Jesu wabva kudavira mubvunjo wo vapostori vake ngo pamusoro po citatijo co kuvepo kwake no cokupera ko nyika. Acirangarira izvi, Jesu anovapa mbhangiro yo ungwaru ecishandisa mufananijo umweni. Kukwanirisika kwao kunozovoniwa ngo vanozopona pa kumuvo wo kuvepo kwake.

Jesu anotanga mufananijo, eciti: “Umambo hwo mugore hunozotojana no gumi ro mbhandwe jakatora bzibani bzajo, joenda kotandamija mukwambo. Xanu jainga mapenji, xanu jakangwara.”—Mateu 25:1, 2.

Jesu aaripi kunanga kuti vamweni vo vajiji vake vanozogara utaka mu Umambo hwo mugore, i mapenji kana marethe zve vamweni vakangwara. Mukusiyana, ari kunanga kuti umwe na umwe wo vajiji anokwanisa kuva wakarinda kana wakangwara, ngo pamusoro po Umambo. Asi, Jesu aakanakani kuti vashandiri vake vanokwanisa kugara vakagondeka no kuashira makomborero a Babake.

Pa mufananijo uu, gumi ro mbhandwe, jese jinoenda koashira mukwambo no koshanda pa mucadho. Mukwambo paanozoguma, mbhandwe iji jinozobvenekera gwanja ngo zvibani zvajo, jecikuja mukwambo paanotora murovohwa kuenda nae ku nyumba. Waro zvinozofamba ushoni here?

Jesu anodurujira kudari: “Mapenji akatora bzibani acikazivi kutora mafuta. Kaveta jakangwara jakatora mafuta mu bzimujio pamwepo no bzibani.  Ngokuti mukwambo wainonoka kuza, jese jakaamba kuozira, jovata.” (Mateu 25:3-5) Mukwambo aakasiki kuguma inga zvaivetehwa. Zvecivoneka kuti ari kunonoka, mbhandwe jiya jinovata. Vapostori vanoceuja kuti Jesu wakabhuya ngo pamusoro po mukhupuki wakaenda ndhambo, zve “naapera kuaxira umambo, wakahwirira.”—Luka 19:11-15.

Pa mufananijo wo gumi ro mbhandwe, Jesu anosanangura zvinozoitika paanozoguma mukwambo, eciti: “Mahungu makuru kwakazika kumima kwokuti: Ari kuza mukwambo. Endanyi momutandamija.” (Mateu 25:6) Kuda kunanga kuti mbhandwe iji jakanasiririka no kurinda here?

Jesu anoenderera mberi eciti: “Pondhopo mbhandwe jese jiya jakamuka, jonasirira bzibani bzajo. Mapenji akabvunja jakangwara kuti: ‘Tipenyivo mafuta enyu, ngokuti bzibani bzedu bziri kujima.’ Kaveta jakangwara jakadavira kuti: ‘Aakwani kotiri no komuri. Bziri nane kuenda kotenga henyu ku vatengesi.’”—Mateu 25:7-9.

Ngokudaro, mbhandwe shanu ajizivi kurinda zve ajizivi kunasiririka kuitira kuashira mukwambo akaguma. Ijona jinoda kuwana mafuta, ngokuti ajina mafuta anokwana kuitira zvibani zvajo. Jesu anoti: “Ngo ngari yo jaienda kotenga, wakaguma mukwambo. Jiya jainga jakanasirira jakanghwina nayena mu mabuso o mucado. Musuvo wakafungwa. Sure kwabzo jakaguma mbhandwe jimweni jiya, joti: ‘Tenji, tenji, tizaurirenyi.’ Kaveta yena wakapingura kuti: ‘Bzokadi ndinomubvunja kuti andimuzivi.’” (Mateu 25:10-12) Kunasa kunanga, kutama kunasirira no kungwara kwajiwanisa muviyo unosuruvarisa.

Vapostori vanokwanisa kuvona kuti Jesu ari kunangira iyena kamare kuva mukwambo. Pa mukuvo wakapera, Jesu wakajiezanisa no mukwambo. (Luka 5:34, 35) Waro gumi ro mbhandwe jinoimirira iyani? Paakabhuya ngo “muxambi mudoko,” vaya vanozopuwa Umambo, Jesu wakashandisa magama okuti: “Garanyi makanasirika, makasunga bzihunu ngo mabande, no bzibani bzakabwaka.” (Luka 12:32, 35) Ngokudaro, pa mufananijo ngo pamusoro po gumi ro mbhandwe, vapostori vanokwanisa kuzwisisa kuti Jesu ari kunangira ivona kamare. Waro Jesu anopa cijijo capi ngo mufananijo uu?

Jesu aasiyi kukana-kana ngo pamusoro pazvo. Iyena anopejisa mufananijo wake ngo kunanga kudari: “Rindanyi; ngokuti amuzivi njiku no mukuvo.”—Mateu 25:13.

Zvakajeka kuti Jesu ari kupangira vateveri vake vakagondeka kuti vanodikana kugara ‘vakarinda’ kuitira kuvepo kwake. Iyena anozoviya, ngokudaro vanodikana kuva vakanasiririka zve vakangwara—kufanana no gumi ro mbhandwe jakangwara—kuitira kuti vatame kuruza vetero yavo inosisira no mupfupo wovangazova nawo.