112-تاراۋ
اقىلدى قىزدار قىراعىلىق تانىتتى
-
يسا ون قىز تۋرالى استارلى اڭگىمە ايتتى
يسا ٵلى دە ٶزىنىڭ وسىندا بولۋى مەن زاماننىڭ اقىرى جاقىنداپ قالعانىنىڭ بەلگىسى جايلى سۇراققا جاۋاپ بەرۋدە. سودان ول ەلشىلەرىنە قاجەتتى كەڭەس بەرۋ ٷشىن، استارلى اڭگىمە ايتىپ بەردى. ونىڭ استارىنداعى جايتتار يسانىڭ «وسىندا بولۋ» كەزىنە قاتىستى.
يسا اڭگىمەسىن باستاپ: «كوك پاتشالىعى قولدارىنا شام الىپ، كۇيەۋ جىگىتتى قارسى الۋعا شىققان ون قىزعا ۇقسايدى. ولاردىڭ بەسەۋى اقىلسىز، بەسەۋى اقىلدى بولىپتى»،— دەدى (ماتاي 25:1، 2).
يسا مۇنىمەن كوكتەگى پاتشالىقتى مۇرا ەتەتىن شاكىرتتەردىڭ جارتىسى اقىلدى، ال جارتىسى اقىلسىز بولادى دەگىسى كەلگەن جوق. ول پاتشالىققا قاتىسى بار وي ايتقىسى كەلدى. اتاپ ايتقاندا، ماڭىزدى جايتتاردى نازاردا ۇستاپ، قىراعىلىق تانىتۋ نەمەسە ماڭىزسىز نارسەلەرگە الاڭداپ، بەيقامدىق تانىتۋ ٵربىر شاكىرتتىڭ وزىنە بايلانىستى. ٴبىراق يسا قىزمەتشىلەرىنىڭ ادالدىق ساقتاي الاتىنىنا جانە اكەسىنىڭ باتاسىن الاتىنىنا كۇماندانعان جوق.
اڭگىمەدە ون قىز كۇيەۋ جىگىتتى قارسى الىپ، ۇيلەنۋ تويىنىڭ شەرۋىنە قوسىلۋ ٷشىن شىعادى. كۇيەۋ جىگىت كەلگەندە، ولار شامدارىن جاعىپ، جولعا جارىق تۇسىرۋلەرى كەرەك. وسىلاي ارنايى دايىندالعان ۇيگە قالىڭدىعىن اكەلە جاتقان كۇيەۋ جىگىتكە قۇرمەت كورسەتەر ەدى. ٴبارى ويداعىداي بولدى ما؟
يسا بىلاي دەدى: «اقىلسىز قىزدار شامدارىن العانىمەن، قۇياتىن ارتىق ماي المايدى، ال اقىلدىلارى شامدارىمەن قوسا، ماي قۇيىلعان قۇتىلارىن دا الا شىعادى. كۇيەۋ جىگىت كەشىگىپ جاتقاندىقتان، بارلىعى قالعىپ، ۇيقىعا كەتەدى» (ماتاي 25:3—5). كۇيەۋ جىگىت كۇتكەن مەرزىمدە كەلە قويمايدى. ٴبىراز ۋاقىت وتسە كەرەك، سول ارالىقتا قىزدار قالعىپ، ۇيىقتاپ كەتەدى. ەلشىلەر بۇل جايتتى ەستىگەندە، الىس ەلگە كەتىپ، «اقىرىندا، پاتشا بولىپ قايتا ورالعان» اقسۇيەك تۋرالى يسانىڭ اڭگىمەسىن ەسكە العان بولار (لۇقا 19:11—15).
