Sesusi ankho pahe wakumbulula epulo liono apositolu mbae konthele yokuya kwae nonthyulilo youye uno. Mokonda yotyo, pahe alondola ovalongwa vae nonthengele-popia onkhuavo vali. Okufuisuapo kueulo olio ankho matyimoneka ku vana mavakala nomuenyo momuvo Sesusi eya-le.

Apopi onthengele-popia ati: “Ouhamba wo keulu ukahi ngovahikuena ovamphembela ekwi vapola ovikandiyelo viavo avaende opo vekelivase nomphunga. Vetano puvo ankho ovahima iya vetano ovanongo.” — Mateusi 25:1, 2. 

Sesusi ankho kekahi nokupopia okuti ovalongwa vae, vana mavakala Mouhamba wo keulu, matyiti ava ovahima ovakuavo ovanongo. Mahi walekesa okuti kese wike povalongwa vae opo akanyingile Mouhamba, oe muene uholovona okukala tyalunguka ine tyatalukwa. Sesusi ankho utyii umwe nawa okuti ovaumbili vae aveho vapondola okutualako noukuatyili, avatambula ondyambi ku Tate yae.

Monthengele-popia oyo, ovamphembela aveho vapita okukaliepesa omphunga opo velihonyeke nayo motyipito tyotyinepo. Etyi omphunga yehika, ovamphembela ankho mavaminikila ondyila novikandiyelo viavo, okunkhimaneka omphunga ukahi nokutuala omuhikuena wae meumbo apongiyilwa nawa. Oñgeni ankho ovipuka maviende?

Sesusi wahangununa okuti: “Ovahima avatyindi ovikandiyelo viavo mahi avahatyindi omulela, mahi ovanongo vatyinda omulela mounthenda kumwe novikandiyelo viavo. Mokonda ankho omphunga yaseta aveho avankhi olumphoki avalala.” (Mateusi 25:3-5) Omphunga keile momuvo ankho vemukevela. Tyimoneka okuti waseta iya ovamphembela avalala. Ono apositolu tyafwa ankho vahinangela etyi Sesusi apopile-ale omulume omona wohamba watundilepo iya “etyi avialekwa kouhamba akondoka.” — Luka 19:11-15.

Monthengele-popia yovamphembela ekwi, Sesusi wapopia oityi tyamonekapo etyi omphunga ehika, wati: “Mokati kovinthiki akuivala ondaka yati: ‘Omphunga yeya! Lupukei mukahonyene nayo.’” (Mateusi 25:6) Okuti ovamphembela vavasilwe tyelipongiya nokualunguka?

Sesusi watualako okupopia ati: “Ovamphembela ovo aveho avapinduka-po avafuiika ovikandiyelo viavo. Ovahima avapopila ovanongo okuti: ‘Tupolelei-vo komulela wenyi, mokonda ovikandiyelo vietu vihanda okunyima.’ Ovamphembela ovanongo avevekumbulula okuti: ‘Tyafuile kamautuuka onthue no onwe. Moluotyo, endei ko vokulandesa omulela, amulande wenyi.’” — Mateusi 25:7-9.

Ovamphembela vetano ankho kavalungukile iya kavelipongiyile, okukevela omphunga ankho maiya. Mokonda ankho vakamba omulela wo movikandiyelo viavo, ankho vena okukalanda. Sesusi wati: “Pu etyi vaya okukalanda omulela, omphunga aiya. Ovamphembela ankho vokukahi tyafuapo, avanyingila nae motyipito tyotyinepo iya epito aliyeilwa. Konyima, ovamphembela ovakuavo navo aveya, avati: ‘Tatekulu, Tatekulu tuyelule!’ Evekumbulula okuti: ‘Ame ndyimupopila okuti, ame himwii.’” (Mateusi 25:10-12) Kavatuaileko tyelipongiya nokualunguka, otyo tyinumanesa ngatyi!

Ono apositolu ankho vetyinoñgonoka nawa okuti, omphunga Sesusi apopia oe muene. Ankho konyima welieleka-le nomphunga. (Luka 5:34, 35) Iya ovamphembela ovanongo ovalie? Etyi ankho apopia konthele yo “votyunda otyitutu,” ankho mavapewa Ouhamba, Sesusi wapopile okuti: “Valei amulipongiya, amukala novikandiyelo vienyi viatema.” (Luka 12:32, 35) Ngotyo, monthengele-popia oyo yovamphembela, ono apositolu ankho vanoñgonoka okuti Sesusi ovo ekahi nokupopia. Oityi Sesusi ankho ahanda okulongesa nonthengele-popia oyo?

Sesusi keveyekele tyihetyinoñgonokele nawa. Amanuhula onthengele-popia ati: “Moluotyo, kalei tyipahi, mokonda onwe kamwii nii onthiki nii oola.” — Mateusi 25:13.

Tyayandyuluka nawa okuti, Sesusi ankho ukahi nokulondola ovalanduli vae ovakuatyili okuti, momuvo eya, ankho mavesukisa ‘okukala tyipahi.’ Ankho meya iya ngwe ankho vesukisa okulipongiya nokukala tyalunguka, ngovamphembela ovanongo vetano, opo vahapumbwe ekevelo liavo ewa nondyambi ankho mavapewa.