboli okwa li a kala ko, oukadona aveshe ova  li va kwatwa keemhofi ndele tava kofa. Ovayapostoli otashi dulika va li tava dimbuluka efaneko laJesus li na sha nomulumenhu oo a dalwa kohamba nokwa li a ya koshilongo shokokule “opo a ka ninge ohamba ndele ta aluka ko.” — Lukas 19:11-15.

Mefaneko loukadona omulongo, Jesus okwa popya osho sha ningwa po eshi omuhomboli a fika, a ti: “Ndele mokati koufiku, opa li pa ningwa eingido tali ti: ‘Omuhomboli okwe uya! Indeni mu ke mu shakeneke.’” (Mateus 25:6) Mbela oukadona ovo ova li ngoo ve lilongekida nokukala oupafi?

Jesus okwa weda ko a ti: “Opo nee oukadona aveshe ova penduka ndele tava longekida eelamba davo. Ovo omalai ova tya kwaavo ovanaendunge, ‘Tu peni mo momahooli eni, osheshi eelamba detu odi li pokudima.’ Oukadona ovanaendunge ova nyamukula tava ti: ‘Pamwe itae ke tu wanena atusheni. Indeni mu ke lilandele kwaavo have a landifa.’” — Mateus 25:7-9.

Onghee oukadona vatano omalai kava li oupafi nokava li ve lilongekidila okuuya komuhomboli. Kava li ve na omahooli a wana meelamba davo, nova li ve na oku ka konga. Jesus okwa ti: “Ofimbo tava i va ka lande, omuhomboli okwe uya. Ndele oukadona ovo va li ve lilongekida ova ya pamwe naye koshivilohombolo, ndele poshivelo tapa idilwa. Konima yefimbo, oukadona vakwao navo ove uya, tava ti, ‘Omuhomboli, Omuhomboli, tu yeulula!’ Okwe va nyamukula a ti, ‘Oshili ohandi mu lombwele, kandi mu shii.’” (Mateus 25:10-12) Oyo oya li oilanduliko inyikifa oluhodi eshi inava kala ve lilongekida nokukala oupafi.

Ovayapostoli ova li va mona kutya omuhomboli oo Jesus a popya ota faneke kuye mwene. Pehovelo okwa li e lifaafanifa nomuhomboli. (Lukas 5:34, 35) Oukadona ovanaendunge otava faneke oolyelye? Eshi Jesus a li ta popi shi na sha ‘nokangudu kanini,’ oko taka ka pewa Ouhamba, okwa ti: “Kaleni mwa djala nomwe lilongekida, neelamba deni nadi kale da tema.” (Lukas 12:32, 35) Mefaneko li na sha noukadona, ovayapostoli ova li va uda ko kutya Jesus ovo ta popi. Mbela Jesus okwa li a hala okutya shike mefaneko olo?

Jesus okwa li e va yelifila shi na sha naasho. Okwa li a xulifa efaneko laye a ti: “Onghee hano, kaleni oupafi, osheshi kamu shii efiku novili.” — Mateus 25:13.

Jesus okwa li ta ladipike ovashikuli vaye ovadiinini shi na sha nokukala po kwaye kutya ova pumbwa okukala “oupafi.” Ova pumbwa okukala ve lilongekida eshi te ke uya nokukala oupafi, ngaashi oukadona vatano ovanaendunge, opo vaha kanife eteelelo lavo litunhula nosho yo ondjabi oyo tava ka pewa.