يسا ون قىز تۋرالى اڭگىمەسىن جالعاپ، كۇيەۋ جىگىت كەلگەندە نە بولعانىن ٴتۇسىندىردى. «ٴتۇننىڭ ٴدال ورتاسىندا «كۇيەۋ جىگىت كەلە جاتىر! ونى قارسى الۋعا شىعىڭدار!» دەگەن قاتتى داۋىس ەستىلەدى»،— دەدى ول (ماتاي 25:6). بۇل كەزدە قىزداردىڭ دايىندىقتارى مەن كۇيلەرى قانداي ەدى؟
يسا بىلاي دەدى: «قىزداردىڭ ٴبارى ورىندارىنان تۇرىپ، شامدارىن دايىندايدى. اقىلسىز قىزدار اقىلدىلارىنا: — مايلارىڭنان ٴبىراز بەرىڭدەرشى، شامدارىمىز سونەيىن دەپ جاتىر،— دەيدى. اقىلدىلارى بولسا: — بىزگە دە، سەندەرگە دە جەتپەي قالۋى مۇمكىن. ودان دا ساتۋشىلارعا بارىپ، ساتىپ الىڭدار،— دەپ جاۋاپ بەرەدى» (ماتاي 25:7—9).
اقىلسىز بەس قىز شامدارىنداعى ماي تاۋسىلعان سوڭ، ماي تابۋدىڭ قامىنا كىرىسىپ كەتتى. وسىلاي ولاردىڭ نازارى باسقا نارسەگە اۋىپ، كۇيەۋ جىگىتتى قارسى الۋعا دايىن بولماي قالدى. «ولار ماي ساتىپ الۋعا كەتكەندە، كۇيەۋ جىگىت كەلىپ قالادى. دايىن تۇرعان قىزدار ونىمەن بىرگە توي بولاتىن ۇيگە كىرەدى دە، ارتتارىنان ەسىك جابىلادى. كەيىننەن قالعان بەسەۋى كەلىپ: — مىرزا، مىرزا! ەسىكتى اشا كورىڭىز!— دەپ وتىنەدى. ال كۇيەۋ جىگىت: — شىن ايتامىن، مەن سەندەردى تانىمايمىن!— دەپ جاۋاپ بەرەدى» (ماتاي 25:10—12). ماڭىزدى وقيعاعا بار نازارىن سالماعان ٵرى دايىن تۇرماعان قىزدار قاتتى وپىق جەدى!
ەلشىلەر اڭگىمەدەگى كۇيەۋ جىگىتتىڭ يساعا نۇسقاپ تۇرعانىن ٴتۇسىندى. ويتكەنى ول بۇرىنىراقتا ٶزىن كۇيەۋ جىگىتكە تەڭەگەن بولاتىن (لۇقا 5:34، 35). ال اقىلدى قىزدار كىمدەر؟ بىردە يسا پاتشالىققا كىرەتىن «كىشكەنە وتار» جايلى سوزىندە: «بەلدەرىڭ بۋۋلى، شامدارىڭ جاعۋلى بولسىن»،— دەگەن (لۇقا 12:32، 35). سونىمەن ەلشىلەر استارلى اڭگىمەدەگى قىزداردىڭ وزدەرى سياقتى يسانىڭ قىزمەتشىلەرى ەكەنىن ٴتۇسىندى. الايدا يسا بۇل اڭگىمەنى قانداي ماقساتپەن ايتتى؟
استارلى اڭگىمەنى نە ٷشىن ايتقانىن يسانىڭ ٶزى انىق ەتىپ ٴتۇسىندىرىپ، اڭگىمەسىنىڭ سوڭىندا: «سوندىقتان سەرگەك بولىڭدار! ويتكەنى سەندەر سول كۇندى دە، ساعاتتى دا بىلمەيسىڭدەر»،— دەدى (ماتاي 25:13).
يسا ادال ٸزباسارلارىنا «وسىندا بولاتىن» كەزگە قاتىستى ەسكەرتۋ ايتىپ تۇرعانى انىق: ولار رۋحاني سەرگەك بولۋلارى كەرەك. ول قايتىپ كەلەتىن كەزىندە، ٸزباسارلارى اقىلدى بەس قىزعا ۇقساپ، دايىن ٵرى قىراعى بولۋلارى قاجەت. سوندا اسىل ۇمىتتەرىن كوزدەن تاسا قىلمايدى، ٵرى كوپتەن كۇتكەن قۇندى سىيلارىن الادى.
