Eebatan ni nen Jesus ed saman so tepet na saray apostol nipaakar ed tanda na kiwawala to tan say kaunoran a parte na sistema na mundo. Atan so sankanonot to nen angiter na makabat a bilin panamegley na sakey nin ilustrasyon. Say kasumpalan na satan et nanengneng na saray totoo legay kiwawala to.

Inggapo toy ilustrasyon: “Say Panarian na tawen et niyaliling ed samploran mamarikit ya angala na saray lamparaan da tan pinmaway a mangabet ed nobyo. Limara ed sikara so makulangkulang, tan limara so makabat.”​—Mateo 25:1, 2.

Aglabay ya ibaga nen Jesus ya kapaldua ed saray disipulo to ya manawir ed tawen et makulangkulang tan say kapaldua et makabat. Imbes, say punto ya labay ton ipasabi et mikonektaan ed Panarian, ya kada disipulo to et sarag toy manpili no kasin magmaliw ya alerto odino andi. Balet matalek si Jesus ya kada lingkor to et makapansiansian matoor tan nabendisyonan nen Ama to.

Diad ilustrasyon, amin ya samploran mamarikit et pinmaway pian mangabet ed nobyo tan mila ed panmartsa. Kasabi na nobyo, silewan na saray mamarikit so dalanen da panamegley na saray lamparaan da, tan igagalang day nobyo legan ton aawitey nobya to diad abung ya imparaan parad sikato. Anto balet so agawa?

Impaliwawa nen Jesus: “Inawit na saray makulangkulang so lamparaan da balet ag-ira angawit na reserban larak, ingen ta angawit na reserban  larak iray makabat sanen inawit day lamparaan da. Sanen abayagan so nobyo, akateglep tan akaugip iran amin.” (Mateo 25:3-5) Ag-akasabin tampol so nobyo. Talagan abayagan amo, kanian akaugip iray mamarikit. Nayarin anonotan na saray apostol imay imbaga nen Jesus nipaakar ed gagalangen a too ya linmad arawin dalin tan “akapawil la kayari ton naawat so pakauley bilang ari.”​—Lucas 19:11-15.

Diad ilustrasyon nipaakar ed samploran mamarikit, imbaga nen Jesus no antoy nagawa kasabi na nobyo: “Kasabi pegley-labi et walay inmeyag: ‘Wadia lay nobyo! Paway kayo tan abet yo.’” (Mateo 25:6) Kasin akaparaan tan alerto iray mamarikit?

Intuloy nen Jesus: “Kanian inmalagey ya amin iramay mamarikit tan imparaan da iray lamparaan da. Inkuan na saray makulangkulang ed saray makabat, ‘Ikdan yo kami pay larak yo, ta ngalngali la naerep iray lamparaan mi.’ Inmebat iray makabat: ‘Ompan onkulang la iya parad sikatayo. La kayo laingen ed saramay manlalako tan mangaliw kayoy parad sikayo.’”​—Mateo 25:7-9.

Kanian saray limaran mamarikit et aliwan alerto tan ag-akaparaan ed isabi na nobyo. Kulang so larak parad lamparaan da tan kaukolan day mananap. Imbaga nen Jesus: “Sanen linma la ran mangaliw, sinmabi so nobyo. Saray akaparaan a mamarikit so akiulop ed sikaton linmoob ed pambansalan, tan inkapot lay puerta. Kayari na saya et sinmabi met iramay arum nin mamarikit tan inkuan da, ‘Katawan, Katawan, paloob mo kami!’ Sikatoy inmebat, ‘Ibagak ed sikayoy tua, agta kayo kabat.’” (Mateo 25:10-12) Talagan makapaermen so pansumpalan na agpansiansian akaparaan tan alerto!

Natalosan na saray apostol ya say nobyon tutukoyen nen Jesus et sikaton mismo. Wala lay imbaga to ya inkompara toy sarili to ed sakey a nobyo. (Lucas 5:34, 35) Saramay makabat ya mamarikit ey? Nen ibabaga toy nipaakar ed “melag a pulok” ya pangiteran ed Panarian, onia ray salitan inusar nen Jesus: “Manpales kayo tan manparaan kayo tan selselan yo iray lamparaan yo.” (Lucas 12:32, 35) Kanian diad sayan ilustrasyon nipaakar ed saray mamarikit, natalosan na saray apostol ya sikara so tutukoyen nen Jesus. Anto sirin so mensahe ya ipapasabi nen Jesus ed sayan ilustrasyon?

Malinlinew so impangipaliwawa nen Jesus nipaakar ed satan. Sinampotan to iyan ilustrasyon diad impangibagan: “Mantultuloy kayo sirin a manbantay, lapud agyo amta so agew odino say oras.”​—Mateo 25:13.

Malinew ya bibilinen nen Jesus iray matoor ya patumbok to ya lapud onsabin kiwawala to et kaukolan day ‘mantultuloy a manbantay.’ Sikatoy onsabi tan nepeg ya akaparaan tan alerto ira​—singa say limaran makabat ya mamarikit​—pian agnaandi mabmablin ilalo da tan agnasayang so premyo ya nayarin niiter ed sikara.