Jesu o be a araba potšišo ya baapostola ba gagwe ya mabapi le pontšho ya go ba gona ga gagwe le ya bofelo bja tshepedišo ya dilo. A dutše a naganne ka se, bjale o ba nea keletšo e bohlale ka go ba anegela seswantšho se sengwe. Go phethagala ga seswantšho se go be go tla lemogwa ke bao ba phelago nakong ya go ba gona ga gagwe.

O rola seswantšho seo, o re: “Mmušo wa magodimo o tla swana le dikgarebe tše lesome tše di tšerego mabone a tšona tša tšwa go yo gahlanetša monyadi. Tše hlano tša tšona e be e le mašilo gomme tše hlano di na le temogo.”—Mateo 25:1, 2.

Jesu ga a bolele gore seripagare sa barutiwa ba gagwe bao ba hwetšago bohwa Mmušong wa magodimo ke mašilo gomme seripagare se sengwe ke seo se nago le temogo. Go e na le moo, o bolela ntlha ya mabapi le Mmušo, yeo go yona yo mongwe le yo mongwe wa barutiwa ba gagwe a ka kgethago go phakgama goba go šitišega. Lega go le bjalo, go molaleng gore Jesu o bolela gore mohlanka yo mongwe le yo mongwe wa gagwe a ka dula a botega gomme a hwetša ditšhegofatšo tša Tatagwe.

Seswantšhong seo, dikgarebe tše lesome ka moka di a tšwa tša yo amogela monyadi le go ba molokelokeng wa monyanya wa lenyalo. Ge monyadi a goroga, dikgarebe di tla ediša tsela ka mabone a tšona, tša mo hlompha ge a tliša monyadiwa wa gagwe ntlong yeo a e lokišeditšwego. Lega go le bjalo, ditaba di sepela bjang?

Jesu o hlalosa ka gore: “Tša mašilo di tšere mabone a tšona eupša tša se tšee le makhura, mola tša temogo di tšere makhura ka dikgapaneng tša tšona le mabone a tšona. Ge monyadi a diega, ka moka tša otsela tša robala.” (Mateo 25:3-5) Monyadi ga a goroge ka nako yeo a letetšwego gore a goroge ka yona. Go bonagala monyadi a diega kudu, moo e lego gore dikgarebe di a robala. Baapostola ba ka ba ba gopola seswantšho sa Jesu sa mabapi le motho yo mongwe wa go tswalelwa bogošing yo a ilego a ya nageng ya kgole gomme ‘mafelelong a boa ka morago ga go tšea matla a bogoši.’—Luka 19:11-15.

Seswantšhong sa mabapi le dikgarebe tše lesome, Jesu o hlalosa seo se diregago ge monyadi mafelelong a goroga, o re: “Bošegogare gwa hlabja mokgoši wa gore: ‘Monyadi šoowe! Tšwang le mo gahlanetše.’” (Mateo 25:6) Dikgarebe di eme bjang tabeng ya go itokišetša le go phakgama ga tšona?

Jesu o tšwela pele ka gore: “Ke moka dikgarebe tšeo ka moka tša tsoga tša lokiša mabone a tšona. Tša mašilo tša re go tša temogo: ‘Re topeletšeng makhura gobane mabone a rena a a tima.’ Tša temogo tša araba ka gore: ‘Mohlomongwe a ka tla a se lekane rena le lena. Go e na le moo, eyang go bao ba a rekišago le ithekele.’”—Mateo 25:7-9.

Ka gona dikgarebe tše hlano tša mašilo ga se tša phakgama e bile ga se tša itokišeletša go goroga ga monyadi. Di hloka makhura a lekanego bakeng sa mabone a tšona gomme di swanetše go leka go ikhweletša a mangwe. Jesu o laodiša ka gore: “Ge di eya go reka, monyadi a goroga gomme dikgarebe tšeo di bego di itokišitše tša tsena le yena monyanyeng wa lenyalo, ke moka mojako wa tswalelwa. Ka morago ga moo, dikgarebe tšela tše dingwe le tšona tša tla, tša re: ‘Mohlomphegi, Mohlomphegi, re bulele!’ Yena ge a araba a re go tšona: ‘Ke le botša therešo, ga ke le tsebe.’” (Mateo 25:10-12) Ruri a ke mafelelo a kwešago bohloko a motho yo a sa dulego a itokišitše le go phakgama!

Baapostola ba a lemoga gore monyadi yoo Jesu a bolelago ka yena seswantšhong se ke Jesu ka boyena. Pejana o ile a ba a itshwantšha le monyadi. (Luka 5:34, 35) Go thwe’ng ka dikgarebe tše di nago le temogo? Ge a bolela ka “mohlatswana,” woo o bego o tla newa Mmušo, Jesu o dirišitše mantšu ao a rego: “Itokišeng gomme mabone a lena a tuke.” (Luka 12:32, 35) Ka gona seswantšhong se sa mabapi le dikgarebe, baapostola ba kgona go kwešiša gore Jesu o bolela ka bao ba swanago le bona. Ka baka leo, Jesu o fetišetša molaetša ofe ka seswantšhong se?

Jesu o hlalosa taba yeo gabotse. O phetha seswantšho sa gagwe ka gore: “Ka gona, dulang le phakgame, gobane ga le tsebe letšatši le ge e le iri.”—Mateo 25:13.

Go molaleng gore Jesu o eletša balatedi ba gagwe ba botegago gore ge e le mabapi le go ba gona ga gagwe, go nyakega gore ba ‘dule ba phakgame.’ O tla tla gomme ba swanetše go ba ba itokišitše e bile ba phakgame—go swana le dikgarebe tše hlano tše di nago le temogo—e le gore ba se lahlegelwe ke kholofelo ya bona e botse gomme ba loba moputso woo e ka bago wa bona.