Yesu apwile nakukumbulula chihula vamuhulishile vaposetolo jenyi kutalisa kuchinjikizo chakupwako chenyi nachikukulwishi chakatwamino kamyaka yino. Ngocho Yesu avakafwile mujila yamangana hakuvalweza chifwanyisa chikwavo. Vatu vaze navakayoyela halwola lwakupwako chenyi vakiko navakamona kutesamo chavyumevi.

Avalwezele chifwanyisa ngwenyi: “Jino Wangana wamelu unafwane nge vajike vamapwevo 10 vaze vambachile manongo avo nakuya nakusesa mwenyamwenga. Vatanu vapwile vakuhulama, kaha vatanu vapwile vakuzangama.”—Mateu 25:1, 2.

Yesu kapwile nakulumbununa nge tumbaji twenyi vamwe vaze navakaswana Wangana navakapwa vakuhulama, kaha vakwavo vakuzangama, nduma. Oloze apwile nakushindakanya chishina chakutalisa kuWangana ngwenyi kambaji hikambaji atelele kulisakwila ivene kupwa wakuvanguluka chipwe chiku. Yesu atachikijile ngwenyi vangamba jenyi vosena navakapwa vakushishika nakuvakisula kuli Ise.

Muchifwanyisa kanechi, vajike vosena likumi vayile nakutambwokesa mwenyamwenga nakupwa kuchilika chakulimbata. Uze mwenyamwenga hakuheta kuzuvo, vaze vajike vatelele kumunyika manongo avo mangana vasolole kavumbi kuli mwenyamwenga omu mwengisa mwenga muzuvo vanamuwahishila. Uno vyuma vyapwile ngachilihi?

Yesu alumbunwine ngwenyi: “Vaze vakuhulama vambachile manongo avo, oloze kavambachile maji ekako, oloze vaze vakuzangama vambachile maji mujisaji javo namanongo avo. Kahomu ashimbwile mwenyamwenga, vosena vaputukile kunongoka,  kaha vayile mutulo.” (Mateu 25:3-5) Mwenyamwenga kejile halwola luze vashinganyekele vakikoko. Chasoloka nge azezamine chikuma, kaha vaze vajike vayile mutulo. Atela vaposetolo jaYesu vanukile chakutalilaho avalwezele chamutu wamulemu uze ayile ungeji wenyi, kaha “akindulukile, oku hanatambula lyehi ngolo jawangana.”—Luka 19:11-15.

Muchifwanyisa kanechi chavajike likumi, Yesu alumbunwine vyuma vyasolokele omu ahetele mwenyamwenga, ambile ngwenyi: “Kuheta mukachi kaufuku, kwapwile mutambi wakwamba ngwavo: ‘Mwenyamwenga uno! Lovokenu mumusese.’” (Mateu 25:6) Vyuma muka vyasolokele kuli vaze vajike kutalisa kukuliwahisa nakupwa vakuvanguluka?

Yesu atwalileho ngwenyi: “Jino vaze vajike vamapwevo vosena likumi vahindukile nakuwahisa kanawa manongo avo. Vaze vakuhulama vambile kuli vaze vakuzangama ngwavo, ‘Tuhanenuko maji, mwomwo manongo etu kalinwomu ajime.’ Oloze vaze vakuzangama vakumbulwile ngwavo: ‘Pamo katweshi kuwazuka tuvosenako. Yenu kuli vaze veji kuwalanjisanga mukalande enu.’”—Mateu 25:7-9.

Shikaho, vaze vajike vatanu vakuhulama kavapwile vakuvangulukako, kaha nawa kavaliwahishile vyakwiza chamwenyamwengako. Kavapwile namaji amavulu mumanongo avoko, ngocho vasakile kuwana maji. Yesu ambile ngwenyi: “Shimbu vapwile nakuya nakulanda, mwenyamwenga ahetele. Kaha vajike vamapwevo vaze vapwile vakulizanga lyehi, vengilile nenyi hamwe muze mwapwile chifupawenga, kaha chikolo vachisokele. Kutwala muze, vaze vajike vamapwevo vakwavo vejile, vambile ngwavo, ‘Ove Mwata, ove Mwata, tusokolweleko.’ Ikiye akumbulwile ngwenyi, ‘Chamuchano vene nangumilweza ngwami, ami kangwamitachikizako.’” (Mateu 25:10-12) Olwo luvinda kana enu vayaya! Luvinda kana lwejile mwomwo yakuhona kuliwahisa nakupwa vakuvanguluka.

Vaposetolo vatachikijile jino ngwavo mwenyamwenga avulukile Yesu emanyinyineko ivene. Hakavanga, Yesu alivulukile ivene kupwa mwenyamwenga. (Luka 5:34, 35) Uno vajike vakuzangama vapwile veya? Omu Yesu avulukile “utanga wamikoko waundende” uze navakahana Wangana, ambile ngwenyi: “Vwalenu uvwalo nakupwa vakulizanga, kaha manongo enu apwenga akuwika kakahya.” (Luka 12:32, 35) Muchifwanyisa kanechi chavajike, vaposetolo jenyi vatachikijile ngwavo Yesu apwile nakutalisa kuli vakiko. Jino vyuma muka apwile nakuhanjika Yesu muchifwanyisa kanechi?

Yesu alumbunwine hatoma vyuma vyosena. Akukulwile chifwanyisa chenyi hakwamba ngwenyi: “Shikaho tonenunga, mwomwo kamwatachikijile likumbi chipwe olako.”—Mateu 25:13.

Chikupu vene, Yesu apwile nakulweza vaka-kumukavangiza vakushishika vaze navakayoya halwola mwakapwako ngwenyi vatela kukapwa ‘vakutona.’ Yesu mwakeza, ngocho vatela kuliwahisa kanawa nakupwa vakuvanguluka, nge vaze vajike vatanu vakuzangama, mangana vakahone kujimbalisa lutalililo lwavo lwalulemu nakuhona kutambula fweto yavo.